കുട്ടികൾക്കുള്ള ഇഷ്ടമുള്ള പ്രവർത്തനങ്ങളിൽ ഏർപ്പെടാൻ അവസരം നൽകണം; മാർഗരേഖ പുറത്തിറക്കി സർക്കാർ

On: October 28, 2021

തിരുവനന്തപുരം: സംസ്ഥാനത്തെ സ്‌കൂളുകൾ തുറക്കുന്ന സാഹചര്യത്തിൽ അക്കാദമിക മാർഗരേഖ പുറത്തിറക്കി സർക്കാർ. എല്ലാ സ്‌കൂളുകളിലും അക്കാദമിക പ്രവർത്തനങ്ങൾ ഏകീകരിക്കുന്ന രീതിയിലാണ് സർക്കാർ മാർഗരേഖ തയ്യാറാക്കിയിരിക്കുന്നത്. സ്‌കൂൾ അന്തരീക്ഷവുമായി വിദ്യാർഥികളെ സ്വാഭാവികമായി കണ്ണിചേർക്കുന്നതിനാണ് തുടക്കത്തിലുള്ള പ്രവൃത്തി ദിവസങ്ങൾ ഉപയോഗിക്കേണ്ടതെന്നാണ് മാർഗ രേഖയിൽ വ്യക്തമാക്കിയിരിക്കുന്നത്.

കോവിഡ് പ്രതിസന്ധിയെ മറികടന്ന് സ്‌കൂളുകൾ തുറക്കുമ്പോൾ എല്ലാ വിദ്യാർത്ഥികളേയും സ്‌കൂളിലേക്ക് തിരികെ എത്തിക്കാനാണ് സർക്കാർ ലക്ഷ്യംവെയ്ക്കുന്നത്. എല്ലാ സ്‌കൂളുകളിലും ഒരേ രീതിയിൽ അക്കാദമിക പ്രവർത്തനങ്ങൾ നടക്കണമെന്നും സർക്കാർ പദ്ധതിയിടുന്നു.

കുട്ടികൾക്കുള്ള ഇഷ്ടമുള്ള പ്രവർത്തനങ്ങളിൽ ഏർപ്പെടാൻ അവസരം നൽകണമെന്ന് മാർഗരേഖയിൽ നിർദ്ദേശിച്ചിട്ടുണ്ട്. കുട്ടികളുടെ ആത്മവിശ്വാസം വർധിപ്പിക്കുന്നതിന് അധ്യാപകർ മുൻഗണന നൽകണം. സർഗാത്മക കഴിവുകൾ പ്രകടിപ്പിക്കാൻ അവസരമൊരുക്കണം. ലഘുവ്യായാമങ്ങൾ ചെയ്യിപ്പിക്കണം. ഇഷ്ടപുസ്തകങ്ങൾ വായിക്കാൻ അവസരം നൽകണമെന്നും മാർഗനിർദ്ദേശത്തിൽ വിശദീകരിക്കുന്നു.

പഠനത്തിനായി ഓൺലൈൻ, ഓഫ്ലൈൻ സാധ്യതകൾ അധ്യാപകർ പ്രയോജനപ്പെടുത്തണം. അസൈൻമെന്റ് പ്രവർത്തനങ്ങൾ ഓൺലൈൻ വഴിയാക്കണം. സ്‌കൂളിൽ എത്താൻ സാധിക്കാത്ത വിദ്യാർഥികളുടെ പഠനം തടസ്സപ്പെടാതിരിക്കാൻ ശ്രദ്ധിക്കണം. കോവിഡ് സുരക്ഷാ മാനദണ്ഡം പാലിക്കാൻ ഓരോ സ്‌കൂളും പ്രവർത്തന സമയം ക്രമീകരിക്കണം. പഠനവിടവ് പരിഹരിക്കാൻ രക്ഷിതാക്കളുടെ സഹകരണം ഉറപ്പാക്കണമെന്നും താൽപര്യമുള്ള എല്ലാ വിദ്യാർഥികളേയും സ്‌കൂളിലെത്തിക്കാനുള്ള സൗകര്യം ഉറപ്പാക്കണമെന്നും മാർഗരേഖയിൽ പറയുന്നുണ്ട്.

