ന്യൂഡൽഹി: കോവിഡ് മഹാമാരിയെ തുടർന്ന് താൽക്കാലികമായി നിർത്തിവച്ച പാർലമെന്റ് അംഗങ്ങളുടെ ലോക്കൽ പ്രാദേശിക വികസന പദ്ധതി (ഏരിയ ഡെവലപ്മെന്റ് സ്കീം- എംപിഎൽഎഡിഎസ്) പുനഃസ്ഥാപിക്കുന്നതിനും തുടരുന്നതിനും അംഗീകാരം. കേന്ദ്രമന്ത്രിസഭയാണ് ഇതുസംബന്ധിച്ച അനുമതി നൽകിയത്. 2021-22 സാമ്പത്തിക വർഷത്തിന്റെ ശേഷിക്കുന്ന ഭാഗത്തേക്ക് പദ്ധതി പുനഃസ്ഥാപിച്ചതായി കേന്ദ്രമന്ത്രിസഭാ യോഗത്തിൽ തീരുമാനമായി. 2025-26 വരെ ഈ പദ്ധതി തുടരും. വാർത്താവിതരണ പ്രക്ഷേപണ മന്ത്രി അനുരാഗ് താക്കൂറാണ് ഇക്കാര്യം അറിയിച്ചത്.
2021- 22 ലെ ശേഷിക്കുന്ന കാലയളവിലേക്ക് ഒരു എംപിക്ക് രണ്ട് കോടി രൂപ വീതം ഒരു ഗഡുവായി ഫണ്ട് അനുവദിക്കുമെന്നും മന്ത്രി വ്യക്തമാക്കി. 2022-23 മുതൽ 2025-26 വരെ ഓരോ എംപിമാർക്കും 2.5 കോടി രൂപ വീതമുള്ള രണ്ട് ഗഡുക്കളായി പ്രതിവർഷം അഞ്ചു കോടി രൂപ വീതം പദ്ധതിക്ക് കീഴിൽ ഫണ്ട് അനുവദിക്കുമെന്നും അദ്ദേഹം വിശദമാക്കി. നിലവിലെ പദ്ധതി പ്രകാരം, എംപിമാർക്ക് അവരുടെ മണ്ഡലങ്ങളിൽ ഓരോ വർഷവും അഞ്ചു കോടി രൂപ ചെലവിടുന്ന വികസന പരിപാടികൾ ശുപാർശ ചെയ്യാം. കഴിഞ്ഞ വർഷം ഏപ്രിൽ മാസത്തിലാണ് 2020-21, 2021-22 കാലയളവിൽ സർക്കാർ എംപിഎൽഎഡിഎസ് താൽക്കാലികമായി നിർത്തിവച്ചത്. ആരോഗ്യ സേവനങ്ങൾ കൈകാര്യം ചെയ്യുന്നതിനും രാജ്യത്ത് കോവിഡ് മഹാമാരിയുടെ പ്രതികൂല ആഘാതത്തിനും ഈ ഫണ്ട് ഉപയോഗിക്കാനായിരുന്നു തീരുമാനം.