2019 ല് ‘എല്ലാ കള്ളന്മാര്ക്കും മോദി എന്ന കുടുംബപ്പേര്’ പരാമര്ശം നടത്തിയതിന്റെ പേരിലാണ് സൂറത്ത് വെസ്റ്റില് നിന്നുള്ള ബിജെപി എംഎല്എയും മുന് ഗുജറാത്ത് മന്ത്രിയുമായ പൂര്ണേഷ് മോദി നല്കിയ പരാതിയില് രാഹുല് ഗാന്ധിക്കെതിരെ ഐപിസി 499, 500 പ്രകാരം കേസെടുത്തിരിക്കുന്നത്. രാഹുല് ഗാന്ധിയുടെ പരാമര്ശങ്ങള് ഇതിനു മുമ്പും വിവാദങ്ങളായി മാറിയിട്ടുണ്ട്.
‘ആര്എസ്എസ് മഹാത്മാഗാന്ധിയെ കൊന്നു’: 2014 ല് മഹാത്മാഗാന്ധിയുടെ കൊലപാതകത്തിന് പിന്നില് ആര്എസ്എസാണെന്ന് താനെയിലെ ഭിവണ്ടി ടൗണ്ഷിപ്പില് നടത്തിയ പ്രസംഗത്തില് രാഹുല് ഗാന്ധി ആരോപിച്ചിരുന്നു. തുടര്ന്ന് സംഘടനയുടെ പ്രതിച്ഛായ തകര്ക്കാന് തെറ്റായ പ്രസ്താവനകള് നടത്തിയെന്ന് ആരോപിച്ച്, രാഷ്ട്രീയ സ്വയംസേവക സംഘത്തിന്റെ പ്രാദേശിക പ്രവര്ത്തകര് പൊലീസില് പരാതി നല്കി. പരാതിയില് രാഹുലിനെതിരെ കേസെടുത്തു. 2018ല് ഈ കേസില് ഗാന്ധിക്കെതിരെ കോടതി കുറ്റം ചുമത്തിയെങ്കിലും, പിന്നീട് വെറുതെ വിട്ടു.
‘ചൗക്കിദാര് ചോര് ഹേ’: പ്രധാനമന്ത്രി മോദിയെ റഫാല് യുദ്ധവിമാന ഇടപാട് അഴിമതിയില് വിമര്ശിച്ചുകൊണ്ട് ‘ചൗക്കിദാര് ചോര് ഹേ (പിഎം മോദി കള്ളനാണെന്ന്) എന്ന് രാഹുല് ഗാന്ധി പറഞ്ഞിരുന്നു. പിന്നീട് സുപ്രീംകോടതി ‘ചൗക്കിദാര് ചോര് ഹേ’ എന്ന രാഷ്ട്രീയ മുദ്രാവാക്യം തടഞ്ഞു. ശേഷവും പരാമര്ശം തുടര്ന്ന രാഹുലിനെതിരെ കോടതിയലക്ഷ്യ നടപടി ആവശ്യപ്പെട്ട് ബിജെപി എംപി മീനാക്ഷി ലേഖി സുപ്രീം കോടതിയെ സമീപിച്ചു. പിന്നീട് പരമോന്നത കോടതിയില് രാഹുല് നിരുപാധികം മാപ്പ് പറഞ്ഞു.