Previous Post: താലിബാന് സാമ്പത്തിക പിന്തുണ നൽകി ചൈന; ഒരു മില്യൺ ഡോളറിന്റെ ധനസഹായം നൽകും

Next Post: ചൈനയ്ക്കുള്ള ശക്തമായ സന്ദേശം; അഗ്‌നി-5 ന്റെ പരീക്ഷണം വിജയകരം

ജിപിടി-4ഒ; ചാറ്റ് ജിപിടി ഉപഭോക്താക്കൾക്ക് പ്രധാനപ്പെട്ട അപ്‌ഡേറ്റുമായി ഓപ്പൺ എഐ

ചാറ്റ് ജിപിടി ഉപഭോക്താക്കൾക്ക് പ്രധാനപ്പെട്ട അപ്‌ഡേറ്റ് അവതരിപ്പിച്ച് ഓപ്പൺ എഐ. ജിപിടി-4ഒ എന്ന പേരിലാണ് പുതിയ അപ്‌ഡേഷൻ. തിങ്കളാഴ്ചയാണ് പുതിയ എഐ മോഡൽ ഓപ്പൺ എഐ അവതരിപ്പിച്ചത്. ഒംനി എന്ന വാക്കിന്റെ ചുരുക്കമാണ് ഒ എന്നത്. ടെക്സ്റ്റ്, ശബ്ദം, ദൃശ്യം എന്നിവ മെച്ചപ്പെട്ട രീതിയിൽ പ്രൊസസ് ചെയ്യാൻ കഴിവുള്ള എഐ മോഡലാണിതെന്നതാണ് പ്രധാനപ്പെട്ട സവിശേഷത. ജിപിടി 4 ൽ ലഭ്യമായ മുൻനിര കഴിവുകൾ ജിപിടി-4ഒയിലൂടെ സൗജന്യ ഉപഭോക്താക്കളടക്കം എല്ലാവർക്കും ലഭിക്കും. പുതിയ മോഡലിന്റെ സവിശേഷത ചിത്രങ്ങളും വീഡിയോയും ഉപയോഗിച്ച് മെച്ചപ്പെട്ട രീതിയിൽ ചാറ്റ് ജിപിടിയുമായി സംവദിക്കാനാകും എന്നതാണ്. ഉദാഹരണത്തിന് മറ്റൊരു ഭാഷയിലുള്ള ഹോട്ടൽ മെനു ചിത്രമെടുത്ത് ജിപിടി-4ഒ യ്ക്ക് നൽകിയാൽ അതിലെ കുറിപ്പുകൾ തർജ്ജമ ചെയ്യാനും ഭക്ഷണത്തിന്റെ ചരിത്രം ഉൾപ്പടെയുള്ള കൂടുതൽ വിവരങ്ങൾ അറിയാനും നിർദേശങ്ങൾ തേടാനുമെല്ലാം ഇതിലൂടെ കഴിയുന്നതാണ്. സമാനമായ വീഡിയോ ദൃശ്യങ്ങൾ ഉപയോഗിച്ചും ജിപിടിയോട് സംവദിക്കാൻ കഴിയും. ചാറ്റ് ജിപിടിയ്ക്ക് നമ്മളെ കണ്ടുകൊണ്ട് സംസാരിക്കാൻ കഴിയുമെന്നതാണ് മറ്റൊരു പ്രധാന സവിശേഷത. തത്സമയ വീഡിയോയിലൂടെ കാണുന്നത് തിരിച്ചറിയാനും വിശകലനം ചെയ്യാനും ജിപിടി 4ഒയ്ക്ക് സാധിക്കും.
ബ്രിട്ടണിലെ കുടിയേറ്റ നിരക്കിൽ ഇടിവുണ്ടാകും; റിപ്പോർട്ടുമായി മൈഗ്രേഷൻ ഉപദേശക സമിതി തലവൻ

