തിരുവനന്തപുരം: സംസ്ഥാനത്ത് ഡോക്ടറുടെ കുറിപ്പടിയില്ലാതെ ആന്റിബയോട്ടിക്കുകള് വില്ക്കുന്ന ഫാര്മസികളുടെ ലൈസന്സ് റദ്ദാക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. കര്സാപ്പ് (കേരള ആന്റി മൈക്രോബിയല് റെസിസ്റ്റന്സ് സ്ട്രാറ്റജിക് ആക്ഷന് പ്ലാന്) വാര്ഷിക അവലോകന യോഗത്തില് സംസാരിക്കുകയായിരുന്നു മന്ത്രി.
യോഗത്തിലെ പ്രധാന തീരുമാനങ്ങള്
‘കേരളത്തിലെ ആന്റിബയോട്ടിക് പ്രതിരോധത്തിന്റെ തോത് അറിയാനും അതനുസരിച്ച് പ്രതിരോധ പ്രവര്ത്തനങ്ങള് ക്രോഡീകരിക്കാനുമായി ഇന്ത്യയിലാദ്യമായി ആന്റി ബയോഗ്രാം (എഎംആര് സര്വെയലന്സ് റിപ്പോര്ട്ട്) പുറത്തിറക്കിയിരുന്നു. ഇതനുസരിച്ച് പല രോഗാണുക്കളിലും ആന്റിബയോട്ടിക് പ്രതിരോധത്തിന്റെ തോത് കൂടിവരുന്നതായി കണ്ടെത്തിയ സാഹചര്യത്തിലാണ് കര്ശന നടപടി സ്വീകരിക്കാന് തീരുമാനിച്ചത്.
മനുഷ്യരില് മാത്രമല്ല, മൃഗപരിപാലനം, കോഴിവളര്ത്തല്, മത്സ്യകൃഷി തുടങ്ങിയവയിലും കൂടുതലായി അശാസ്ത്രീയമായി ആന്റി ബയോട്ടിക്കുകള് ഉപയോഗിക്കുന്നതായി കണ്ടെത്തിയിട്ടുണ്ട്. പരിസ്ഥിതിയില് നിന്നും ശേഖരിച്ച സാമ്പിളുകളിലും ആന്റിബയോട്ടിക്കുകളെ പ്രതിരോധിക്കാന് കഴിവുള്ള ബാക്ടീരിയകളേയും ജീനുകളേയും ആന്റിബയോട്ടിക് അംശവും കണ്ടെത്തിയിട്ടുണ്ട്. ആന്റിബയോട്ടിക് പ്രതിരോധം കൂടാനുള്ള ഒരു മുഖ്യ കാരണമായി വിലയിരുത്തിയത് ഡോക്ടറുടെ കുറിപ്പടിയില്ലാതെ ഫാര്മസികളില് നിന്നും നേരിട്ട് ആന്റിബയോട്ടിക്കുകള് വാങ്ങി കഴിക്കുന്നതു കൊണ്ടാണ്. അത് കര്ശനമായി വിലക്കിക്കൊണ്ടുള്ള നടപടിയാണ് ഇനി ആരോഗ്യ വകുപ്പ് സ്വീകരിക്കുക.
ആന്റിബയോട്ടിക് സാക്ഷരതയ്ക്കുള്ള പ്രവര്ത്തനങ്ങള് ഊര്ജിതപ്പെടുത്തുന്നതിന്റെ ഭാഗമായി മാധ്യമങ്ങളുടെ പിന്തുണയോടെ അവബോധവും ശക്തിപ്പെടുത്തും.
കാര്ബപെനം മരുന്നുകളെ പ്രതിരോധിക്കാന് കഴിവുള്ള രക്തത്തിലുള്ള അണുബാധകളെ പ്രത്യേകം നോട്ടിഫയബിള് കണ്ടീഷനാക്കി പ്രഖ്യാപിക്കുന്നത് പരിശോധിക്കും.
കേരളത്തിലെ ഏത് ആശുപത്രിയിലും കാര്ബപെനം മരുന്നുകളെ പ്രതിരോധിക്കാന് കഴിവുള്ള രക്തത്തിലുള്ള അണുബാധ കണ്ടെത്തിക്കഴിഞ്ഞാല് അത് ആരോഗ്യ വകുപ്പിനെ അറിയിക്കണം.
ശ്രദ്ധിക്കാം…
- മിക്ക അണുബാധകളും വൈറസ് മൂലമാണ് ഉണ്ടാകുന്നത്. അതിനാല് ഇവയ്ക്കെതിരെ ആന്റിബയോട്ടിക്കുകള് ഫലപ്രദമല്ല.
- ഡോക്ടറുടെ നിര്ദ്ദേശാനുസരണം മാത്രമേ ആന്റിബയോട്ടിക്കുകള് ഉപയോഗിക്കാവൂ.
- ഒരിക്കലും ആന്റിബയോട്ടിക്കുകള് ആവശ്യപ്പെടുകയോ ഡോക്ടറുടെ കുറിപ്പടി ഇല്ലാതെ വാങ്ങി കഴിക്കുകയോ ചെയ്യരുത്.
- ചികിത്സ കഴിഞ്ഞു ശേഷിക്കുന്ന ആന്റിബയോട്ടിക്കുകള് ഒരിക്കലും ഉപയോഗിക്കരുത്.
- ശേഷിക്കുന്നതോ കാലഹരണപ്പെട്ടതോ ആയ ആന്റിബയോട്ടിക്കുകള് കരയിലോ ജലാശയങ്ങളിലോ വലിച്ചെറിയരുത്.
- രോഗശമനം തോന്നിയാല് പോലും ഡോക്ടര് നിര്ദേശിച്ച കാലയളവിലേക്ക് ആന്റിബയോട്ടിക് ചികിത്സ പൂര്ത്തിയാക്കണം.
- ആന്റിബയോട്ടിക്കുകള് ഒരിക്കലും മറ്റുള്ളവരുമായി പങ്കിടാന് പാടില്ല.
- അണുബാധ തടയുന്നതിന് പതിവായി കൈ കഴുകുക.
- രോഗികളുമായുളള സമ്പര്ക്കം ഒഴിവാക്കുക.
- പ്രതിരോധ കുത്തിവയ്പുകള് കാലാനുസൃതമായി എടുക്കുക.