ന്യൂഡല്ഹി: സംസ്ഥാനത്ത് തിങ്കളാഴ്ച മുതല് ആരംഭിക്കാനിരുന്ന പ്ലസ് വണ് പരീക്ഷ സുപ്രീംകോടതി സ്റ്റേ ചെയ്തു. കോവിഡ് സാഹചര്യം വിലയിരുത്തിയല്ല പരീക്ഷ നടത്താന് സംസ്ഥാന സര്ക്കാര് തീരുമാനിച്ചത് എന്ന് ചൂണ്ടിക്കാട്ടിയാണ് സുപ്രീംകോടതിയുടെ നടപടി.
കേരളത്തിലെ കോവിഡ് സാഹചര്യം ഭീതിജനകമെന്നും സുപ്രീംകോടതി നിരീക്ഷിച്ചു. ഈ മാസം 13 വരെയാണ് സ്റ്റേ ചെയ്തിരിക്കുന്നത്.
പ്ലസ് വണ് പരീക്ഷ ഓഫ്ലൈന് ആയി നടത്താനുള്ള സര്ക്കാര് തീരുമാനത്തിനെതിരെ ആറ്റിങ്ങല് കോടതിയില് പ്രാക്ടീസ് ചെയ്യുന്ന അഭിഭാഷകനും കോണ്ഗ്രസ് കടയ്ക്കാവൂര് മണ്ഡലം പ്രസിഡന്റുമായ റസൂല് ഷാനാണ് സുപ്രീം കോടതിയില് ഹര്ജി നല്കിയത്. ജസ്റ്റിസ് എ.എം. ഖാന്വില്ക്കര് അധ്യക്ഷനായ ബെഞ്ചാണ് ഹര്ജി പരിഗണിച്ചത്.
സംസ്ഥാനത്തെ ടി.പി.ആര്. നിരക്ക് 15 ശതമാനത്തില് അധികമാണ്. രാജ്യത്തെ മൊത്തം കോവിഡ് കേസുകളില് അമ്പത് ശതമാനത്തില് അധികം കേരളത്തിലാണ്. പ്ലസ് വണ് പരീക്ഷ എഴുതുന്ന വിദ്യാര്ഥികള് വാക്സിന് സ്വീകരിച്ചവരല്ല. മോഡല് പരീക്ഷ ഓണ്ലൈന് ആയാണ് നടത്തിയത്. ഇനി രണ്ടാമത് ഒരു പരീക്ഷ ആവശ്യമില്ലെന്നും ഹര്ജിയില് ചൂണ്ടിക്കാട്ടുന്നു.