ലണ്ടൻ: ബ്രിട്ടനിലെ പൊതു തെരഞ്ഞെടുപ്പിൽ ഋഷി സുനകിന് വിജയപ്രതീക്ഷ നൽകി മൈഗ്രേഷൻ ഉപദേശക സമിതി തലവന്റെ റിപ്പോർട്ട്. ബ്രിട്ടനിലേക്കുള്ള കുടിയേറ്റ നിരക്ക് വൻതോതിൽ കുറയുമെന്നാണ് പുറത്തുവന്ന കണക്കുകൾ വ്യക്തമാക്കുന്നത്. വിദേശ വിദ്യാർഥികൾക്ക് ആശ്രിതരെ കൊണ്ടുവരുന്നതിനുള്ള നിരോധനം സർക്കാർ പ്രതീക്ഷിച്ചതിലും വലിയ സ്വാധീനം ചൊലുത്തും എന്നാണ് വിലയിരുത്തൽ. സെപ്റ്റംബർ മാസത്തോടെ മൈഗ്രേഷൻ 150000 നും 200000 നും ഇടയിൽ കുറയും എന്നും മൈഗ്രേഷൻ ഉപദേശക സമിതി തലവന്റെ റിപ്പോർട്ടിൽ വ്യക്തമാക്കുന്നു. വിദേശ വിദ്യാർത്ഥികൾക്ക് അടക്കം ഏർപ്പെടുത്തിയിരിക്കുന്ന നിയന്ത്രണം 2019ലെ കണക്കിന് തുല്യമായി കുറയും എന്നാണ് പ്രതീക്ഷിക്കുന്നത്. നെറ്റ് മൈഗ്രേഷൻ കുറയ്ക്കുന്നതിന് പ്രധാനമന്ത്രി നിരവധി നടപടികൾ അവതരിപ്പിച്ചിരുന്നു. വിദേശ ബിരുദാനന്തര ബിരുദ വിദ്യാർത്ഥികളെയും അവരുടെ ആശ്രിതരെയും നിയന്ത്രിക്കുന്നതിലൂടെ നെറ്റ് മൈഗ്രേഷൻ വെട്ടി കുറയ്ക്കാമെന്ന് സുനക് തിരിച്ചറിഞ്ഞതോടെയാണ് ഇതു സംബന്ധിച്ച നടപടികൾ അദ്ദേഹം ആരംഭിച്ചത്. ഇവയെല്ലാം ഫലം കണ്ടിട്ടുണ്ടെന്നാണ് കണക്കുകളിൽ നിന്ന് മനസ്സിലാക്കാൻ കഴിയുന്നത്.
താൻ പോയത് തന്റെ സുഹൃത്തിന് വേണ്ടി; തനിക്ക് രാഷ്ട്രീയമില്ലെന്ന് അല്ലു അർജുൻ

ഹൈദരാബാദ് : ലോക്സഭാ തെരഞ്ഞെടുപ്പ് മാതൃകാ പെരുമാറ്റ ചട്ടം ലംഘിച്ചുവെന്ന് ആരോപിച്ച് തെലുങ്ക് താരം അല്ലു അർജുനെതിരെ കഴിഞ്ഞ ദിവസം കേസെടുത്തിരുന്നു. ഇപ്പോഴിതാ സംഭവത്തിൽ വിശദീകരണമായി എത്തിയിരിക്കുകയാണ് നടൻ അല്ലു അർജുൻ. താൻ പോയത് തന്റെ സുഹൃത്തിന് വേണ്ടിയാണെന്നും തനിക്ക് രാഷ്ട്രീയമില്ലെന്നും അല്ലു അർജുൻ പറഞ്ഞു. ഒരു രാഷ്ട്രീയ പാർട്ടിയുമായും തനിക്ക് ബന്ധമില്ലെന്ന് വ്യക്തമാക്കാൻ ആഗ്രഹിക്കുന്നു. താൻ നിഷ്പക്ഷനാണെന്നും ജനസേന പാർട്ടി സ്ഥാപകനും അമ്മാവനുമായ പവൻ കല്യാൺ ഉൾപ്പെടെയുള്ളവരെ പാർട്ടി നോക്കാതെ പിന്തുണയ്ക്കുന്നുവെന്നും അല്ലു അർജുൻ അറിയിച്ചു. കഴിഞ്ഞതവണ തനിക്ക് വാക്കുപാലിക്കാൻ കഴിഞ്ഞില്ല. ഇത്തവണ തന്റെ സുഹൃത്തിനുവേണ്ടി അത് നിറവേറ്റാൻ തനിക്ക് കഴിഞ്ഞു. അച്ഛൻമാരെ സ്നേഹവും പിന്തുണയും ഉണ്ടെന്നും തിരഞ്ഞെടുപ്പിൽ എല്ലാ ആശംസകളും അറിയിക്കുന്നുവെന്നും അല്ലു അർജുൻ കൂട്ടിച്ചേർത്തു. വൈ എസ് ആർ സി പി പാർട്ടി സ്ഥാനാർത്ഥി എസ് രവിചന്ദ്ര കിഷോർ റെഡിയെ പിന്തുണച്ചാൽ തെരഞ്ഞെടുപ്പ് പ്രചാരണം നടത്തിയതിന് ആയിരുന്നു അല്ലു അർജുനെതിരെ കേസെടുത്തത്. വരണാധികാരിയുടെ അനുമതിയില്ലാതെ ആളെ കൂട്ടി എന്നായിരുന്നു കേസ്. രവിചന്ദ്രയ്ക്ക് പിന്തുണയുമായി അല്ലു അർജുൻ എക്സ് മാധ്യമത്തിൽ പോസ്റ്റ് പങ്കുവയ്ക്കുകയും ചെയ്തിരുന്നു. ഇതിന് പിന്നാലെയാണ് താരത്തിനെതിരെ കേസ് രജിസ്റ്റർ ചെയ്തത്.
രാജ്യത്ത് പൗരത്വ ഭേദഗതി നിയമം നടപ്പിലാക്കി കേന്ദ്രം; 14 പേർക്ക് പൗരത്വം നൽകി

