കാലം മാറി കഥ മാറി എന്നു പറയാറില്ലേ…അത് തന്നെയാണ് നമ്മുടെ നിത്യ ജീവിതത്തില് നടത്തുന്ന പണമിടപാടുകളുടെ കാര്യത്തിലും. ഓണ്ലൈന് പണമിടപാടുകള് ഇന്ന് നമ്മുടെ ജീവിതത്തിന്റെ ഭാഗമായി മാറിയിരിക്കുന്നു. മറ്റൊരാള്ക്ക് പണം അയക്കുന്നതോ ഓണ്ലൈന് ഷോപ്പിങ് നടത്തുന്നതോ തുടങ്ങി ഒട്ടുമിക്ക സാമ്പത്തിക ക്രയവിക്രയങ്ങളും ഓണ്ലൈനില് കൂടിയാണ് നാം ഇന്ന് നിര്വഹിക്കുന്നത്. പണ്ട് ബാങ്കുകളുടെ മുമ്പില് ക്യൂ നിന്ന് സാധിച്ചിരുന്ന മിക്ക കാര്യങ്ങളും ഇന്ന് ഓണ്ലൈനില് നടക്കും. അക്കൗണ്ട് തുടങ്ങാന് പോലും ബാങ്കില് നേരിട്ട് പോകേണ്ടതില്ലാത്ത സാഹചര്യമാണ് നിലവില് ഉള്ളത്.
2017ല് ആണ് ഗൂഗിള് അവരുടെ മൊബൈല് പേയ്മെന്റ് സേവനം ഗൂഗിള് ടെസ് ഇന്ത്യന് വിപണിയില് അവതരിപ്പിച്ചത്. പിന്നീട് കമ്പനി തങ്ങളുടെ പേയ്മെന്റ് സര്വീസിന്റെ പേര് ഗൂഗിള് പേ എന്നാക്കി മാറ്റി. ഉപയോക്താക്കള്ക്ക് പണം കൈമാറാന് ഐഎഫ്എസ്സി കോഡ് ആവശ്യമില്ല എന്നതാണ് ഗൂഗിള് പേയുടെ പ്രധാന സവിശേഷത. യുപിഐ അധിഷ്ഠിത സര്വീസില് നിങ്ങളുടെ ബാങ്ക് അക്കൗണ്ട് ലിങ്ക് ചെയ്താണ് ഉപയോഗിക്കുന്നത്. ഒന്നും ഒന്നില് അധികം ബാങ്ക് അക്കൗണ്ടുകളും ഇങ്ങനെ കണക്റ്റ് ചെയ്യാനാകും. ബാങ്ക് അക്കൗണ്ട് ലിങ്ക് ചെയ്യാന് ആദ്യം നിങ്ങളുടെ ഫോണില് ഗൂഗിള് പേയുടെ ഏറ്റവും പുതിയ പതിപ്പ് ഇന്സ്റ്റാള് ചെയ്യേണ്ടതുണ്ട്. ഇത്തരത്തില് ഗൂഗിള് പേയും ബാങ്ക് അക്കൗണ്ടും തമ്മില് ലിങ്ക് ചെയ്യുന്നത് എങ്ങനെ എന്ന് നോക്കാം.
ഗൂഗിള് പേ ബാങ്ക് അക്കൗണ്ടുമായി ലിങ്ക് ചെയ്യേണ്ടതെങ്ങനെ?
ആദ്യം തന്നെ നിങ്ങളുടെ ബാങ്ക് യുപിഐ സേവനങ്ങള് നല്കുന്നുണ്ടെന്ന് ഉറപ്പ് വരുത്തുക.
ശേഷം ഗൂഗിള് പേ ആപ്പ് തുറക്കുക. ബാങ്ക് അക്കൗണ്ട് ചേര്ക്കുന്നതിനായി നിങ്ങളുടെ ഡെബിറ്റ് കാര്ഡ് കൈവശം വെക്കുക.
നിങ്ങള് ഗൂഗിള് പേ ആപ്പിന്റെ ഏറ്റവും പുതിയ പതിപ്പാണ് ഉപയോഗിക്കുന്നത് എന്ന് ഉറപ്പാക്കുക. അല്ലെങ്കില് ആപ്ലിക്കേഷന് അപ്ഡേറ്റ് ചെയ്യുക.
ബാങ്ക് അക്കൗണ്ട് ചേര്ക്കാനുള്ള ഓപ്ഷന് കാണാന് കഴിയും ഇതില് ടാപ്പ് ചെയ്യുക തുടര്ന്ന് എല്ലാ ബാങ്കുകളുടെയും ഒരു ലിസ്റ്റ് നിങ്ങള്ക്ക് കാണാന് കഴിയും.
ലിസ്റ്റില് നിന്ന് നിങ്ങളുടെ ബാങ്ക് തിരഞ്ഞെടുക്കുക. ബാങ്ക് സ്ഥിരീകരണ പ്രക്രിയ സുഗമമായി നടക്കുന്നതിന് ബാങ്കില് രജിസ്റ്റര് ചെയ്തിരിക്കുന്ന അതേ നമ്പര് ഗൂഗിള് പേയിലും നല്കണം.
നിങ്ങളുടെ ബാങ്ക് തിരഞ്ഞെടുക്കുമ്പോള്, എസ്എംഎസ് വെരിഫിക്കേഷന് നടത്താന് നിങ്ങളുടെ മൊബൈല് നമ്പര് നല്കുക.
തുടര്ന്ന്, ഗൂഗിള് പേയില് നിങ്ങളുടെ മൊബൈല് നമ്പറുമായി ലിങ്ക് ചെയ്ത ബാങ്ക് അക്കൗണ്ട് കാണാന് കഴിയും. ശേഷം ‘തുടരുക’ എന്ന ഓപ്ഷനില് ടാപ്പ് ചെയ്യുക.
തുടര്ന്ന് നിങ്ങളുടെ ഡെബിറ്റ് കാര്ഡിന്റെ വിശദാംശങ്ങള് നല്കേണ്ട ഒരു അക്കൗണ്ട് സ്ഥിരീകരണ പേജ് കാണാന് കഴിയും.
സ്റ്റാര്ട്ട് ഓപ്ഷനില് ടാപ്പ് ചെയ്യുക, ഓണ്സ്ക്രീന് നിര്ദ്ദേശങ്ങള് പാലിച്ച് ഡെബിറ്റ് കാര്ഡിന്റെ അവസാന അക്കങ്ങള് നല്കുക.
ഗൂഗിള് പേ നിങ്ങളോട് ഒരു പിന് സൃഷ്ടിക്കാന് ആവശ്യപ്പെടും, ഓരോ തവണയും നിങ്ങള് പേയ്മെന്റ് നടത്തുമ്പോള് ഈ പിന് നല്കേണ്ടതുണ്ട്. ക്രിയേറ്റ് എ പിന് എന്ന ഓപ്ഷനില് ടാപ്പ് ചെയ്യുക.
നിങ്ങള്ക്ക് ഇഷ്ടമുള്ള പിന് നമ്പര് നല്കുക, നിങ്ങളുടെ ഫോണില് ഒരു ഓടിപി ലഭിക്കും. ഇത് എന്റര് ചെയ്ത ശേഷം ടിക്ക് ചിഹ്നത്തില് ടാപ്പ് ചെയ്യുക. ഇതോടെ നിങ്ങളുടെ ഗൂഗിള് പേയിലൂടെ ബാങ്കിങ് സേവനങ്ങള് ആസ്വദിക്കാനാകും.