‘റേപ്പ് ഇന് ഇന്ത്യ’: പ്രധാനമന്ത്രി നരേന്ദ്ര മോദി ‘മേക്ക് ഇന് ഇന്ത്യ’ എന്ന് പറഞ്ഞെങ്കിലും ഇന്ന് നമ്മള് കാണുന്നത് ‘റേപ്പ് ഇന് ഇന്ത്യ’ ആണെന്ന് പറഞ്ഞ രാഹുല് ഗാന്ധി മറ്റൊരു വിവാദത്തിന് ജാര്ഖണ്ഡില് തെരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കവെ തിരികൊളുത്തി. ‘ജാര്ഖണ്ഡില് സ്ത്രീകള് ബലാത്സംഗത്തിനിരയാകുന്നു. ഉത്തര്പ്രദേശില് ബിജെപി എംഎല്എ (കുല്ദീപ് സെന്ഗര്) ഒരു സ്ത്രീയെ ബലാത്സംഗം ചെയ്തു. എല്ലാ സംസ്ഥാനങ്ങളിലും എല്ലാ ദിവസവും ബലാത്സംഗങ്ങള് നടക്കുന്നു.’ബേട്ടി ബച്ചാവോ, ബേട്ടി പഠാവോ’ (പെണ്കുട്ടികളെ സംരക്ഷിക്കുക, അവരെ പഠിപ്പിക്കുക) എന്നും പ്രധാനമന്ത്രി മോദി പറഞ്ഞിരുന്നു, എന്നാല് പെണ്മക്കളെ ആരില് നിന്നാണ് സംരക്ഷിക്കേണ്ടതെന്ന് മോദി പറഞ്ഞില്ല. ബിജെപി എംഎല്എമാരില് നിന്ന് അവരെ സംരക്ഷിക്കേണ്ടതുണ്ടോ?’ – മോദി സര്ക്കാരിനെയും ബിജെപിയെയും കടന്നാക്രമിച്ച് രാഹുല് ഗാന്ധി പറഞ്ഞു. പരാമര്ശം ജനങ്ങളുടെ വികാരം വ്രണപ്പെടുത്തിയെന്ന് ചൂണ്ടിക്കാട്ടി ഒരു സാമൂഹിക പ്രവര്ത്തകന് രാഹുല് ഗാന്ധിക്കെതിരെ പരാതി നല്കി.
‘രക്ത ബ്രോക്കറേജ്’: സൈന്യത്തിന്റെ ഭീകരവിരുദ്ധ ഓപ്പറേഷനില് നിന്ന് രാഷ്ട്രീയ മുതലെടുപ്പ് നടത്താന് ശ്രമിച്ചുകൊണ്ട് പ്രധാനമന്ത്രി നരേന്ദ്ര മോദി ‘ഖൂന് കി ദലാലി’ നടത്തുകയാണെന്ന് രാഹുല് ഗാന്ധി 2016-ല് പറഞ്ഞിരുന്നു. തീവ്രവാദികള്ക്കെതിരായ സര്ജിക്കല് സ്ട്രൈക്കിനെ താന് പിന്തുണയ്ക്കുന്നുവെന്നും എന്നാല് രാഷ്ട്രീയ പോസ്റ്ററുകളിലും പ്രചാരണങ്ങളിലും ഇന്ത്യന് സൈന്യത്തെ ഉപയോഗിക്കുന്നതിനെ താന് ഒരിക്കലും അംഗീകരിക്കില്ലെന്നും ഗാന്ധി സഖാവ് പിന്നീട് തന്റെ ട്വിറ്ററില് ഒരു വിശദീകരണം നല്കി.
അമിത് ഷാ കൊലക്കേസ് പ്രതി: 2019 മെയ് മാസത്തില് ജബല്പൂരില് നടന്ന ലോക്സഭാ പ്രചാരണ പ്രസംഗത്തിനിടെ കേന്ദ്ര ആഭ്യന്തര മന്ത്രി അമിത് ഷായെ കൊലക്കേസ് പ്രതിയെന്ന് പരാമര്ശിച്ചതിന് രാഹുല് ഗാന്ധിക്കെതിരെ കേസെടുത്തിരുന്നു. 2015-ല് സൊഹ്റാബുദ്ദീന് ഷെയ്ഖ് വ്യാജ ഏറ്റുമുട്ടല് കേസിലെ പ്രതിയാണ് ഷായെന്ന് രാഹുല് ആരോപിച്ചു. കോണ്ഗ്രസ് നേതാവിന്റെ പരാമര്ശം അപകീര്ത്തികരമാണെന്ന് ആരോപിച്ച് അമിത് ഷാ പരാതി നല്കി.