ന്യൂഡൽഹി: ഇലക്ട്രിക് വാഹനങ്ങൾക്ക് രജിസ്ട്രേഷൻ സർട്ടിഫിക്കറ്റ് നൽകുന്നതിനോ, പുതുക്കുന്നതിനോ ഇനി പ്രത്യേകം ഫീസ് അടക്കേണ്ടതില്ല. കേന്ദ്ര സർക്കാരാണ് ഇതുംസംബന്ധിച്ച ഉത്തരവ് പുറപ്പെടുവിച്ചത്. രാജ്യത്ത് ഇലക്ട്രിക് വാഹനങ്ങളുടെ ഉപയോഗം വർധിപ്പിക്കുന്നതിന് കൂടുതൽ പിന്തുണ നൽകുന്നതിന്റെ ഭാഗമായാണ് സർക്കാരിന്റെ നടപടി.
ഇലക്ട്രിക് വാഹനങ്ങളെ ഇത്തരം ഫീസിൽ നിന്ന് ഒഴിവാക്കണമെന്ന് റോഡ് ഗതാഗത മന്ത്രാലയം പുറത്തിറക്കിയ വിജ്ഞാപനത്തിൽ വ്യക്തമാക്കുന്നു. ഇലക്ട്രിക് വാഹനങ്ങളെ പുതുതായി വാങ്ങുന്ന വാഹനങ്ങൾ രജിസ്റ്റർ ചെയ്യുന്നതിന് ഈടാക്കുന്ന ഫീസുകളിൽ നിന്നും ഒഴിവാക്കിയിട്ടുണ്ടെന്നാണ് വിവരം. കേന്ദ്രത്തിന്റെ ഈ തീരുമാനം ഇലക്ട്രിക് വാഹന വിപണിക്ക് കരുത്തേകുമെന്നാണ് വിലയിരുത്തൽ. ഇലക്ട്രിക് വാഹനങ്ങൾ വാങ്ങുമ്പോൾ സബ്സിഡി ഉൾപ്പെടെയുള്ള ആനുകൂല്യങ്ങളും സർക്കാർ പ്രഖ്യാപിച്ചിട്ടുണ്ട്.
ഇലക്ട്രിക് വാഹനങ്ങൾക്ക് ഓരോ സംസ്ഥാനങ്ങളും നൽകുന്ന സബ്സിഡിയും അടിസ്ഥാന സൗകര്യ വികസനവും പ്രതിപാദിക്കുന്ന ഇലക്ട്രിക് വാഹന നയങ്ങളും തയ്യാറാക്കിയിട്ടുണ്ട്.