തിരുവനന്തപുരം: ഡല്ഹിയിലെ കേരളത്തിന്റെ പ്രത്യേക പ്രതിനിധിയും മുന് കേന്ദ്രമന്ത്രിയുമായ കെ വി തോമസിന് പ്രതിമാസം ഒരു ലക്ഷം രൂപ ഓണറേറിയം നല്കാന് മന്ത്രിസഭായോഗത്തില് തീരുമാനമായി. രണ്ട് അസിസ്റ്റന്റുമാര്, ഒരു ഓഫീസ് അറ്റന്ഡന്റ്, ഒരു ഡ്രൈവര് എന്നിവരെ നിയമിക്കാനും അനുമതി നല്കി.
മന്ത്രിസഭായോഗത്തിലെ പ്രധാന തീരുമാനങ്ങള് ഇവ
തസ്തിക
കേരള വെറ്ററിനറി ആന്ഡ് അനിമല് സയന്സസ് സര്വ്വകലാശാലയുടെ കീഴില് പുതുതായി ആരംഭിച്ച ഡയറി സയന്സ് കോളേജുകളില് 69 അദ്ധ്യാപക തസ്തികകളും 20 അനദ്ധ്യാപക തസ്തികകളും സൃഷ്ടിക്കും.കെ. ആര്. നാരായണന് ഇന്സ്റ്റിറ്റ്യൂട്ട് ഓഫ് വിഷ്വല് സയന്സ് ആന്റ് ആര്ട്ട്സില് അഡ്മിനിസ്ട്രേറ്റീവ് ഓഫീസറുടെ തസ്തിക താല്ക്കാലികമായി സൃഷ്ടിക്കും. അണ്ടര് സെക്രട്ടറിയുടെ റാങ്കിലുള്ള ഉദ്യോഗസ്ഥനെ അന്യത്ര സേവന വ്യവസ്ഥയില് നിയമിക്കും.
പ്ലസ് വണ് പ്രവേശനം
സംസ്ഥാനത്തെ ഹയര് സെക്കന്ഡറി സ്കൂളുകളിലെ 2023-24 വര്ഷത്തെ പ്ലസ് വണ് ഏകജാലക പ്രവേശനത്തിന് 2022-23 ല് അനുവദിച്ച 81 താല്ക്കാലിക ബാച്ചുകള് തുടരാനും മാര്ജിനല് സീറ്റ് വര്ദ്ധനവിനും മന്ത്രിസഭായോഗം അനുമതി നല്കി.
പത്മ പുരസ്ക്കാരം: ശുപാര്ശ ചെയ്യേണ്ടവരെ കണ്ടെത്താന് പരിശോധനാ സമിതി
2024ലെ പത്മ പുരസ്ക്കാരങ്ങള്ക്ക് ശുപാര്ശ ചെയ്യേണ്ടവരെ കണ്ടെത്തി പരിഗണിച്ച് അന്തിമ രൂപം നല്കുന്നതിന് പ്രത്യേക പരിശോധനാ സമിതി (മന്ത്രിസഭാ ഉപസമിതി) രൂപീകരിക്കും.മന്ത്രി സജി ചെറിയാന് കണ്വീനറും ചീഫ് സെക്രട്ടറി സെക്രട്ടറിയുമായ സമിതിയില് മന്ത്രിമാരായ കെ. രാജന്, കെ. കൃഷ്ണന്കുട്ടി, എ. കെ. ശശീന്ദ്രന്, അഡ്വ. ആന്റണി രാജു, റോഷി അഗസ്റ്റിന്, അഹമ്മദ് ദേവര്കോവില് എന്നിവര് അംഗങ്ങളാകും.
സര്ക്കാര് ഗ്യാരന്റി
കേരളാ സ്റ്റേറ്റ് ടെക്സ്റ്റൈല് കോര്പ്പറേഷന്റെ യൂണിറ്റ് മില്ലുകളായ കോട്ടയം ടെക്സ്റ്റൈല്സിനും പ്രഭുറാം മില്ലിനും വേണ്ടി സ്റ്റേറ്റ് ബാങ്ക് ഓഫ് ട്രാവന്കൂറില് (ഇപ്പോള് സ്റ്റേറ്റ് ബാങ്ക് ഓഫ് ഇന്ത്യ) നിന്നും കടമെടുത്ത 1.80 കോടി രൂപയുടെ പ്രവര്ത്തനമൂലധന വായ്പയുടെ സര്ക്കാര് ഗ്യാരന്റി കാലയളവ് വ്യവസ്ഥകള്ക്കു വിധേയമായി 01.01.2023 മുതല് രണ്ടു വര്ഷത്തേക്കു കൂടി നീട്ടും.
യുദ്ധസ്മാരകം നിര്മ്മിക്കുന്നതിന് ഭരണാനുമതി
തിരുവനന്തപുരത്ത് യുദ്ധസ്മാരകം നിര്മ്മിക്കുന്നതിന് 8,08,70,000 രൂപയ്ക്ക് ഭരണാനുമതി നല്കി.
നിയമനം
വനം വന്യജീവി വകുപ്പില് സൂപ്പര് ന്യൂമററി തസ്തികയില് ഫോറസ്റ്റ് വാച്ചറായി ജോലി നോക്കവെ കാട്ടാനയുടെ ആക്രമത്തില് മരണപ്പെട്ട ബി. ബൊമ്മന്റെ മകനായ ബി. ജയരാജന് വനം വകുപ്പില് ഫോറസ്റ്റ് വാച്ചര് ( സ്പെഷ്യല് റിക്രൂട്ട്മെന്റ്) തസ്തികയില് സൂപ്പര് ന്യൂമററി തസ്തിക സൃഷ്ടിച്ച് നിയമനം നല്കാന് തീരുമാനിച്ചു.
ശമ്പള പരിഷ്ക്കരണ ആനുകൂല്യം
കൃഷി വകുപ്പിന്റെ അധീനതയിലുള്ള പൊതുമേഖലാ സ്ഥാപനമായ ഓയില് പാം ഇന്ത്യ ലിമിറ്റഡിന്റെ നിയന്ത്രണത്തിലുള്ള വെച്ചൂര് മോഡേണ് റൈസ് മില്ലിലെ സ്ഥിരം ജീവനക്കാര്ക്ക് ഒമ്പതും പത്തും ശമ്പള പരിഷ്കരണം അനുവദിക്കാന് തീരുമാനിച്ചു.