ന്യൂഡൽഹി: ബിജെപി സഖ്യത്തിലേക്ക് തിരിച്ചെത്താനൊരുങ്ങി ചന്ദ്രബാബു നായിഡുവിന്റെ ടിഡിപി. 2019-ലെ തിരഞ്ഞെടുപ്പിന് മുമ്പ് ഉപേക്ഷിച്ച സഖ്യത്തിലേക്കാണ് ടിഡിപി മടങ്ങിയെത്തുന്നത്. ഇതിന്റെ ഭാഗമായി ചന്ദ്രബാബു നായിഡു ഡൽഹിയിൽ ബിജെപി നേതാക്കളുമായി ചർച്ച നടത്തും. കേന്ദ്ര ആഭ്യന്തരമന്ത്രി അമിത് ഷായടക്കമുള്ള നേതാക്കളുമായി ചന്ദ്രബാബു നായിഡു കൂടിക്കാഴ്ച്ച നടത്തിയേക്കുമെന്നാണ് റിപ്പോർട്ട്.
ടിഡിപി നേരത്തെതന്നെ നടൻ പവൻ കല്യാണിന്റെ ജനസേനയുമായി സഖ്യം പ്രഖ്യാപിച്ചിരുന്നു. ഡൽഹിയിൽ നടന്ന എൻഡിഎ സഖ്യകക്ഷികളുടെ യോഗത്തിൽ ജനസേന പങ്കെടുത്തിരുന്നു. ടിഡിപിയെക്കൂടെ സഖ്യത്തിലെത്തിക്കാൻ വേണ്ട ശ്രമം ജനസേന നടത്തുന്നുണ്ടായിരുന്നു. ഇതാണ് ഇപ്പോൾ ഫലം കണ്ടിരിക്കുന്നത്.
ലോക്സഭാ തിരഞ്ഞെടുപ്പുമായി ബന്ധപ്പെട്ട് ജനസേനയുമായി ടിഡിപി ഏകദേശ സീറ്റുധാരണയിൽ എത്തിയിട്ടുണ്ടെന്നാണ് പുറത്തു വരുന്ന വിവരം.