ഒന്നര വര്‍ഷത്തെ അടച്ചിടലിന് ശേഷം കുരുന്നുകളുടെ ആരവങ്ങളുമായി സംസ്ഥാനത്തെ സ്‌കൂളുകള്‍ ഉണര്‍ന്നു. പത്ത് ലക്ഷത്തോളം കുട്ടികളാണ് ഇന്ന് സ്‌കൂളിലേക്ക് എത്തിയത്. പ്രവേശനോത്സവത്തിന്റെ സംസ്ഥാനതല ഉദ്ഘാടനം രാവിലെ 8.30ന് തിരുവനന്തപുരം ഗവ: കോട്ടണ്‍ഹില്‍ യുപി സ്‌കൂളില്‍ വിദ്യാഭ്യസ മന്ത്രി വി.ശിവന്‍കുട്ടി നിര്‍വ്വഹിച്ചു.
കുട്ടികള്‍ സ്‌കൂളിലേക്ക് മടങ്ങിയെത്തുമ്പോള്‍ അവരുടെ ആരോഗ്യകാര്യങ്ങളില്‍ ഒരു ആശങ്കയും വേണ്ട. അമ്മമാര്‍ പരിപാലിക്കുന്നതു പോലെ തന്നെ കുട്ടികളുടെ കാര്യങ്ങള്‍ അധ്യാപകര്‍ നോക്കുന്നതായിരിക്കും. കുട്ടികളുടെ ശുചിത്വം, സുരക്ഷ എന്നിവക്ക് വേണ്ടുന്ന എല്ലാ തയ്യാറെടുപ്പുകളും നടത്തിയിട്ടുണ്ടെന്നും മന്ത്രി അറിയിച്ചു.
കൊവിഡ് പ്രോട്ടോക്കോള്‍ പാലിച്ച് ആഘോഷപൂര്‍വമായി തന്നെയാണ് കുരുന്നുകളെ വരവേറ്റത്. ശരീര താപനില പരിശോധിച്ച ശേഷം സാനിറ്റൈസര്‍ ഉപയോഗവും ഉറപ്പാക്കിയിരുന്നു. ഷിഫ്റ്റ് സമ്പ്രദായത്തിലാണ് ക്ലാസുകള്‍ നടത്തുക. 8,9 ക്ലാസുകള്‍ 15 നാണ് തുടങ്ങുക. പ്ലസ് വണ്‍ ക്ലാസുകളും 15 ന് തന്നെ തുടങ്ങും. വാക്‌സിനെടുക്കാത്ത അധ്യാപകരോട് സ്‌കൂളിലേക്ക് വരരുതെന്നും നിര്‍ദ്ദേശമുണ്ട്.