തൃശൂർ: ഗുരുവായൂർ ക്ഷേത്രത്തിൽ കുട്ടികൾക്കുള്ള ചോറൂണ്, തുലാഭാരം വഴിപാടുകൾ പുനരാരംഭിക്കുന്നു. വൃശ്ചികം ഒന്നായ ചൊവ്വാഴ്ച മുതലാണ് വഴിപാടുകൾ പുനരാരംഭിക്കുന്നത്. കോവിഡ് വൈറസ് വ്യാപനത്തെ തുടർന്നുണ്ടായ നിയന്ത്രണങ്ങൾ കാരണം 20 മാസത്തോളമായി പത്തുവയസിൽ താഴെയുള്ള കുട്ടികളെ ഗുരുവായൂർ ക്ഷേത്രത്തിൽ പ്രവേശിപ്പിച്ചിരുന്നില്ല. ഈ നിയന്ത്രണമാണ് ഇപ്പോൾ നീക്കിയത്.
ദേവസ്വം ചെയർമാൻ കെ ബി മോഹൻദാസ് കളക്ടറുമായി നടത്തിയ ചർച്ചയെ തുടർന്നാണ് ചോറൂണ്, തൂലാഭാരം വഴിപാടുകൾ നടത്താൻ അനുമതി ലഭിച്ചത്. ചൊവ്വാഴ്ച മുതൽ ക്ഷേത്രത്തിലെ കോവിഡ് നിയന്ത്രണങ്ങളിൽ ഇളവുകൾ നൽകിയിട്ടുണ്ട്. പുലർച്ചെ അഞ്ചുമുതൽ പ്രഭാത ഭക്ഷണത്തോടെ പ്രസാദ ഊട്ട് ആരംഭിക്കും. അയ്യപ്പന്മാരുടെ കെട്ടുനിറ, ഓൺലൈൻ ബുക്ക് ചെയ്ത ഭക്തർക്ക് നാലമ്പലത്തിൽ പ്രവേശനം, വൈകീട്ട് 3.30 മുതൽ ദർശനം എന്നിവയും ആരംഭിക്കും. അതേസമയം ശബരിമല തീർഥാടകരെ ഓൺലൈൻ ബുക്കിംഗ് ഇല്ലാതെ തന്നെ പ്രവേശിപ്പിക്കും. തിങ്കളാഴ്ച ക്ഷേത്രത്തിൽ ഏകാദശി വിളക്കുകൾ ആരംഭിക്കും. ഡിസംബർ 14 നാണ് ഏകാദശി.