വാഷിംഗ്ടണ്: ട്വിറ്റര് മേധാവി ഇലോണ് മസ്ക് നരേന്ദ്രമോദിയെ ട്വിറ്ററില് ഫോളോ ചെയ്യാന് ആരംഭിച്ചതാണ് സോഷ്യല് മീഡിയയില് ഇപ്പോള് ചര്ച്ചയാകുന്നത്. ഇലോണ് ഫോളോ ചെയ്യുന്ന 195 പേരില് മോദിയുടെ പേരും ഉണ്ടെന്ന് കാണിക്കുന്നുണ്ട്. ഇതിന്റെ ഒരു സ്ക്രീന് ഷോട്ട് ഇന്നലെ ട്വിറ്ററില് പ്രചരിച്ചിരുന്നു.
ട്വിറ്ററില് ഏറ്റവും കൂടുതല് ആളുകള് ഫോളോ ചെയ്യുന്ന വ്യക്തിയാണ് മസ്ക്. 134.3 മില്യണ് ആളുകളാണ് മസ്കിനെ ഫോളോ ചെയ്യുന്നത്. മോദിയെ ട്വിറ്ററില് ഫോളോ ചെയ്യുന്നവരുടെ എണ്ണം 87.7 മില്യണാണ്. മോദിയെ എലോണ് മസ്ക് ട്വിറ്ററില് ഫോളോ ചെയ്യുന്ന വിവരം ‘ എലോണ് അലേര്ട്ട്സ്’ എന്ന ട്വിറ്റര് അക്കൗണ്ട് ആണ് പുറത്തുവിട്ടത്. ഇവരാണ് എലോണിന്റെ ട്വിറ്റര് അക്കൗണ്ട് കൂടുതലായി നിരീക്ഷിക്കുന്നത്.
ഇത് പ്രചരിച്ചതോടെ പലരും കമന്റുകളുമായി രംഗത്തെത്തി. രാജ്യത്തിന്റെ വികസനത്തിന്റെ ചര്ച്ചയ്ക്ക് ട്വിറ്ററില് തുടക്കമായിയെന്നാണ് പലരുടെയും കമന്റ്. ടെസ്ല ഉടന് തന്നെ ഇന്ത്യയില് എത്തുമെന്നതിന്റെ സൂചനയാണ് ഇതെന്നും ചിലര് അവകാശപ്പെട്ടു. ടെസ്ലയുടെ ഒരു ഫാക്ടറി ഇന്ത്യയില് പ്രതീക്ഷിക്കാമോ എന്നും പലരും ട്വിറ്ററില് ചോദിക്കുന്നുണ്ട്.