ന്യൂഡൽഹി: രാജ്യത്ത് പൗരത്വ ഭേദഗതി നിയമം കേന്ദ്ര സർക്കാർ നടപ്പിലാക്കി. 14 പേരുടെ അപേക്ഷകൾ അംഗീകരിച്ച് കേന്ദ്ര സർക്കാർ പൗരത്വം നൽകി. പാകിസ്ഥാനിൽ നിന്നു വന്ന അഭയാർത്ഥികൾക്കാണ് പൗരത്വം ലഭിച്ചിരിക്കുന്നത്. കേന്ദ്ര ആഭ്യന്തര സെക്രട്ടറിയാണ് പൗരത്വ സർട്ടിഫിക്കറ്റ് കൈമാറിയത്. സിഎഎക്കെതിരായ ഹർജി സുപ്രീം കോടതിയുടെ പരിഗണനയിലാണ്. ഇതിനിടെയാണ് സർക്കാർ ഇതുസംബന്ധിച്ച നീക്കം നടത്തിയത്. കേന്ദ്രസർക്കാർ പൗരത്വ നിയമഭേദഗതി സംബന്ധിച്ച വിജ്ഞാപനം ഇറക്കിയത് ഇക്കഴിഞ്ഞ മാർച്ച് 11 നാണ്. പൗരത്വനിയമ ഭേദഗതി രാജ്യത്ത് പ്രാബല്യത്തിൽ വന്നതിന് പിന്നാലെ വലിയ രീതിയിലുള്ള പ്രതിഷേധങ്ങൾ രാജ്യത്തിന്റെ വിവിധ ഭാഗങ്ങളിൽ നടന്നിരുന്നു.
മീഡിയ അക്കാദമി പി ജി ഡിപ്ലോമ: മെയ് 31 വരെ അപേക്ഷിക്കാം

