തിരുവനന്തപുരം: ഉയർന്ന തിരമാലയും കടലാക്രമണ സാധ്യതയും മുന്നിൽ കണ്ട് ജാഗ്രതാ നിർദേശം പുറപ്പെടുവിച്ചതായി അധികൃതർ അറിയിച്ചു. കന്യാകുമാരി തീരത്ത് നാളെ (23/02/2025) ഉച്ചയ്ക്ക് 02.30 മുതൽ രാത്രി 11.30 വരെ 0.9 മുതൽ 1.0 മീറ്റർ വരെ ഉയർന്ന തിരമാലകൾ ഉണ്ടാകാൻ സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) മുന്നറിയിപ്പ് നൽകി.

കടലാക്രമണ സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും അതീവ ജാഗ്രത പാലിക്കണമെന്ന് അധികൃതർ നിർദേശിക്കുന്നു.

കൊച്ചി: സംസ്ഥാനത്ത് പുതിയ നാലുവരിപ്പാതയായ കൊല്ലം-തേനി ദേശീയപാത (NH 183)യുടെ നിർമാണ പ്രവർത്തനങ്ങൾ വേഗത്തിൽ പൂർത്തിയാകുമെന്ന് അധികൃതർ. സ്ഥലം ഏറ്റെടുപ്പ് നടപടികൾ പുരോഗമിക്കുമ്പോൾ യൂട്ടിലിറ്റി സർവേയും പൂർത്തിയായതായി കൊടിക്കുന്നിൽ സുരേഷ് എംപി അറിയിച്ചു.

അടുത്ത ഘട്ടത്തിൽ വൈദ്യുതി തൂണുകൾ, ഓപ്റ്റിക്കൽ ഫൈബർ കേബിളുകൾ, ജലവിതരണ പൈപ്പുകൾ എന്നിവ മാറ്റി സ്ഥാപിക്കേണ്ടതുമായ ചിലവിന്റെ പ്രാഥമിക കണക്കെടുപ്പ് പൂർത്തിയാകുന്ന ഘട്ടത്തിലാണ് പദ്ധതി. കൊല്ലം മുതൽ ആലപ്പുഴയിലെ ആഞ്ഞിലിമൂട് വരെയുള്ള 62 കിലോമീറ്റർ ദൂരത്തിൽ 3100-ഓളം വൈദ്യുതി തൂണുകൾ മാറ്റിവെക്കേണ്ടതുണ്ട്. ഹൈടെൻഷൻ ലൈനുകളും ