ന്യൂഡൽഹി: കോവിഡ് പ്രതിരോധത്തിൽ നിർണായക നേട്ടം കരസ്ഥമാക്കി ഭാരത് ബയോടെക്. ഐസിഎംആറിന്റെ സഹകരണത്തോടെ ഭാരത് ബയോടെക് വികസിപ്പിച്ച കോവാക്സിൻ കോവിഡ് വൈറസ് തടയുന്നതിൽ 78 ശതമാനത്തോളം ഫലപ്രദമാണെന്ന് മൂന്നാംഘട്ട പരീക്ഷണഫലങ്ങളിൽ വ്യക്തമായി.
കോവിഡ് വൈറസിനെതിരെ വാക്സിൻ 77.8 ശതമാനം ഫലപ്രദമാണെന്നാണ് ഭാരത് ബയോടെക് അറിയിച്ചിരിക്കുന്നത്. ഡെൽറ്റ വകഭേദത്തിനെതിരെ വാക്സിൻ 65.2 ശതമാനവും ഫലപ്രദമാണെന്നും ഭാരത് ബയോടെക് വിശദമാക്കി.
സാധാരണ ലക്ഷണങ്ങൾക്കെതിരെ 77.8 ശതമാനം ഫലപ്രാപ്തിയും ഗുരുതര ലക്ഷണങ്ങൾക്കെതിരെ 93.4 ശതമാനം ഫലപ്രാപ്തിയുമാണ് ഭാരത് ബയോടെക് അവകാശപ്പെടുന്നത്. പാർശ്വഫലങ്ങൾ ഉണ്ടാകാനുള്ള സാധ്യത 0.5 ശതമാനത്തിൽ താഴെയാണ്.
25,798 പേരിലാണ് ഭാരത് ബയോടെക് 2020 നവംബർ 16 നും 2021 ജനുവരി 7 നുമിടയിൽ വാക്സിൻ പരീക്ഷണങ്ങൾ നടത്തിയത്.