ബംഗളൂരു: നിർണായക വിവരങ്ങൾ ശേഖരിക്കാൻ ആരംഭിച്ച് ഇന്ത്യയുടെ ആദ്യ സൗര്യ ഗവേഷണ പേടകമായ ആദിത്യ എൽ-1. സൂര്യകണങ്ങളെ സംബന്ധിച്ചുള്ള വിവരങ്ങളാണ് പേടകത്തിലെ സ്റ്റെപ്സ് ( സുപ്ര തെർമൽ ആൻഡ് എനർജറ്റിക് പാർട്ടിക്കിൽ സ്പെക്ട്രോമീറ്റർ) എന്ന ഉപകരണം ശേഖരിക്കുന്നത്. സ്റ്റെപ്സ് എന്നത് ആദിത്യ സോളാർ വിൻഡ് പാർട്ടികിൾ എക്സ്പിരിമെന്റിന്റെ ഭാഗമാണ്. സെപ്റ്റംബർ പത്ത് മുതലാണ് സ്റ്റെപ്സ് പ്രവർത്തനനിരതമായത്.
ഭൂമിയിൽ നിന്ന് 50,000 കിലോ മീറ്റർ അകലെയുള്ള വിവരങ്ങളാണ് ഇവ ശേഖരിക്കുന്നത്. സൗരവാതത്തിലെ അയോണുകളുടെയും ഇലക്ട്രോണുകളും അടക്കമുള്ള ഊർജ്ജ കണങ്ങളെ സംബന്ധിച്ച ശാസ്ത്രീയ വിവരങ്ങൾ ഇത് ശേഖരിക്കും. ഭൂമിയ്ക്ക് ചുറ്റുമുള്ള കണങ്ങളുടെ സ്വഭാവത്തെക്കുറിച്ച് മനസിലാക്കാൻ സ്റ്റെപ്സ് കൈമാറുന്ന വിവരങ്ങൾ ഐഎസ്ആർഒയെ സഹായിക്കുന്നതാണ്.
സെപ്തംബർ രണ്ടിനാണ് ആദിത്യ എൽ വൺ വിക്ഷേപിച്ചത്. ശ്രീഹരിക്കോട്ടയിലെ സതീഷ് ധവാൻ ബഹിരാകാശ നിലയത്തിൽ നിന്ന് പിഎസ്എൽവി സി 57 റോക്കറ്റിലായിരുന്നു വിക്ഷേപണം. സൂര്യന്റെ പുറംഭാഗത്തെ താപവ്യതിയാനം, ബഹിരാകാശ കാലാവസ്ഥ ഉൾപ്പടെ സൂര്യനെ കുറിച്ചുള്ള വിശദ പഠനമാണ് ദൗത്യത്തിലുൂടെ ലക്ഷ്യമിടുന്നത്
അഞ്ച് വർഷവും എട്ട് മാസവുമാണ് ദൗത്യത്തിന്റെ കാലാവധി. സൂര്യന്റേയും ഭൂമിയുടേയും ആകർഷണവലയത്തിൽ പെടാത്ത ഹാലോ ഓർബിറ്റിലാണ് ഉപഗ്രഹം സഞ്ചരിക്കുക. ഭൂമിയിൽ നിന്ന് 15 ലക്ഷം കിമീ അകലെയുള്ള ലഗ്രാഞ്ച് പോയന്റ് 1 (എൽ 1) ലാണ് ഉപഗ്രഹത്തെ എത്തിക്കുക.
ഇമേജിങ് ടെലസ്കോപ്പ് (എസ്.യു.ഐ.ടി), വിസിബിൾ ലൈൻ എമിഷൻ കൊറോണ ഗ്രാഫ് (വി.ഇ.എൽ.സി), സോളാർ അൾട്രാ വയലറ്റ് ഹൈ എനർജി എൽ1 ഓർബിറ്റിങ് എക്സ്റേ സ്പെക്ട്രോമീറ്റർ (എച്ച്യഇ.എൽ.1.ഒ.എസ്), ആദിത്യ സോളാർ വിൻഡ് പാർട്ടിക്കിൾ എക്സ്പിരിമെന്റ് (എ.എസ്.പി.ഇ.എക്സ്), പ്ലാസ്മ അനലൈസർ പാക്കേജ് ഫോർ ആദിത്യ (പി.എ.പി.എ.), മാഗ്നറ്റോ മീറ്റർ, സോളാർ ലോ എനർജി എക്സ്റേ സ്പെക്ട്രോമീറ്റർ (എസ്.ഒ.എൽ.ഇ.എക്സ്.എസ്) എന്നിങ്ങനെ ഏഴ് പേലോഡുകളാണ് ആദിത്യ എൽ 1 ൽ ഉള്ളത്.