സമസ്ത മേഖലകളിലും കേരളത്തിന്റെ മുന്നേറ്റം വ്യക്തമാക്കാനായി സര്ക്കാര് നടത്തുന്ന കേരളീയം – 2023 പരിപാടി യുഡിഎഫ് ബഹിഷ്കരിക്കുമെന്ന് പ്രതിപക്ഷ നേതാവ് വി.ഡി.സതീശന് അറിയിച്ചു.
മുഖ്യമന്ത്രിയും മന്ത്രിമാരും നിയമസഭാ മണ്ഡലാടിസ്ഥാനത്തില് നടത്തുന്ന പര്യടന പരിപാടികളിലും യുഡിഎഫ് സഹകരിക്കില്ലെന്നും വി ഡി സതീശൻ വാര്ത്താക്കുറിപ്പില് പറഞ്ഞു.
ഈ രണ്ട് പരിപാടികളും സര്ക്കാര് ചെലവിലുള്ള തിരഞ്ഞെടുപ്പ് പ്രചരണ പരിപാടികളാണെന്നും ലോക്സഭ, തദ്ദേശ തിരഞ്ഞെടുപ്പുകളുടെ പ്രചരണ പരിപാടികള് ഇടതുമുന്നണി സ്വന്തം നിലയില് സംഘടിപ്പിക്കേണ്ടതാണ്. അല്ലാതെ സര്ക്കാര് ഖജനാവിലുള്ള പൊതുജനങ്ങളുടെ നികുതിപണം ദുരുപയോഗം ചെയ്യരുതെന്നും അദ്ദേഹം വിമർശിച്ചു. സംസ്ഥാനം ചരിത്രത്തിലെ തന്നെ ഏറ്റവും വലിയ സാമ്പത്തിക പ്രതിസന്ധിയിലൂടെ കടന്നുപോവുമ്പോൾ സർക്കാർ അനാവശ്യ ദൂർത്താണ് നടത്തുന്നത് എന്നും അദ്ദേഹം കുറ്റപ്പെടുത്തി.
സാധാരണക്കാരന്റെ കഴുത്തറുത്ത നികുതികൊള്ള ഒരു ഭാഗത്ത് നടക്കുമ്പോൾ നികുതി വെട്ടിപ്പിനുള്ള പറുദീസയായി കേരളം മാറി. ക്ഷേമ പെൻഷൻ കൊടുക്കാൻ സർക്കാരിന് പണമില്ല. വികൃതമായ സര്ക്കാരിന്റെ മുഖം മിനുക്കുന്നതിനാണ് ഖജനാവില്നിന്ന് കോടികള് ചെലവഴിക്കുന്നത്. ഇക്കാര്യത്തിൽ പ്രതിപക്ഷവുമായി യാതൊരു ആലോചനയും നടത്തിയിട്ടില്ല അതുകൊണ്ട് യുഡിഎഫ് രണ്ട് പരിപാടികളും ബഹിഷ്ക്കരിക്കും.