കച്ച്: ലോകത്തിലെ ഏറ്റവും സമ്പന്നമായ ഗ്രാമം ഇന്ത്യയിൽ. കേൾക്കുമ്പോൾ അതിശയം തോന്നുമെങ്കിലും ഇത് സത്യം തന്നെയാണ്. ഗുജറാത്തിലുള്ള കച്ച് ജില്ലയിലെ മദാപ്പർ ഗ്രാമമാണ് ഏറ്റവും സമ്പന്നമായ ഗ്രാമം. ഈ ഗ്രാമത്തിൽ മാത്രം 17 ബാങ്കുകളാണ് പ്രവർത്തിക്കുന്നത്. ഇവിടെ ജീവിക്കുന്നവരുടെ നിക്ഷേപം 5,000 കോടി വരുമെന്നാണ് കണക്കാക്കപ്പെടുന്നത്. 7,600 വീടുകളാണ് ഇവിടെയുള്ളത്. ഈ ഗ്രാമത്തിലെ ഒരാളുടെ ശരാശരി ബാങ്ക് നിക്ഷേപം 15 ലക്ഷം രൂപയാണ്.
ബാങ്കുകൾക്ക് പുറമേ സ്കൂളുകളും, കോളേജുകളും, ഡാമുകളും, ആശുപത്രികളും എല്ലാം നിറഞ്ഞതാണ് ഈ ഗ്രാമം. ഗ്രാമത്തിലെ എല്ലാ വീട്ടിൽ നിന്നും ആരെങ്കിലും വിദേശത്ത് ജോലി ചെയ്യുന്നു എന്നതാണ് ഈ ഗ്രാമീണർക്ക് ഇത്രയും പണം ലഭിക്കാൻ കാരണം. യുകെ, യുഎസ്എ, ആഫ്രിക്ക, ഗൾഫ് തുടങ്ങിയ ഇടങ്ങളിലാണ് ഈ ഗ്രാമത്തിലുള്ളവർ ജോലി ചെയ്യുന്നത്. ഈ ഗ്രാമത്തിലെ 65 ശതമാനം പേർ എൻആർഐകളാണെന്ന് തന്നെ പറയാം. വിദേശത്ത് ജോലി ചെയ്യുന്നവർ അവരുടെ കുടുംബാംഗങ്ങൾക്കും ബന്ധുക്കൾക്കും പണം അയക്കും. ഇതിനോടൊപ്പം വിദേശത്തെ ജോലി മതിയാക്കി ഇവിടെ വന്ന് സംരംഭം തുടങ്ങിയവരുമുണ്ട്.
മദാപ്പർ വില്ലേജ് അസോസിയേഷൻ ലണ്ടനിൽ ആരംഭിച്ചുവെന്ന് പറയുമ്പോൾ വിദേശത്തെ ഈ ഗ്രാമത്തിന്റെ പിടിപാട് എത്രത്തോളം ഉണ്ടെന്ന് മനസിലാകും. ഇതേ അസോസിയേഷന്റെ ഒരു ഘടകം ഗ്രാമത്തിലും പ്രവർത്തിക്കുന്നുണ്ട്. പൂർണ്ണമായും വിദേശത്ത് കുടിയേറിയവർ പോലും ഈ ഗ്രാമത്തിലെ ബാങ്കുകളിൽ തങ്ങളുടെ ബന്ധുക്കൾ വഴി നിക്ഷേപം നടത്തുന്നുണ്ട്.