തിരുവനന്തപുരം: സംസ്ഥാനത്തെത്തുന്ന അന്താരാഷ്ട്ര യാത്രക്കാര്ക്കുള്ള മാര്ഗനിര്ദേശങ്ങള് പുറപ്പെടുവിച്ച് ആരോഗ്യവകുപ്പ്. എല്ലാ അന്താരാഷ്ട്ര യാത്രക്കാരും കേരളത്തില് താമസിക്കുന്ന കാലയളവ് പരിഗണിക്കാതെ സ്വയം രോഗനിരീക്ഷണം നടത്തുകയും, ലക്ഷണങ്ങളുണ്ടെങ്കില് ആര്ടിപിസിആര് പരിശോധന നടത്തേണ്ടതുമാണെന്ന് മന്ത്രി വീണാ ജോര്ജ് അറിയിച്ചു. വിമാനത്തിലെ അന്താരാഷ്ട്ര യാത്രക്കാരില് എയര്ലൈന് ജീവനക്കാര് കണ്ടെത്തുന്ന രണ്ട് ശതമാനം പേര്ക്ക് റാന്ഡം പരിശോധന നടത്തുന്നതാണെന്നും, പരിശോധനയുടെ ചെലവ് സംസ്ഥാനം വഹിക്കുന്നതാണെന്നും മന്ത്രി വ്യക്തമാക്കി.
കേരളത്തിലെത്തിച്ചേരുന്ന തിയ്യതി മുതല് അന്താരാഷ്ട്ര യാത്രക്കാര് ഏഴ് ദിവസത്തേക്ക് സ്വയം ആരോഗ്യ നിരീക്ഷണം തുടരുകയും രോഗലക്ഷണങ്ങള് ഉണ്ടായാല് പരിശോധനയ്ക്ക് വിധേയമാക്കുകയും വേണം. കര്ശനമായ കൊവിഡ് മാര്ഗനിര്ദേശങ്ങള് പാലിക്കണം. ഈ കാലയളവില് അടച്ചിട്ട ഇടങ്ങളില് ഒത്തുകൂടുന്നതും ആള്ക്കൂട്ടമുള്ള സ്ഥലങ്ങളും ഒഴിവാക്കണം. കൊവിഡ് പോസിറ്റീവായ എല്ലാ അന്താരാഷ്ട്ര യാത്രക്കാരുടെയും സാമ്പിളുകള് ജനിതക പരിശോധനയ്ക്കായി അയക്കും. കൊവിഡ് പോസിറ്റീവായ യാത്രക്കാരുടെ ചികിത്സ നിലവിലുള്ള മാര്ഗനിര്ദ്ദേശങ്ങള് അനുസരിച്ച് ചെയ്യുന്നതാണ്. എത്തിച്ചേരുന്ന എട്ടാം ദിവസം റാപ്പിഡ് ആന്റിജന് ടെസ്റ്റ് ഉപയോഗിച്ച് കൊവിഡ് പരിശോധന നടത്തുന്നത് യാത്രക്കാരുടെ സുരക്ഷയ്ക്ക് നല്ലതാണ്.
മുഖ്യമന്ത്രിയുടെ നേതൃത്വത്തില് കൂടിയ അവലോകന യോഗത്തിലാണ് ഇതുസംബന്ധിച്ച തീരുമാനമെടുത്തത്. എല്ലാ അന്താരാഷ്ട്ര യാത്രക്കാരും അവരുടെ സ്വന്തം സുരക്ഷയ്ക്കും കുടുംബത്തിന്റെയും സമൂഹത്തിന്റെയും സുരക്ഷയ്ക്കുമായി മാര്ഗ നിര്ദ്ദേശങ്ങള് കര്ശനമായി പാലിക്കണമെന്നും മന്ത്രി അഭ്യര്ത്ഥിച്ചു.