അഹമ്മദാബാദ്: സർദാർ വല്ലഭായി പട്ടേലിന്റെ ഏകതാ പ്രതിമ സ്ഥിതി ചെയ്യുന്ന കെവാദിയ നഗരത്തിന് മറ്റൊരു നേട്ടം കൂടി. രാജ്യത്തെ ആദ്യ ഇലക്ട്രിക് വാഹന നഗരം എന്ന സവിശേഷത സ്വന്തമാക്കിയിരിക്കുകയാണ് നർമ്മദാ ജില്ലയിലെ കെവാദിയ. പ്രധാനമന്ത്രി നരേന്ദ്ര മോദിയാണ് കെവാദിയ ഇലക്ട്രിക് വാഹനങ്ങൾ മാത്രമോടുന്ന നഗരമാകുമെന്ന് പ്രഖ്യാപിച്ചത്. പരിസ്ഥിതി ദിനത്തിലായിരുന്നു അദ്ദേഹത്തിന്റെ പ്രഖ്യാപനം.
ഘട്ടംഘട്ടമായി കെവാദിയ നഗരം ഇലക്ട്രിക് വാഹങ്ങൾ മാത്രമോടുന്ന നഗരമായി മാറുമെന്നായിരുന്നു അദ്ദേഹത്തിന്റെ വാക്കുകൾ. അന്തരീക്ഷ മലിനീകരണം കുറയ്ക്കുക എന്ന ലക്ഷ്യത്തോടെയാണ് പുതിയ നടപടി ആരംഭിക്കാനൊരുങ്ങുന്നത്. ലോകത്തിലെ ഏറ്റവും ഉയരം കൂടിയ പ്രതിമയായ ഏകതാ പ്രതിമ കെവാദിയയിലാണ് സ്ഥിതി ചെയ്യുന്നത്. ഗുജറാത്തിലെ പ്രധാന വിനോദസഞ്ചാര കേന്ദ്രങ്ങളിലൊന്നായ ഏകതാ പ്രതിമ സന്ദർശിക്കാൻ ആയിരക്കണക്കിന് ആളുകളാണ് കെവാദിയയിൽ എത്തുന്നത്.
ഇനി മുതൽ സന്ദർശകരുമായി കെവാദിയയിലേക്ക് എത്തുന്ന ബസുകൾ ഇലക്ട്രിക്കായിരിക്കണം എന്നാണ് പുതിയ നിർദ്ദേശം. കെവാദിയയുടെ ചുമതലയുള്ള ടൂറിസം വകുപ്പായിരിക്കണം പദ്ധതിയുടെ ഏകോപന ചുമതല നിർവ്വഹിക്കേണ്ടത്. ഗുജറാത്ത് ഊർജ വികസന ഏജൻസിയുടെ സഹായവും ഉണ്ടാകും.
കെവാദിയയിൽ ജോലി ചെയ്യുന്നവർക്ക് ഇലക്ട്രിക് വാഹനങ്ങൾ വാങ്ങാൻ വായ്പയും സബ്സിഡിയും നൽകുമെന്നും അധികൃതർ അറിയിച്ചിട്ടുണ്ട്. 50 ഇലക്ട്രിക് ഓട്ടോകളുള്ള കമ്പനികൾക്ക് പ്രവർത്തനാനുമതി നൽകുമെന്നും തദ്ദേശീയരായ സ്ത്രീകൾക്ക് ഇ ഓട്ടോറിക്ഷകൾക്ക് വായ്പ നൽകുമെന്നും അധികൃതർ വ്യക്തമാക്കിയിട്ടുണ്ട്. സ്ത്രീകളെ ഓട്ടോറിക്ഷ ഓടിക്കാൻ പരിശീലിപ്പിക്കാനും തീരുമാനമായി.