തിരുവനന്തപുരം: സംസ്ഥാനത്ത് ടിപിആര് നിരക്ക് അനുദിനം ഉയരുന്ന സാഹചര്യത്തില് നിയന്ത്രണങ്ങള് കൂടുതല് കടുപ്പിക്കാനൊരുങ്ങി സര്ക്കാര്. അടുത്തയാഴ്ച മുതല് നിയന്ത്രണങ്ങള് കൂടുതല് കടുപ്പിച്ചേക്കുമെന്നാണ് പുറത്തുവരുന്ന റിപ്പോര്ട്ടുകള് ചൂണ്ടിക്കാട്ടുന്നത്. നാളെ നടത്താനിരിക്കുന്ന അവലോകന യോഗത്തില് കൊവിഡ് നിയന്ത്രണങ്ങളിലെ മാറ്റം സംബന്ധിച്ച് തീരുമാനങ്ങള് കൈക്കൊണ്ടേക്കാം.
ഓണത്തെ തുടര്ന്ന് ഇളവുകൊടുത്തതാണ് ടി പി ആര് കൂടാന് കാരണമെന്ന് വിമര്ശനങ്ങളുമുണ്ട്. സാമൂഹ്യ അകലം ഉള്പ്പടെയുള്ള കൊവിഡ് പ്രോട്ടോക്കോളുകള് കര്ശനമായി പാലിക്കണമെന്ന് അധികൃതര് കര്ശന നിര്ദ്ദേശം നല്കിയിരുന്നെങ്കിലും പ്രധാന മാര്ക്കറ്റുകള് ഉള്പ്പടെയുള്ള സ്ഥലങ്ങളില് വന് ജനക്കൂട്ടമായിരുന്നു.
മാത്രമല്ല, സംസ്ഥാനത്ത് ഇന്നും ലോക്ക്ഡൗണ് ഇല്ല. മൂന്നാം ഓണമായതിനാലാണ് ഇളവ് അനുവദിച്ചിരിക്കുന്നത്. അതിനാല് തന്നെ തിങ്കളാഴ്ച കഴിയുന്നതോടെ കൊവിഡ് രോഗികളുടെ എണ്ണം ഉയര്ന്നേക്കുമെന്ന ആശങ്കയും ആരോഗ്യ പ്രവര്ത്തകര് ഉള്പ്പടെ പങ്കുവയ്ക്കുന്നുണ്ട്.
സംസ്ഥാനത്ത് ഇന്നലത്തെ ടിപിആര് നിരക്ക് 17.73 ശതമാനമായിരുന്നു. 87 ദിവസങ്ങള്ക്ക് ശേഷം ആദ്യമായാണ് ടി പി ആര് ഇത്രയും ഉയരുന്നത്. പരിശോധനകളുടെ എണ്ണം കുറവായിരുന്നിട്ടുകൂടി ഇന്നലെ 17,106 പേര്ക്കാണ് രോഗം ബാധിച്ചത്. 83 മരണങ്ങളാണ് സ്ഥിരീകരിച്ചത്. 96,481 സാംപിളുകള് മാത്രമാണ് പരിശോധിച്ചത്.