കോട്ടയം: നിയമബിരുദധാരികളായ പട്ടികജാതി വിഭാഗത്തിൽപ്പെട്ടവർക്ക് ജ്വാല പദ്ധതിയുടെ ഭാഗമായി പട്ടികജാതി വികസന വകുപ്പിൽ ഇന്റേൺഷിപ്പിന് അവസരം. രണ്ട് വർഷത്തേക്ക് താൽക്കാലിക നിയമനമാണ്. എൽ.എൽ.ബി./എൽ.എൽ.എം. യോഗ്യതയുളളവരും എൻറോൾമെന്റ് നടപടിക്രമങ്ങൾ പൂർത്തിയാക്കിയവരുമായവർക്ക് അപേക്ഷിക്കാം.
ജാതി, വിദ്യാഭ്യാസ യോഗ്യത, പ്രായം എന്നിവ തെളിയിക്കുന്ന സർട്ടിഫിക്കറ്റ്, എൻറോൾമെന്റ് സർട്ടിഫിക്കറ്റ് എന്നിവ സഹിതം നിശ്ചിത മാതൃകയിലുളള പ്രൊഫോർമ പൂർത്തീകരിച്ച് അപേക്ഷ സമർപ്പിക്കണം.
ജില്ലാ കോടതികളിലെയും, സ്പെഷ്യൽ കോടതികളിലെയും ഗവൺമെന്റ് പ്ലീഡർ ഓഫീസുകൾ, ജില്ലാ ലീഗൽ സർവീസ് അതോറിറ്റി, കിർത്താഡ്സ്, ഗവൺമെന്റ് സെക്രട്ടേറിയറ്റ് എന്നിവിടങ്ങളിൽ ഇന്റേൺഷിപ്പ് ആഗ്രഹിക്കുന്നവർ ബന്ധപ്പെട്ട സ്ഥാപനങ്ങൾ സ്ഥിതിചെയ്യുന്ന അതാത് ജില്ലാ പട്ടികജാതി വികസന ഓഫീസുകളിലാണ് അപേക്ഷിക്കേണ്ടത്. ഹൈക്കോടതി, അഡ്വക്കേറ്റ് ജനറൽ ഓഫീസിൽ ഇന്റേൺഷിപ്പ് ആഗ്രഹിക്കുന്നവർ ഡയറക്ടർ, പട്ടികജാതി വികസന വകുപ്പ്, നന്ദാവനം, വികാസ് ഭവൻ പി.ഒ., തിരുവനന്തപുരം – 33 എന്ന വിലാസത്തിൽ അപേക്ഷിക്കണം. പ്രതിമാസം 20000 രൂപ ഓണറേറിയമായി ലഭിക്കും. വിശദവിവരത്തിന് ഫോൺ: 0481 2562503. ഒരു വ്യക്തിക്ക് ഏതെങ്കിലും ഒരു ജില്ലയിലേക്കോ ഹെക്കോടതി അഡ്വക്കേറ്റ് ജനറൽ ഓഫീസിലേക്കോ ഏപ്രിൽ 20നകം അപേക്ഷിക്കാം.