സ്റ്റോറികളിലെ ലിങ്ക് സ്റ്റിക്കര് ഫീച്ചറിലേക്ക് ആക്സസ് നല്കിയിരിക്കുകയാണ് ഇപ്പോള് ഇന്സ്റ്റഗ്രാം. ആദ്യം പരിമിതമായ അക്കൗണ്ടുകള്ക്കാണ് ഈ ഫീച്ചര് ഉപയോഗിക്കാന് അനുമതി നല്കിയത്. ഇപ്പോള് തങ്ങളുടെ എല്ലാ യൂസേഴ്സിനും ഈ ഫീച്ചറിലേക്ക് ആക്സസ് നല്കിയിരിക്കുകയാണ്.
‘സുഹൃത്തുക്കളുമായും കുടുംബാംഗങ്ങളുമായും പ്രാധാന്യമുള്ള കാര്യങ്ങള് പങ്കിടാന് അവര് ആഗ്രഹിക്കുന്നുവെന്ന് ഞങ്ങളുടെ വിവിധ കമ്മ്യൂണിറ്റികളില് അംഗമായവരില് നിന്ന് ഞങ്ങള് കേട്ടിട്ടുണ്ട്. പാചകം മുതല് സന്നദ്ധ സേവനം അല്ലെങ്കില് ഷോപ്പിങ് വരെ നിങ്ങള് എന്തുതന്നെ ചെയ്താലും, നിങ്ങളുടെ അക്കൗണ്ടിന്റെ വലിപ്പമോ ഫോളോവേഴ്സിന്റെ എണ്ണമോ കണക്കിലെടുക്കാതെ സ്റ്റോറികളില് പങ്കിടാന് നിങ്ങള്ക്ക് ഇപ്പോള് ഒരു ഇടമുണ്ട്,’ ഇന്സ്റ്റഗ്രാം അതിന്റെ ബ്ലോഗ് പോസ്റ്റില് കുറിച്ചു.
സ്റ്റിക്കറുകള് കൂടുതല് കസ്റ്റമൈസ് ചെയ്യാനുള്ള വഴികളും തങ്ങള് ആലോചിക്കുന്നതായി ഇന്സ്റ്റാഗ്രാം പറയുന്നു. ലിങ്കില് ടാപ്പ് ചെയ്യുമ്പോള് ഉപയോക്താക്കള്ക്ക് എന്തൊക്കെ കാണാന് കഴിയുമെന്ന് വ്യക്തമാകണം. സ്റ്റിക്കറുകളില് ഈ രീതിയിലുള്ള കസ്റ്റമൈസേഷനാണ് ഇന്സ്റ്റഗ്രാം ലക്ഷ്യമിടുന്നത്. സ്റ്റോറികളില് കണ്ടന്റ് ഇടുന്ന സമയത്ത് മുകളിലെ നാവിഗേഷന് ബാറില് നിന്ന് സ്റ്റിക്കര് ടൂള് ടാപ്പ് ചെയ്ത് ഈ ഫീച്ചര് ആക്സസ് ചെയ്യാന് കഴിയും.
ഇന്സ്റ്റഗ്രാം സ്റ്റോറികളില് ലിങ്ക് സ്റ്റിക്കറുകള് ചേര്ക്കുന്നത് എങ്ങനെ?
ഒരു ലിങ്ക് സ്റ്റിക്കര് ചേര്ക്കുന്നതിന്, ആദ്യം നിങ്ങളുടെ സ്റ്റോറിയിലേക്ക് കണ്ടന്റ് അപ്ലോഡ് ചെയ്യുക.
ശേഷം മുകളിലെ നാവിഗേഷന് ബാറില് നിന്ന് സ്റ്റിക്കര് ടൂള് സെലക്ട് ചെയ്യുക.
ലിങ്ക് സ്റ്റിക്കര് തെരഞ്ഞെടുക്കുക, നിങ്ങള്ക്ക് ആവശ്യമുള്ള ലിങ്കില് ഡ്രോപ്പ് ചെയ്ത ശേഷം ‘ഡണ്’ ഓപ്ഷനില് ടാപ്പ് ചെയ്യുക.
സ്റ്റോറിയില് എവിടെയാണോ സ്റ്റിക്കര് വേണ്ടത് അവിടെ സ്റ്റിക്കര് പ്ലേസ് ചെയ്യുക. കളര് വേരിയേഷനുകള് വേണമെങ്കില് അത് നല്കാനും ഓപ്ഷനുണ്ട്.