തിരുവനന്തപുരം: സംസ്ഥാന സർക്കാർ സ്ഥാപനമായ കേരള മീഡിയ അക്കാദമിയുടെ ഇൻസ്റ്റിറ്റ്യൂട്ട് ഓഫ് കമ്യൂണിക്കേഷൻ നടത്തുന്ന പിജി ഡിപ്ലോമ കോഴ്സ് പ്രവേശനത്തിന് അപേക്ഷ ക്ഷണിച്ചു. ജേണലിസം & കമ്യൂണിക്കേഷൻ, ടെലിവിഷൻ ജേണലിസം, പബ്ലിക് റിലേഷൻസ് & അഡ്വർടൈസിങ്ങ് എന്നീ പോസ്റ്റ് ഗ്രാജ്വേറ്റ് ഡിപ്ലോമ കോഴ്സുകൾക്ക് മെയ് 15 വരെ ഓൺലൈനായി അപേക്ഷ സമർപ്പിക്കാം. ഏതെങ്കിലും വിഷയത്തിൽ ബിരുദമാണ് അടിസ്ഥാന യോഗ്യത. അവസാനവർഷ ബിരുദ പരീക്ഷ എഴുതുന്നവർക്കും, പരീക്ഷയെഴുതി ഫലം കാത്തിരിക്കുന്നവർക്കും അപേക്ഷിക്കാം. 31.5.2024 ൽ 28 വയസ്സ് കവിയരുത്. പട്ടികജാതി, പട്ടികവർഗ, ഒ.ഇ.സി. വിഭാഗക്കാർക്ക് നിയമാനുസൃത വയസ്സ് ഇളവുണ്ടായിരിക്കും. ഈ വിഭാഗക്കാർക്ക് ഫീസിളവും ഉണ്ടാകും. അഭിരുചി പരീക്ഷയുടേയും ഇന്റർവ്യൂവിന്റേയും അടിസ്ഥാനത്തിലായിരിക്കും പ്രവേശനം. പ്രവേശന പരീക്ഷ ഓൺലൈനായാണ് നടത്തുന്നത്. പ്രിന്റ് ജേണലിസം, റേഡിയോ, ഓൺലൈൻ, സോഷ്യൽ മീഡിയ, ബ്രോഡ്കാസ്റ്റ് ജേണലിസം, മൊബൈൽ ജേണലിസം തുടങ്ങിയ മാധ്യമപ്രവർത്തനത്തിന്റെ വിവിധ മേഖലകളിൽ പരിശീലനം നൽകുന്ന സമഗ്രമായ പാഠ്യപദ്ധതിയാണ് ജേണലിസം & കമ്യൂണിക്കേഷൻ കോഴ്സ്. ടെലിവിഷൻ ജേണലിസം, ന്യൂസ് ആങ്കറിംഗ്, വീഡിയോ കാമറ, വീഡിയോ എഡിറ്റിങ്ങ്, ഡോകുമെന്ററി പ്രൊഡക്ഷൻ, മീഡിയ കൺവെർജൻസ്, മൊബൈൽ ജേണലിസം, തുടങ്ങി ദൃശ്യമാധ്യമ മേഖലയിൽ സമഗ്രമായ പ്രായോഗിക പരിശീലനം നൽകുന്ന കോഴ്സാണ് ടെലിവിഷൻ ജേണലിസം. പബ്ലിക് റിലേഷൻസ്, അഡ്വർടൈസിങ്ങ് മേഖലയിലെ നൂതനപ്രവണതകളിൽ പ്രായോഗിക പരിശീലനത്തിന് ഊന്നൽ നൽകുന്നതാണ് പബ്ലിക് റിലേഷൻസ് & അഡ്വർടൈസിങ്ങ് കോഴ്സ്. ഒപ്പം, ജേണലിസം, ക്രീയേറ്റീവ് റൈറ്റിങ്, പോഡ്കാസ്റ്റിംഗ്, ഡിജിറ്റൽ മാർക്കറ്റിങ്, ആഡ് ഫിലിം മേക്കിങ് എന്നിവയിലും സവിശേഷപരിശീലനം നൽകുന്നു. ഇന്റേൺഷിപ്പും, പ്രാക്ടിക്കലും ഉൾപ്പെടെ കോഴ്സിന്റെ ദൈർഘ്യം ഒരുവർഷമാണ്. കോഴ്സ് സംബന്ധിച്ച വിശദ വിവരങ്ങൾ മീഡിയ അക്കാദമിയുടെ www.keralamediaacademy.org യിൽ ലഭിക്കും. അപേക്ഷകൾ ഓൺലൈനായി വെബ്സൈറ്റിലൂടെ സമർപ്പിക്കാം. അപേക്ഷാഫീസ് 300 രൂപ (പട്ടികജാതി, പട്ടികവർഗ, ഒ.ഇ.സി. വിഭാഗക്കാർക്ക് 150 രൂപ) ഇ-ട്രാൻസ്ഫർ / ജി-പേ/ ബാങ്ക് മുഖേന അടച്ച രേഖ അപേക്ഷയോടൊപ്പം അപ്ലോഡ് ചെയ്യണം. ഓൺലൈൻ അപേക്ഷ സമർപ്പിക്കേണ്ട അവസാന തീയതി 2024 മെയ് 31. കൂടുതൽ വിവരങ്ങൾ അക്കാദമി ഓഫീസിൽ നിന്ന് ലഭിക്കും. ഫോൺ: 0484-2422275 9539084444 (ഡയറക്ടർ), 8086138827 (ടെലിവിഷൻ ജേണലിസം കോ-ഓർഡിനേറ്റർ), 7907703499 (പബ്ലിക് റിലേഷൻസ് കോ-ഓർഡിനേറ്റർ), 9388533920 (ജേണലിസം & കമ്യൂണിക്കേഷൻ കോ-ഓർഡിനേറ്റർ).