ഒടുവില് ട്രോളുകള്ക്ക് പിന്നിലെ സത്യം വെളിപ്പെടുത്തി ദുല്ഖര് സല്മാന്. ഈ മാസം 12നാണ് ദുല്ഖറിന്റെ ‘കുറുപ്പ്’ തിയേറ്ററുകളിലേക്ക് എത്തുന്നത്. മമ്മൂട്ടി ഉള്പ്പടെ വന് താര നിര തന്നെ സിനിമയുടെ പോസ്റ്റര് സോഷ്യല് മീഡിയയില് ഷെയര് ചെയ്തിരുന്നു. ആദ്യമായിട്ടാണ് മമ്മൂട്ടി ദുല്ഖറിന്റെ ഒരു സിനിമയുടെ പോസ്റ്റര് ഷെയര് ചെയ്യുന്നത്. ഇതുമായി ബന്ധപ്പെട്ട് ട്രോളുകളും സമൂഹമാദ്ധ്യമങ്ങളില് നിറഞ്ഞു കഴിഞ്ഞു. മമ്മൂട്ടിയുടെ ഫോണ് അടിച്ചുമാറ്റി ദുല്ഖര് ഷെയര് ചെയ്തതാണെന്നായിരുന്നു ട്രോളുകളെല്ലാം.
സിനിമയുടെ പ്രൊമോഷന്റെ ഭാഗമായി മമ്മൂട്ടിയുടെ ഔദ്യോഗിക പേജിലും ട്രെയിലര് പങ്കുവച്ചിരുന്നു. മമ്മൂട്ടി ഉറങ്ങിയെന്ന് ഉറപ്പാക്കിയ ശേഷം ദുല്ഖര് ഫോണെടുത്ത് പോസ്റ്റ് ചെയ്തതാകും എന്നായിരുന്നു സോഷ്യല് മീഡിയയില് വന്ന ട്രോളുകള്.
‘സാധാരണ ഒരു സിനിമയുടെ പ്രൊമോഷന് വേണ്ടിയും ആരോടും ഒന്നും പറയാറില്ല. പക്ഷേ ഇത് ഇത്ര വലിയൊരു സിനിമ ആയതുെകാണ്ടും കൊവിഡ് പോലൊരു പ്രതിസന്ധി മുന്നിലുള്ളത് കൊണ്ടും ഞാന് തന്നെ പലരോടും ഷെയര് ചെയ്യാന് പറഞ്ഞു. സ്വന്തം വാപ്പച്ചിയോടും പറഞ്ഞു. പ്ലീസ് ഈ പടമെങ്കിലും എനിക്കുവേണ്ടി, പ്ലീസ്.. പിന്നെ ഞാന് ഫോണെടുക്കുകയാണെന്ന് പറഞ്ഞു. എന്നിട്ട് ഞാന് തന്നെ ഷെയര് ചെയ്തതാണ്. ട്രോളുകളെല്ലാം കറക്റ്റായിരുന്നു.’ ചിരിയോടെ ദുല്ഖര് പറഞ്ഞു.
കൊവിഡ് രണ്ടാം തരംഗത്തിന് ശേഷം കേരളത്തിലെ തിയേറ്ററുകളില് റിലീസിനെത്തുന്ന ആദ്യ ബിഗ്ബഡ്ജറ്റ് ചിത്രമാണ് ‘കുറുപ്പ്’. സിനിമക്ക് ഒടിടി പ്ലാറ്റ്ഫോമുകള് വന് തുക വാഗ്ദ്ധാനം ചെയ്തിരുന്നെങ്കിലും, തിയേറ്ററുകളില് റിലീസ് ചെയ്താല് മതിയെന്ന് അണിയറ പ്രവര്ത്തകര് തീരുമാനിക്കുകയായിരുന്നു. ശ്രീനാഥ് രാജേന്ദ്രന് സംവിധാനം ചെയ്ത കുറുപ്പ് 35 കോടി രൂപ മുതല് മുടക്കിയാണ് നിര്മിച്ചത്.