തിരുവനന്തപുരം: കോവിഡ് മരണം കുറച്ച് കാട്ടാനുള്ള വ്യഗ്രതയില് സര്ക്കാര് അര്ഹര്ക്കുള്ള ധനസഹായം നിഷേധിക്കുകയാണെന്ന് കെപിസിസി പ്രസിഡന്റ് കെ സുധാകരന്. ഐസിഎംആറിന്റെയും ലോകാരോഗ്യസംഘടനയുടെയും മാനദണ്ഡ പ്രകാരമാണ് കേരളത്തില് കോവിഡ് മരണം രേഖപ്പെടുത്തുന്നത് എന്നാണ് സര്ക്കാരിന്റെ ഭാഷ്യം. എന്നാല് ചികിത്സയിലിരിക്കുന്ന രോഗികളെ ഇടവേളകളില് കോവിഡ് ടെസ്റ്റ് നടത്തി നെഗറ്റീവായി രേഖപ്പെടുത്തുകയാണ് കേരളം ചെയ്യുന്നത്. ഇങ്ങനെയൊരു ടെസ്റ്റ് നടത്തണമെന്ന് ഐസിഎംആറോ ലോകാരോഗ്യസംഘടനയോ നിര്ദേശിക്കുന്നില്ലെന്നും അദ്ദേഹം പറഞ്ഞു.
കോവിഡ് ലിസ്റ്റ് അടിയന്തരമായി പുനര്നിര്ണയം നടത്തി അര്ഹരായവര്ക്ക് ധനസഹായം ലഭിക്കാന് ദ്രുതഗതിയിലുള്ള നടപടി സ്വീകരിക്കണം. കോവിഡ് മൂലം കേരളത്തില് 13,235 പേര് മരിച്ചെന്നാണ് സര്ക്കാര് കണക്ക്. എന്നാല് 25,000 പേരെങ്കിലും മരിച്ചിട്ടുണ്ടെന്ന് അമേരിക്കയിലെ യൂണിവേഴ്സിറ്റി ഓഫ് വാഷിംഗ്ടണിലെ ആരോഗ്യവിഭാഗമായ ഇന്സ്റ്റിറ്റ്യൂട്ട് ഓഫ് ഹെല്ത്ത് മെട്രിക്സ് ആന്ഡ് ഇവാലുവേഷന്റെ (ഐഎച്ച്എംഇ) റിപ്പോര്ട്ടില് പറയുന്നു. ഇതില് നിന്നും സര്ക്കാരിന്റെ കണക്ക് തെറ്റാണെന്നും അദ്ദേഹം പറയുന്നു.