തിരുവനന്തപുരം: രാജ്യവ്യാപകമായി ബിജെപി നേതാക്കള് ക്രിസ്ത്യന് മതസ്ഥാപനങ്ങളും പുരോഹിതന്മാരെയും സന്ദര്ശിക്കുന്നതിനെതിരെ സിപിഎം സംസ്ഥാന സെക്രട്ടേറിയറ്റ്. ന്യൂനപക്ഷ ജനവിഭാഗങ്ങളെ ആന്തരിക ഭീഷണിയായി പ്രഖ്യാപിച്ച സംഘപരിവാര് അവരെ കൂടെനിര്ത്താന് നടത്തുന്ന പ്രവര്ത്തനങ്ങള് അങ്ങേയറ്റം പരിഹാസ്യമാണെന്ന് സിപിഎം പ്രസ്താവനയില് വ്യക്തമാക്കി.
സിപിഎം പ്രസ്താവന
‘ആര്എസ്എസിന്റെ താത്വിക ഗ്രന്ഥമായ വിചാരധാരയില് ആന്തരിക ഭീഷണിയായി പ്രഖ്യാപിച്ചവരാണ് ക്രിസ്ത്യാനികള് ഉള്പ്പെടെയുള്ള ന്യൂനപക്ഷ ജനവിഭാഗങ്ങളും കമ്യൂണിസ്റ്റുകാരും. അതുകൊണ്ടുതന്നെയാണ് ന്യൂനപക്ഷ ജനവിഭാഗങ്ങള്ക്ക് നേരെയും കമ്യൂണിസ്റ്റുകാര്ക്കെതിരെയും അക്രമപരമ്പര തന്നെ രാജ്യത്ത് അരങ്ങേറിയത്. ഗ്രഹാംസ്റ്റേയിന്സിനെ പോലെയുള്ളവരെ ചുട്ടുകൊന്നതും ഹിന്ദുത്വവാദികളാണ്. കഴിഞ്ഞ ക്രിസ്മസ് ആഘോഷവേളയില് രാജ്യത്തെമ്പാടും വമ്പിച്ച ആക്രമണമാണ് കന്യാസ്ത്രീകള് ഉള്പ്പെടെയുള്ളവര്ക്ക് നേരെയുണ്ടായത്. ഛത്തിസ്ഗഡിലുണ്ടായ ആക്രമണ പരമ്പരയ്ക്ക് അന്ത്യമായിട്ടുമില്ല. ഈ ഘട്ടത്തിലാണ് ക്രിസ്ത്യന് മതസ്ഥാപനങ്ങളും പുരോഹിതന്മാരെയും സന്ദര്ശിക്കുന്ന പരിപാടിയുമായി പ്രധാനമന്ത്രി തൊട്ടുള്ള ബിജെപി നേതാക്കള് രംഗത്തിറങ്ങിയിരിക്കുന്നത്. ബിജെപിയുടെ നിലപാട് അറിയാവുന്ന പ്രബുദ്ധരായ കേരള ജനത ഇത് തിരിച്ചറിയുക തന്നെ ചെയ്യും. സംഘപരിവാറിന്റെ രാഷ്ട്രീയ നിലപാടുകള് ആപല്കരമാണെന്ന് തിരിച്ചറിഞ്ഞ് ക്രിസ്ത്യന് ന്യൂനപക്ഷ ജനവിഭാഗങ്ങള് തന്നെ പ്രക്ഷോഭരംഗത്തിറങ്ങിയിട്ട് ദിവസങ്ങളായിട്ടേയുള്ളൂ. പല സംസ്ഥാനങ്ങളിലും പ്രതിപക്ഷ നേതാക്കളെ തങ്ങളുടെ വരുതിയില് കൊണ്ടുവരാന് സംഘപരിവാര് ഉപയോഗിച്ച ഭീഷണിയും പ്രലോഭനവും ക്രിസ്ത്യന് ന്യൂനപക്ഷ വിഭാഗങ്ങളോടും ആരംഭിച്ചിരിക്കുകയാണ്. അരമനകള് തോറുമുള്ള ബിജെപി നേതാക്കളുടെ യാത്രകള് ഇതിന് അടിവരയിടുന്നതാണ്. ശക്തമായ മതനിരപേക്ഷ കാഴ്ചപ്പാടുള്ള കേരള ജനത ഈ നാടകങ്ങളെ അവജ്ഞയോടെ തള്ളിക്കളയും.’