കൊച്ചി: കോവിഡ് കാലത്ത് ഓണ്ലൈന് പഠനത്തിനു വിദ്യാര്ത്ഥികള്ക്ക് സഹായവുമായി താരസംഘടന അമ്മയും. പഠനസൗകര്യമില്ലാത്ത വിദ്യാര്ത്ഥികള്ക്ക് അമ്മ ടാബുകള് വിതരണം ചെയ്തു. നടന് മോഹന്ലാലിന്റെ നേതൃത്വത്തില് ‘ഒപ്പം അമ്മയും’ എന്ന പദ്ധതിയിലൂടെയാണ് വിദ്യാര്ത്ഥികള്ക്ക് ടാബുകള് നല്കിയത്.
കേരളത്തിലെ 14 ജില്ലകളില് നിന്നും സാമ്പത്തികമായി പിന്നോക്കം നില്ക്കുന്ന 100 വിദ്യാര്ത്ഥികളെ തിരഞ്ഞെടുത്താണ് മൊബൈല് റീറ്റെയ്ല് കമ്പനിയായ ‘ഫോണ് 4’ മായി സഹകരിച്ച് പദ്ധതി നടപ്പിലാക്കിയിരിക്കുന്നത്. കൊച്ചി കലൂരിലെ അമ്മയുടെ ആസ്ഥാന മന്ദിരത്തില് വെച്ചാണ് ചടങ്ങു നടന്നത്. അമ്മ സംഘടന പ്രസിഡന്റായ മോഹന്ലാലാണ് ടാബുകള് വിതരണം ചെയ്തത്.
കൂടാതെ, ‘അമ്മയുടെ’ ഔദ്യോഗിക യൂട്യൂബ് ചാനലിന്റെ ഉത്ഘാടനവും, മുതിര്ന്ന നടി കവിയൂര് പൊന്നമ്മയെ ആദരിക്കലും സംഘടനയുടെ ഓണാഘോഷവും നടന്നു.