തിരുവനന്തപുരം: ഫെഫ്ക്കയുടെ കോവിഡ് സാന്ത്വന പദ്ധതിയിലേക്ക് സംഭാവന നൽകി നടൻ പൃഥ്വിരാജ്. മൂന്ന് ലക്ഷം രൂപയാണ് പൃഥ്വിരാജ് ഫെഫ്ക്കയിലേക്ക് സംഭാവന നൽകിയത്. കോവിഡ് സാന്ത്വന പദ്ധതിയിലേക്ക് സംഭാവന നൽകിയതിന് ഫെഫ്ക ജനറൽ സെക്രട്ടറി ബി ഉണ്ണികൃഷ്ണൻ പൃഥ്വിരാജിന് നന്ദി അറിയിച്ചു. സംഘടനയെ പ്രതിനിധീകരിച്ചാണ് ബി ഉണ്ണികൃഷ്ണൻ പൃഥ്വിരാജിന് നന്ദി പറഞ്ഞത്.
കോവിഡ് വൈറസ് വ്യാപനത്തിന്റെ പശ്ചാത്തലത്തിൽ ഫെഫ്കയ്ക്കു കീഴിലുള്ള 19 യൂണിയനുകളിൽ അംഗങ്ങളായ മലയാള ചലച്ചിത്ര പ്രവർത്തകർക്കായി ബൃഹത്തായ സഹായ പദ്ധതികളാണ് സംഘടന പ്രഖ്യാപിച്ചിരിക്കുന്നത്. ആശുപത്രിയിൽ അഡ്മിറ്റ് ആയ കൊവിഡ് ബാധിതർക്ക് ധനസഹായം, കോവിഡ് മെഡിക്കൽ കിറ്റ്, അംഗങ്ങൾക്കും കുടുംബാംഗങ്ങൾക്കും ജീവൻ രക്ഷാ മരുന്നുകളുടെ സൗജന്യ വിതരണം, കുട്ടികളുടെ പഠന സാമഗ്രികൾ വാങ്ങാനുള്ള ധനസഹായം, കോവിഡ് മൂലം മരണമടയുന്ന അംഗങ്ങളുടെ കുടുംബത്തിന് അമ്പതിനായിരം രൂപയുടെ സഹായം, ആവശ്യമെങ്കിൽ ആശ്രിതർക്ക് സംഘടനാ അംഗത്വം, ജോലി തുടങ്ങിയ സഹായങ്ങളാണ് ഫെഫ്ക്ക നൽകാനൊരുങ്ങുന്നത്.
ഇതിനായുള്ള അപേക്ഷകൾ ഫെഫ്ക്ക അംഗങ്ങൾക്ക് അതാത് സംഘടനകളുടെ മെയിൽ ഐഡിയിലേക്ക് അയക്കാം. കല്യാൺ ഗ്രൂപ്പ് സ്ഥാപകൻ ടി എസ് കല്യാണരാമൻ, ബിഗ് ബ്രദർ സിനിമയുടെ നിർമ്മാതാവ് ഫിലിപ്പോസ് കെ ജോസഫ് തുടങ്ങിയവരും ഫെഫ്ക്കയിലേക്ക് സംഭാവന നൽകിയിരുന്നു.