ഓവല്: ഇംഗ്ലണ്ടിനെതിരായ നാലാം ക്രിക്കറ്റ് ടെസ്റ്റില് 157 റണ്സിന്റെ തകര്പ്പന് ജയം സ്വന്തമാക്കി ഇന്ത്യ. 368 റണ്സിന്റെ കൂറ്റന് വിജയലക്ഷ്യം പിന്തുടര്ന്ന് രണ്ടാം ഇന്നിംഗ്സിനിറങ്ങിയ ഇംഗ്ലണ്ട് അവസാനദിനമായ ഇന്നലെ 210 റണ്സിന് ആള്ഔട്ടാവുകയായിരുന്നു. സ്കോര്: ഇന്ത്യ 191/10, 466/10, ഇംഗ്ലണ്ട് 290/10, 210/10.
വിജയത്തോടെ ഇന്ത്യ 5 മത്സരങ്ങള് ഉള്പ്പെട്ട പരമ്പരയില് 2-1ന് മുന്നിലെത്തി. ഇംഗ്ലണ്ടിന്റെ രണ്ടാം ഇന്നിംഗ്സില് ഇന്ത്യയ്ക്കായി ഉമേഷ് യാദവ് മൂന്നും ബുംറ, ജഡേജ, ഷര്ദ്ദുല് എന്നിവര് രണ്ട് വിക്കറ്റ് വീതവും വീഴ്ത്തി.
ടെസ്റ്റില് ഏറ്റവും വേഗത്തില് 100 വിക്കറ്റ് സ്വന്തമാക്കുന്ന ഇന്ത്യന് പേസ് ബൗളര് എന്ന റെക്കാഡും ബുംറ സ്വന്തമാക്കി. അഞ്ചാം ടെസ്റ്റ് സെപ്തംബര് 10ന് മാഞ്ചസ്റ്ററില് ആരംഭിക്കും.