ന്യൂഡൽഹി: കാർഷിക ബില്ലിനെതിരെ സമരം നടത്തുന്നവർക്കെതിരെ വിമർശനവുമായി കേന്ദ്രമന്ത്രി മീനാക്ഷി ലേഖി. സമരം നടത്തുന്നത് കർഷകരല്ലെന്നും തെമ്മാടികളാണെന്നും മീനാക്ഷി ലേഖി ആരോപിച്ചു. ഡൽഹി ജന്തർ മന്തറിൽ നടന്ന സമരത്തിനിടെ മാദ്ധ്യമ പ്രവർത്തകനുനേരെ ആക്രമണമുണ്ടായ സംഭവത്തിൽ പ്രതികരിച്ച് സംസാരിക്കുകയായിരുന്നു മീനാക്ഷി ലേഖി.
സമരത്തിന്റെ മറവിൽ അവർ ചെയ്യുന്നത് കുറ്റകൃത്യങ്ങളാണ്. അവർ കർഷകരല്ല, തെമ്മാടികളാണ്. ഇതിന് പ്രതിപക്ഷം പ്രചാരണം നൽകുന്നുവെന്നും മീനാക്ഷി ലേഖി കുറ്റപ്പെടുത്തി.
അതേസമയം മന്ത്രിയുടെ പരാമർശത്തിനെതിരെ വിമർശനവുമായി ഭാരതീയ കിസാൻ യൂണിയൻ നേതാവ് രാകേഷ് ടിക്കായത്ത് രംഗത്തെത്തി. കർഷകർ അന്നദാതാക്കളാണെന്നും തെമ്മാടികളെന്ന് വിളിക്കുന്നത് ശരിയല്ലെന്നും അദ്ദേഹം വിമർശിച്ചു. കാർഷിക നിയമങ്ങൾക്ക് എതിരെയുള്ള പ്രതിഷേധത്തിന്റെ ഭാഗമായാണ് കർഷക സംഘടനകൾ ജന്തർ മന്തറിൽ ‘കർഷക പാർലമെന്റി’ന് തുടക്കം കുറിച്ചത്. ജന്തർ മന്തറിൽ 200 കർഷകരെ പങ്കെടുപ്പിച്ച് കൊണ്ടാണ് കാർഷിക സംഘടനകൾ പ്രതിഷേധം സംഘടിപ്പിച്ചിരിക്കുന്നത്.