തിരുവനന്തപുരം: ശമ്പള പരിഷ്കരണം നടപ്പിലാക്കണമെന്നാവശ്യപ്പെട്ട് കെ.എസ്.ആർ.ടി.സിയിൽ വീണ്ടും പണിമുടക്ക്. യു.ഡി.എഫ് സംഘടനയായ ടി.ഡി.എഫാണ് അനിശ്ചിതകാല പണിമുടക്ക് പ്രഖ്യാപിച്ചത്. എന്നു മുതലാണ് പണിമുടക്ക് ആരംഭിക്കുകയെന്ന വിവരം വ്യക്തമല്ല. പണിമുടക്ക് തുടങ്ങുന്ന തീയതി ഉടൻ പ്രഖ്യാപിക്കുമെന്നാണ് നേതാക്കൾ നൽകുന്ന വിവരം.
ശമ്പള പരിഷ്കരണമെന്ന ആവശ്യം ഉന്നിയിച്ച് സംയുക്ത തൊഴിലാളി യൂണിയൻ നേരത്തെ പണിമുടക്ക് നടത്തിയിരുന്നു. എന്നാൽ വിഷയത്തിൽ സർക്കാരിന്റെ ഭാഗത്തുനിന്ന് ഇതുവരെ ഒരു ഉറപ്പും ലഭിച്ചിട്ടില്ലെന്നാണ് ടിഡിഎഫ് ആരോപിക്കുന്നത്. നേരത്തേത് സൂചന പണിമുടക്കായിരുന്നുവെന്നും ഉറപ്പുകൾ പാലിക്കാത്തതിനാലാണ് വീണ്ടും സമരത്തിനിറങ്ങുന്നതെന്നും ടി.ഡി.എഫ് അറിയിച്ചു.
കഴിഞ്ഞ മാസത്തെ ശമ്പളം ഇതുവരെ നൽകിയിട്ടില്ലെന്നും ഈ മാസം 15 മുതൽ ചീഫ് ഓഫീസിന് മുന്നിൽ അനിശ്ചിതകാല സത്യാഗ്രഹവും ആരംഭിക്കുമെന്നും സംഘടനാ നേതാക്കൾ വ്യക്തമാക്കി. മറ്റ് തൊഴിലാളി സംഘടനകളുമായി ചർച്ച നടത്തിയ ശേഷം അവരെ കൂടി സമരത്തിന്റെ ഭാഗമാക്കാനും ടിഡിഎഫ് പദ്ധതിയിടുന്നുണ്ട്.