ന്യൂഡൽഹി: 2021 സെപ്തംബർ മാസത്തിലെ ജിഎസ്ടി വരുമാനത്തിൽ വർധനവ്. മുൻ വർഷത്തെ അപേക്ഷിച്ച് 23 ശതമാനം വർധനവാണ് ജിഎസ്ടി വരുമാനത്തിൽ രേഖപ്പെടുത്തിപ്പെടുത്തിയിരിക്കുന്നത്. ചരക്ക് ഇറക്കുമതിയിൽ നിന്നുള്ള നികുതി വരുമാനം 30 ശതമാനമാണ് വർദ്ധിച്ചത്. ആഭ്യന്തര ഇടപാടുകളിൽ നിന്നുള്ള നികുതി വരുമാനം (സേവനങ്ങളുടെ ഇറക്കുമതി ഉൾപ്പെടെ) കഴിഞ്ഞ വർഷം സെപ്തംബർ മാസത്തെ വരുമാനത്തേക്കാൾ 20 ശതമാനം കൂടുതലാണെന്നാണ് കണക്കുകൾ വ്യക്തമാക്കുന്നത്.
2021 സെപ്റ്റംബർ മാസത്തിലെ ജിഎസ്ടി വരുമാനം 1,17,010 കോടി രൂപയാണ്. ഇതിൽ കേന്ദ്ര ജിഎസ്ടി വരുമാനം 20,578 കോടി രൂപയും സംസ്ഥാന ജിഎസ്ടി വരുമാനം 26,767 കോടി രൂപയും സംയോജിത ജിഎസ്ടി വരുമാനം 60,911 കോടി രൂപയും (ചരക്ക് ഇറക്കുമതിയിൽ നിന്നുള്ള നികുതി വരുമാനമായ 29,555 കോടി രൂപയുൾപ്പെടെ) സെസ് വഴിയുള്ള വരുമാനം 8,754 കോടി രൂപയും (ചരക്ക് ഇറക്കുമതിയിൽ നിന്നുള്ള നികുതി വരുമാനമായ 623 കോടി ഉൾപ്പെടെ) ആണ്. കേരളത്തിന്റെ ജിഎസ്ടി വരുമാനത്തിൽ 14 ശതമാനം വർദ്ധന രേഖപ്പെടുത്തി 1764 കോടി രൂപയിലെത്തി.
2021 സെപ്റ്റംബർ മാസത്തെ ക്രമപ്രകാരമുള്ള തിട്ടപ്പെടുത്തലുകൾക്ക് ശേഷം കേന്ദ്ര വരുമാനമായ CGST 49,390 കോടി രൂപയും സംസ്ഥാന വരുമാനമായ SGST 50,907 കോടി രൂപയുമാണ്. 2020 സെപ്റ്റംബറിലെ ജിഎസ്ടി വരുമാനവും 4% വളർച്ച രേഖപ്പെടുത്തിയിരുന്നു. 2019 സെപ്റ്റംബറിലെ വരുമാനത്തേക്കാൾ 4% ഉയർന്ന് 91,916 കോടി രൂപ ആയിരുന്നു വരുമാനം.
ചരക്ക് സേവന നികുതി (GST) നടപ്പാക്കിയത് മൂലമുള്ള നഷ്ടം നികത്തുന്നതിനായി സംസ്ഥാനങ്ങൾക്ക് 22,000 കോടി രൂപ കൂടി കൈമാറിയിട്ടുണ്ട്.