തൃശൂര്: കേരളത്തിലെ മാന്ഹോളുകളിലെ അഴുക്കും മാലിന്യങ്ങളും വൃത്തിയാക്കാന് ഇനി റോബോട്ടിക് സംവിധാനം. ബാന്ഡ്കൂറ്റ് എന്ന പേരിലുള്ള റോബോട്ടിക് മെഷീന്റെ ഉദ്ഘാടനം ഇന്നലെ മന്ത്രി റോഷി അഗസ്റ്റിന് ഗുരുവായൂരില് നിര്വ്വഹിച്ചു. ഇതോടെ മാന്ഹോളുകള് വൃത്തിയാക്കാന് സമ്ബൂര്ണ യന്ത്ര സഹായം ഒരുക്കുന്ന ആദ്യ സംസ്ഥാനമായി കേരളം.
മെഷീന്റെ പ്രവര്ത്തനം സംസ്ഥാനമാകെ വ്യാപിക്കുമെന്നും നിലവിലുള്ള എല്ലാ അഴുക്കുചാലുകളും വൃത്തിയാക്കാന് റോബോട്ടിക് മെഷീന് ഉപയോഗിക്കുമെന്നും മന്ത്രി റോഷി അഗസ്റ്റിന് പറഞ്ഞു. അടുത്തിടെ കേരള സ്റ്റാര്ട്ടപ്പ് മിഷന് സംഘടിപ്പിച്ച ഹഡില് ഗ്ലോബല് 2022 കോണ്ക്ലേവില് ജെന്റോബോട്ടിക്സിന് കേരള പ്രൈഡ് അവാര്ഡ് ലഭിച്ചിരുന്നു.
അതേസമയം, ടെക്നോ പാര്ക്ക് സ്റ്റാര്ട്ട് അപ്പ് സംരംഭമായ ജെന്റോബോട്ടിക്സാണ് റോബോര്ട്ടിക് മെഷീന് വികസിപ്പിച്ചെടുത്തത്. മാന്ഹോളുകളിലേക്ക് ആഴ്ന്നിറങ്ങി മനുഷ്യരുടെ കൈകൊണ്ട് വൃത്തിയാക്കുന്നതു പോലെ ഇവയും ചെയ്യും. എന്നാല്, മെഷീനുകള് വാട്ടര്പ്രൂഫ് ആണെന്നതാണ് മറ്റൊരു പ്രത്യേകത. എച്ച് ഡി ക്യാമറകള് ഘടിപ്പിച്ചിട്ടുണ്ട്. സെന്സറുകള് കൊണ്ട് മാന്ഹോളുകളിലുള്ള വിഷവാതകവും കണ്ടു പിടിക്കാനാവും. രാജ്യത്തെ 17 സംസ്ഥാനങ്ങളിലുള്ള വിവിധ നഗരങ്ങളിലും കേന്ദ്രഭരണ പ്രദേശങ്ങളിലുമൊക്കെ മാന്ഹോളുകള് വൃത്തിയാക്കുന്നതിന് റോബോട്ടിക് മെഷീനുകള് തന്നെയാണ് ഉപയോഗിച്ചു വരുന്നത്.