ന്യൂഡൽഹി: ബോളിവുഡ് നടൻ ആമിർ ഖാനും കിരൺ റാവുവും വിവാഹമോചിതരായി. പതിനഞ്ച് വർഷത്തെ ദാമ്പത്യ ജീവിത ജീവിതം അവസാനിപ്പിച്ചാണ് ആമിർ ഖാനും കിരൺ റാവുവും വേർപിരിഞ്ഞത്. ഔദ്യേഗിക വാർത്താക്കുറിപ്പിലൂടെ താരങ്ങൾ തന്നെയാണ് വിവാഹ മോചനത്തിന്റെ വിവരം പുറത്തു വിട്ടത്. ജീവിതത്തിലെ പുതിയൊരു അധ്യായത്തിലേയ്ക്ക് കടക്കുകയാണെന്നും ഭർത്താവ്-ഭാര്യ എന്നീ സ്ഥാനങ്ങൾ ഇനി ഇല്ലെന്നുമാണ് ആമിർ ഖാനും കിരൺ റാവുവും അറിയിച്ചിരിക്കുന്നത്.
വിവാഹമോചനം നേടുന്നതിനെ കുറിച്ച് ഏറെ നാളായി ചിന്തിച്ചിരുന്നുവെന്നും എന്നാൽ ഇപ്പോഴാണ് അതിനുള്ള സമയമായതെന്നും താരങ്ങൾ വ്യക്തമാക്കുന്നു. വിവാഹബന്ധം അവസാനിപ്പിച്ചെങ്കിലും മകൻ ആസാദിന് നല്ല മാതാപിതാക്കളായി എന്നും നിലകൊള്ളുമെന്നും ഒരുമിച്ച് തന്നെ കുഞ്ഞിനെ വളർത്തുമെന്നും ഇരുവരും പറയുന്നുണ്ട്. പുതിയ ജീവിതത്തിന്റെ തുടക്കമാണ് വിവാഹ മോചനമെന്നും കുറിപ്പിൽ വിശദമാക്കുന്നു.
അടുത്തിടെയാണ് ആമിർ ഖാനും കിരൺ റാവുവും തങ്ങളുടെ വിവാഹ വാർഷികം ആഘോഷിച്ചത്. 2005 ലാണ് ഇരുവരും വിവാഹിതരായത്. നടി റീന ദത്തയുമായി വേർപിരിഞ്ഞ ശേഷമാണ് ആമീർ ഖാൻ കിരൺ റാവുവിനെ വിവാഹം ചെയ്യുന്നത്.