കൊച്ചി: പുരാവസ്തു തട്ടിപ്പു കേസുകളില് അറസ്റ്റിലായ മോന്സന് മാവുങ്കലിനെ പരിചയമുണ്ടെന്ന് നടന് ശ്രീനിവാസന്. ഡോക്ടര് എന്ന നിലയിലാണ് മോന്സനെ പരിചയപ്പെട്ടതെന്നും, ഹരിപ്പാട്ടെ ആയുര്വേദ ആശുപത്രിയില് തനിക്ക് മോന്സന് ചികിത്സ ഏര്പ്പാടാക്കിയെന്നും ശ്രീനിവാസന് പറഞ്ഞു.
താനറിയാതെ ആശുപത്രിയിലെ പണവും നല്കി. മോന്സന് തട്ടിപ്പുകാരനെന്ന് അറിഞ്ഞില്ല. പിന്നീടൊരിക്കലും കണ്ടിട്ടുമില്ലെന്ന് ശ്രീനിവാസന് വ്യക്തമാക്കി.
മാത്രമല്ല, മോന്സനെതിരെ പരാതി നല്കിയവരില് രണ്ടു പേരും തട്ടിപ്പുകാരാണെന്നു ശ്രീനിവാസന് ആരോപിച്ചു. അവരെ തനിക്ക് നേരിട്ടറിയാം. സ്വന്തം അമ്മാവനില്നിന്നു കോടികള് തട്ടിയെടുത്തയാളാണ് ഒരാള്. പണത്തിനോട് ആത്യാര്ത്തിയുള്ളവരാണ് മോന്സന് പണം നല്കിയത്. സിനിമയെടുക്കുന്നതിനായി തന്റെ സുഹൃത്തിന് പലിശയില്ലാതെ അഞ്ച് കോടി രൂപ മോന്സന് വാഗ്ദാനം ചെയ്തിരുന്നതായും ശ്രീനിവാസന് വെളിപ്പെടുത്തി.