ന്യൂയോർക്ക്: കോവിഡ് വൈറസ് എന്ന മഹാമാരിക്കതിരെയുള്ള പോരാട്ടത്തിലാണ് ലോകരാജ്യങ്ങൾ. ഓരോ ദിവസവും കോവിഡിനെ കുറിച്ച് ഞെട്ടിക്കുന്ന വിവരങ്ങളാണ് പുറത്തു വന്നു കൊണ്ടിരിക്കുന്നത്. കോവിഡ് ശ്വാസകോശത്തെ മാത്രമല്ല തലച്ചോറിനെയും ബാധിക്കുമെന്നാണ് പുറത്തു വന്നിരിക്കുന്ന ഏറ്റവും പുതിയ പഠനം.
ബുദ്ധിശക്തിയുമായി ബന്ധപ്പെട്ട തലച്ചോറിന്റെ ഭാഗമായ ഗ്രേ മാറ്ററിനെ ചുരുക്കാൻ കോവിഡിന് കഴിയുമെന്നാണ് നാഡീരോഗ വിദഗ്ദ്ധർ വ്യക്തമാക്കുന്നത്. കോവിഡ് രോഗം രൂക്ഷമായി ഓക്സിജൻ തെറാപ്പി വേണ്ടി വന്നവർക്ക് ഗ്രേ മാറ്റർ സ്ഥിതിചെയ്യുന്ന തലച്ചോറിന്റെ മുൻഭാഗം കാര്യമായി ചുരുങ്ങിയിരിക്കുന്നത് സ്കാനിംഗിൽ കണ്ടെത്താനായെന്നും വിദഗ്ധർ പറയുന്നു. ജോർജിയ യൂണിവേഴ്സിറ്റി നടത്തിയ പഠനത്തിലാണ് ഇക്കാര്യങ്ങൾ വെളിപ്പെടുത്തിയിരിക്കുന്നത്.
ന്യൂറോബയോളജി ഓഫ് സ്ട്രെസ് എന്ന മെഡിക്കൽ ജേണലിലാണ് പഠനം പ്രസിദ്ധീകരിച്ചിരിക്കുന്നത്. ഏറെനാൾ ഓക്സിജൻ തെറാപ്പി വേണ്ടിവന്നവർക്കും വെന്റിലേറ്ററിൽ കഴിഞ്ഞവർക്കും ഭാവിയിൽ നാഡീസംബന്ധമായ പ്രശ്നങ്ങൾ കൂടുതലായി ഉണ്ടാകാൻ സാദ്ധ്യതയുണ്ടെന്നാണ് വിദഗ്ധർ പറയുന്നത്.
വിവരങ്ങളുടെ ക്രോഡീകരണത്തിന്റെയും ഓർമ്മ, ചലനശേഷി, വികാരങ്ങൾ എന്നിവയുടെ നിയന്ത്രണയത്തിന്റെയും കേന്ദ്രമാണ് ഗ്രേ മാറ്ററുകൾ. ഇവ നേരാംവണ്ണം പ്രവർത്തിക്കാതെ വരുന്നത് മൂലം കുഴപ്പങ്ങൾ ഉണ്ടാകാനുള്ള സാധ്യതയുണ്ട്. രക്താതിസമ്മർദ്ദവും, അമിതവണ്ണവും തലച്ചോറിന് മറ്റ് പ്രശ്നങ്ങളും ഉണ്ടായിരുന്നവർക്ക് ഈ പ്രശ്നങ്ങൾ ഉണ്ടാകാനുള്ള സാധ്യതയുണ്ടെന്ന് പദ്മശ്രീ ജേതാവ് ഡോ.ബി.എൻ ഗംഗാധർ വ്യക്തമാക്കി. തലച്ചോറിൽ ഗ്രേമാറ്റർ പൊതുവിൽ കുറഞ്ഞവർക്ക് കടുത്ത മൂഡ് വ്യതിയാനങ്ങളും ഉത്കണ്ഠാ രോഗങ്ങളും ഉണ്ടാകാനിടയുണ്ട്. ഈ അവസ്ഥയാകും കോവിഡ് വന്നുപോയവർക്ക് ഉണ്ടാകാനിടയുള്ളതെന്ന് ഗംഗാധർ പറഞ്ഞു.
അസാധാരണ ലക്ഷണങ്ങൾ കാണുന്നവർ ഉടൻ ഡോക്ടറെ കാണണമെന്നാണ് വിദഗ്ധരുടെ ഉപദേശം. തലച്ചോറിനുണ്ടാകുന്ന പ്രശ്നങ്ങൾ പരിഹരിക്കാൻ പരമാവധി സ്ട്രെസ് കുറയ്ക്കാൻ ശ്രദ്ധിക്കണം. രക്തസമ്മർദ്ദവും പ്രമേഹവും നിയന്ത്രിക്കണം. പസിലുകൾ പോലുളളവ ഉപയോഗിച്ച് തലച്ചോറിന്റെ ശക്തി വർദ്ധിപ്പിക്കുകയും പ്രോട്ടീൻ അടങ്ങിയ ഭക്ഷണം കഴിക്കുകയും വേണം. പഴങ്ങൾ, പച്ചക്കറികൾ എന്നിവ കൂടുതലായി ഭക്ഷണത്തിൽ ഉൾപ്പെടുത്തണം. 8 മുതൽ 9 മണിക്കൂർ വരെ കൃത്യമായി ഉറങ്ങാനും ശ്രദ്ധിക്കണമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു.