അഹമ്മദാബാദ്: ഐ.പി.എല്‍ ഫൈനലിന് ഇനി ഒരുപകലിന്റെ കാത്തിരിപ്പ് മാത്രം. പതിനാറാം സീസണിലെ കിരീടാവകാശിയെ ഇന്ന് രാത്രിയറിയാം. അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ രാത്രി 7. 30 മുതലാണ് ധോണിയുടെ ചെന്നൈ സൂപ്പര്‍ കിംഗ്‌സും ഹാര്‍ദിക്കിന്റെ ഗുജറാത്ത് ടൈറ്റന്‍സും തമ്മിലുള്ള ഫൈനല്‍ പോരാട്ടം.
ഈ സീസണിലെ ആദ്യ മത്സരത്തില്‍ ഗുജറാത്തും ചെന്നൈയും തമ്മിലായിരുന്നു ഏറ്റുമുട്ടിയത്. അഹമ്മദാബാദ് തന്നെയായിരുന്നു വേദി. ആ മത്സരത്തില്‍ ഗുജറാത്ത് അഞ്ച് വിക്കറ്റിന് ജയിച്ചിരുന്നു. 14 മത്സരത്തില്‍ നിന്ന് 20 പോയിന്റുമായി ഗുജറാത്ത് ലീഗ് ഘട്ടത്തില്‍ ഒന്നാമതായാണ് ഫിനിഷ് ചെയ്തത്. ഇത്രയും മത്സരങ്ങളില്‍ നിന്ന് 17 പോയിന്റുമായി ചെന്നൈ പോയിന്റ് ടേബിളില്‍ രണ്ടാം സ്ഥാനത്തായിരുന്നു. എന്നാല്‍ ആദ്യ പ്ലേ ഓഫില്‍ ക്വാളിഫയര്‍ 1ല്‍ ഗുജറാത്തിനെ 15റണ്‍സിന് കീഴടക്കി ചെന്നൈ ഫൈനലുറപ്പിച്ചു. പിന്നീട് ക്വാളിഫയര്‍ 2 വില്‍ മുംബയ്യെ 62 റണ്‍സിന് കീഴടക്കിയാണ് ഗുജറാത്ത് ഫൈനലിന് ടിക്കറ്റെടുത്തത്.