തിരുവനന്തപുരം: തിരുവനന്തപുരം കോർപ്പറേഷൻ ഹാളിൽ നാടകീയ രംഗങ്ങൾ. നഗരസഭയിലെ നികുതിവെട്ടിപ്പിനെതിരെ ബി.ജെ.പി കൗൺസിലർമാർ നടത്തുന്ന പ്രതിഷേധ സമരത്തിനിടെയാണ് നാടകീയ രംഗങ്ങൾ അരങ്ങേറിയത്. തിരുവനന്തപുരം കോർപ്പറേഷനിലെ നികുതിവെട്ടിപ്പിനെതിരെ നടപടി സ്വീകരിക്കണമെന്നാവശ്യപ്പെട്ടാണ് ബിജെപി കൗൺസിലർമാർ സമരം നടത്തുന്നത്. മേയർ ആര്യ രാജേന്ദ്രൻ കൗൺസിലിൽ പ്രവേശിക്കുന്നത് തടയാൻ ഹാളിൽ കിടന്നാണ് ബിജെപി പ്രവർത്തകർ പ്രതിഷേധിച്ചത്. തുടർന്ന് മേയർക്ക് സംരക്ഷണമൊരുക്കി ഇടത് കൗൺസിലർമാരും രംഗത്തെത്തി.
സംഘർഷ സമാനമായ സാഹചര്യം ഉണ്ടായതോടെ പോലീസ് എത്തി മേയറെ ഡയസിലേക്ക് എത്തിച്ചു. ബി ജെ പി കൗൺസിലർമാരുടെ പ്രതിഷേധത്തെത്തുടർന്ന് ഇടത് അംഗങ്ങൾ മേശകൾ ചാടിക്കടന്നാണ് സ്വന്തം ഇരിപ്പിടത്തിൽ എത്തിയത്. പോലീസ് സംരക്ഷണയിലാണ് കൗൺസിൽ യോഗവും ആരംഭിച്ചത്. ബി ജെ പി സമരത്തിനെതിരെ യോഗം പ്രമേയം പാസാക്കി. നികുതിവെട്ടിപ്പ് നടത്തിയവർക്കെതിരെ ശക്തമായ നടപടി സ്വീകരിക്കണമെന്നാവശ്യപ്പെട്ട് ഇരുപതു ദിവസത്തിലധികമായി ബി ജെ പി പ്രതിഷേധം നടത്തുകയാണ്. രണ്ട് ദിവസമായി നിരാഹാരസമരവും ആരംഭിച്ചിട്ടുണ്ട്. കേസിൽ കുറ്റക്കാരായ മുഴുവൻ പ്രതികളെയും അറസ്റ്റ് ചെയ്യണമെന്നാണ് ബിജെപി ആവശ്യപ്പെടുന്നത്.