സ്വര്‍ണ്ണക്കടത്തു കേസില്‍ കസ്റ്റംസ് മൂന്ന് പേരുടെ അറസ്റ്റ് രേഖപ്പെടുത്തി. മൂവാറ്റുപുഴ സ്വദേശി ജലാല്‍, മലപ്പുറം സ്വദേശികളായ മുഹമ്മദ് ഷാഫി, അംജിത് അലി എന്നുവരുടെ അറസ്റ്റാണ് രേഖപ്പെടുത്തിയത്. ഇവരെ ഇന്ന് കൊച്ചിയിലെ സാമ്പത്തിക കുറ്റകൃത്യങ്ങള്‍ക്കായുള്ള കോടതിയില്‍ ഹാജരാക്കും. അതിനിടെ നേരത്തെ എന്‍.ഐ.എ അറസ്റ്റ് ചെയ്ത സന്ദീപിന്റെ ബാഗ് തുറക്കുന്നതുമായി ബന്ധപ്പെട്ട അപേക്ഷയില്‍ കോടതി ഇന്ന് വിധി പറയും. നേരത്തെ കെ.ടി. റമീസിനെ അറസ്റ്റ് ചെയ്തിരുന്നു. അതേസമയം, സ്വര്‍ണ്ണക്കടത്തുമായി ബന്ധപ്പെട്ട് മുന്‍ ഐ.ടി സെക്രട്ടറിയും, മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയുമായിരുന്ന എം. ശിവശങ്കറിനെ കസ്റ്റംസ് ഒമ്പത് മണിക്കൂറിലേറെ ചോദ്യം ചെയ്തു. തിരുവനന്തപുരം കസ്റ്റംസ് ആസ്ഥാനത്ത് പുലര്‍ച്ചെ 2.30 വരെയായിരുന്നു ചോദ്യം ചെയ്യല്‍. കസ്റ്റംസിന് പുറമെ റവന്യൂ ഇന്റലിജന്‍സ് വിഭാഗവും ശിവശങ്കറിനെ ചോദ്യം ചെയ്തു.
2020-07-15