നീണ്ട ഇടവേളകള്ക്ക് ശേഷം തിയേറ്ററുകള് ഉണരുമ്പോള് ആദ്യം റിലീസിംഗിനെത്തുന്ന ബിഗ് ബജറ്റ് ചിത്രങ്ങളിലൊന്നാണ് ദുല്ഖര് സല്മാന് നായകനാകുന്ന ‘കുറുപ്പ്’. നവംബര് 12 നാണ് ചിത്രം തിയേറ്ററുകളില് എത്തുന്നത്.
കുപ്രസിദ്ധ പിടികിട്ടാപ്പുള്ളി സുകുമാരകുറുപ്പിന്റെ ജീവിതത്തെ ആസ്പദമാക്കി ശ്രീനാഥ് രാജേന്ദ്രന് സംവിധാനം ചെയ്ത ചിത്രമാണ് ‘കുറുപ്പ്’. സുകുമാര കുറുപ്പിന്റെ വേഷമാണ് ചിത്രത്തില് ദുല്ഖറിന്. ദുല്ഖറിന്റെ കരിയറിലെ തന്നെ ഏറ്റവും വലിയ ബഡ്ജറ്റില് ഒരുക്കിയിരിക്കുന്ന ചിത്രത്തിന്റെ മുടക്കു മുതല് 35 കോടിയാണ്. ‘മൂത്തോന്’ എന്ന ചിത്രത്തിലൂടെ മലയാളത്തിലേക്ക് അരങ്ങേറ്റം കുറിച്ച ശോഭിതാ ധുലിപാലയാണ് ചിത്രത്തിലെ നായിക. ഇന്ദ്രജിത്, സുകുമാരന്, സണ്ണി വെയിന്, ഷൈന് ടോം ചാക്കോ, വിജയരാഘവന്, പി.ബാലചന്ദ്രന്, സുരഭി ലക്ഷ്മി, ശിവജിത് പദ്മനാഭന് എന്നിവരാണ് ചിത്രത്തിലെ മറ്റു അഭിനേതാക്കള്.
ദുല്ഖറി ഉടമസ്ഥതയിലുള്ള വേഫറെര് ഫിലിംസും എം സ്റ്റാര് എന്റര്ടൈന്മെന്റ്സും ചേര്ന്നാണ് ചിത്രം നിര്മ്മിച്ചിരിക്കുന്നത്. ജിതിന് കെ ജോസ് കഥ ഒരുക്കിയിരിക്കുന്ന ചിത്രത്തിന്റെ തിരക്കഥയും സംഭാഷണവും ഒരുക്കിയത് ഡാനിയേല് സായൂജ് നായരും കെ എസ് അരവിന്ദും ചേര്ന്നാണ്. നിമിഷ രവി ഛായാഗ്രഹണവും സുഷിന് ശ്യാം സംഗീത സംവിധാനവും നിര്വഹിക്കുന്നു. കേരളം, അഹമ്മദാബാദ്, ബോംബെ, ദുബായ്, മാംഗ്ളൂര്, മൈസൂര് എന്നിവിടങ്ങളിലായിരുന്നു സിനിമയുടെ ചിത്രീകരണം.