മുംബൈ: പുതിയ ഫീച്ചറുകളുമായി രംഗത്തെത്തിയിരിക്കുകയാണ് നെറ്റ്ഫ്ളിക്സ്. നെറ്റ്ഫ്ളിക്സ് അക്കൗണ്ടിന്റെ പാസ്വേര്ഡ് നാം സുഹൃത്തുക്കളുമായി പങ്കുവെക്കാറുണ്ട്. എന്നാല്, ഇനി പാസ്വേര്ഡ് പങ്കിടുന്നതിന് നിരക്കും ഈടാക്കിയേക്കും. ചിലി, കോസ്റ്റാറിക്ക, പെറു എന്നീ രാജ്യങ്ങളില് രണ്ട് പുതിയ സവിശേഷതകള് പരീക്ഷിക്കുമെന്ന് നെറ്റ്ഫ്ളിക്സ് അറിയിച്ചിരുന്നു. പിന്നീട് മറ്റെല്ലാ പ്രദേശങ്ങളിലേക്കും വന്നേക്കാം. എന്നാല്, നെറ്റ്ഫ്ളിക്സ് ഇത് സംബന്ധിച്ച് ഔദ്യോഗിക അറിയിപ്പ് നല്കിയിട്ടില്ല.
അക്കൗണ്ട് പങ്കിടുന്നത് തടയുന്നതിനായി രണ്ട് സവിശേഷതകളാണ് നെറ്റ്ഫ്ളിക്സ് അവതരിപ്പിക്കുന്നത്.
പുതിയ അംഗത്തെ ചേര്ക്കുക: സ്റ്റാന്ഡേര്ഡ്, പ്രീമിയം പ്ലാനുകളനുസരിച്ച് ഉപയോക്താവിന് സ്വന്തം പ്രൊഫൈലില് ഒപ്പം താമസിക്കുന്നതല്ലാത്ത രണ്ട് പേരെ വരെ ഉപ-അക്കൗണ്ടുകളായി ചേര്ക്കാന് കഴിയും. ഉപ അക്കൗണ്ടുകള്ക്ക് സ്വന്തമായി ലോഗ് ഇന് ഐഡിയും പാസ്വേഡും ഉണ്ടായിരിക്കും. ഇതിന്റെ നിരക്കുകള് കുറവായിരിക്കും. ചിലിയില് 2,380 സിഎല്പിയാണ് വില. ഇന്ത്യയില് ഏകദേശം 225 രൂപയായിരിക്കുമിത്.
പ്രൊഫൈല് പുതിയ അക്കൗണ്ടിലേക്ക് മാറ്റുക: ബേസിക്, സ്റ്റാന്ഡേര്ഡ്, പ്രീമിയം പ്ലാനുകളിലെ അംഗങ്ങള്ക്ക് അവരുടെ അക്കൗണ്ട് പങ്കിടുന്ന ആളുകളെ ഒരു പുതിയ അക്കൗണ്ടിലേക്കോ അല്ലെങ്കില് ഒരു അധിക അംഗത്വ ഉപ അക്കൗണ്ടിലേക്കോ മാറ്റാന് കഴിയും. ആമസോണ് പ്രൈം വീഡിയോ, ഡിസ്നി പ്ലസ് ഹോട്സ്റ്റാര്, സോണി ലൈവ് എന്നീ ഒടിടി പ്ലാറ്റ്ഫോമുകളോട് മത്സരിക്കാന് ആകര്ഷകമായ ഓഫറുകള് നെറ്റ്ഫ്ളിക്സ് ഉപയോക്താക്കള്ക്കായി അവതരിപ്പിച്ചിരുന്നു.

