തിരുവനന്തപുരം: സൗജന്യ വൈഫൈ ഉപയോഗിക്കുന്നവര്ക്ക് മുന്നറിയിപ്പുമായി കേരളാ പൊലീസ്. എല്ലായിടത്തും ഇപ്പോള് സൗജന്യ വൈഫൈ ഹോട്ട്സ്പോട്ടുകള് സൗകര്യപ്രദമാണ്. പക്ഷെ ഇവ ഉപയോഗിക്കുന്നതിന് അപകടങ്ങളും ഏറെയാണെന്ന് പൊലീസ് ചൂണ്ടിക്കാട്ടുന്നു.
നിങ്ങള് ഒരു വൈഫൈ നെറ്റ്വര്ക്കിലേക്ക് കണക്റ്റുചെയ്ത് വെബ്സൈറ്റുകളിലൂടെയോ മൊബൈല് ആപ്പുകളിലൂടെയോ വിവരങ്ങള് കൈമാറുമ്പോള് മറ്റാര്ക്കെങ്കിലും അവ കൈക്കലാക്കാനുള്ള സാധ്യതയും തള്ളിക്കളയാനാവില്ലെന്ന് കേരളാ പൊലീസ് ഫേസ് ബുക്ക് പേജിലൂടെ മുന്നറിയിപ്പ് നല്കുന്നു.
അവര്ക്ക് നിങ്ങളുടെ സെഷന് ഹൈജാക്ക് ചെയ്യാനും നിങ്ങളെപ്പോലെ ലോഗിന് ചെയ്യാനും കഴിയും. സൗജന്യമായി ലഭ്യമാകുന്ന ഹാക്കിംഗ് ഉപകരണങ്ങള് ഉപയോഗിച്ച് പരിമിതമായ സാങ്കേതിക പരിജ്ഞാനമുള്ള ഉപയോക്താക്കള്ക്ക് പോലും ഇത് സാധ്യമാകും. നിങ്ങളുടെ വ്യക്തിഗത വിവരങ്ങള്, സ്വകാര്യ രേഖകള്, കോണ്ടാക്റ്റുകള്, കുടുംബ ഫോട്ടോകള്, ലോഗിന് ക്രെഡന്ഷ്യലുകള് എന്നിവപോലും നഷ്ടപ്പെടാനിടയുണ്ട്.
സാമ്പത്തിക വിവരങ്ങള് സൂക്ഷിക്കുന്ന സൈറ്റുകള് ഉള്പ്പെടെ, മറ്റ് വെബ്സൈറ്റുകളില് നിങ്ങളുടെ യൂസര് ഐഡികളും പാസ്വേഡുകളും ഹാക്ക് ചെയ്യുന്നതിനോ അല്ലെങ്കില് നിങ്ങളുടെ കോണ്ടാക്റ്റ് ലിസ്റ്റുകളിലെ ആള്ക്കാരെ തട്ടിപ്പിനിരയാക്കുന്നതിനോ നിങ്ങളുടെ അക്കൗണ്ട് ഉപയോഗിക്കാം. തട്ടിപ്പുകാര്ക്ക് നിങ്ങളുടെ വ്യക്തിപരമോ സാമ്പത്തികമോ ആയ വിവരങ്ങള് ലഭിക്കുകയാണെങ്കില്, അവര്ക്ക് നിങ്ങളുടെ ഐഡന്റിറ്റി തന്നെ തട്ടിപ്പിനിരയാക്കാമെന്ന് പൊലീസ് വ്യക്തമാക്കുന്നു.