ന്യുഡൽഹി: 2019-ൽ ജൽ ജീവൻ മിഷൻ ആരംഭിച്ചതിനു ശേഷം അഞ്ച് കോടി കുടുംബങ്ങൾക്ക് കുടിവെള്ള കണക്ഷൻ ലഭിച്ചുവെന്ന് പ്രധാനമന്ത്രി നരേന്ദ്ര മോദി. ഇപ്പോൾ ഏകദേശം 1.25 ലക്ഷം ഗ്രാമങ്ങളിലെ എല്ലാ വീടുകളിലും പൈപ്പ് വെള്ളം എത്തുന്നുണ്ടെന്ന് അദ്ദേഹം വ്യക്തമാക്കി. ജൽ ജീവൻ മിഷൻ പദ്ധതിയെപ്പറ്റി ഗ്രാമപഞ്ചായത്തുകളുമായും പാനീസമിതികളുമായും ഗ്രാമ ജല, ശുചിത്വ സമിതികളുമായും നടന്ന സംവാദത്തിൽ സംസാരിക്കുകയായിരുന്നു അദ്ദേഹം. കഴിഞ്ഞ എഴുപത് വർഷം ചെയ്തതിനെക്കാൾ കൂടുതൽ കഴിഞ്ഞ രണ്ടുവർഷം കൊണ്ടു ചെയ്യാനായെന്നും അദ്ദേഹം വ്യക്തമാക്കി.
സ്വാതന്ത്ര്യം ലഭിച്ചതു മുതൽ 2019 വരെ നമ്മുടെ രാജ്യത്തെ വെറും മൂന്ന് കോടി കുടുംബങ്ങൾക്ക് മാത്രമേ പൈപ്പ് വെള്ളം ലഭ്യമായിരുന്നുള്ളൂ. എന്നാൽ 2019-ൽ ജൽ ജീവൻ മിഷൻ ആരംഭിച്ചതിനു ശേഷം അഞ്ച് കോടി കുടുംബങ്ങൾക്ക് ജല കണക്ഷൻ നൽകി. നിലവിൽ രാജ്യത്തെ 80 ജില്ലകളിലെ 1.25 ലക്ഷം ഗ്രാമങ്ങളിലെ എല്ലാ വീടുകളിലും വെള്ളം എത്തുന്നുണ്ട്. കഴിഞ്ഞ ഏഴ് പതിറ്റാണ്ടുകളായി ചെയ്തതിനേക്കാൾ കൂടുതൽ ജോലി ‘ഇന്നത്തെ ഇന്ത്യ’ രണ്ട് വർഷത്തിനുള്ളിൽ ചെയ്തുവെന്ന് അദ്ദേഹം വിശദമാക്കി.
2019 ഓഗസ്റ്റ് 15-നാണ് നരേന്ദ്ര മോദി ജൽ ജീവൻ മിഷൻ പദ്ധതിയുടെ പ്രഖ്യാപനം നടത്തിയത്. എല്ലാ വീടുകളിലും ശുദ്ധമായ കുടിവെള്ളം എത്തിക്കുക എന്നതായിരുന്നു പദ്ധതിയുടെ ലക്ഷ്യം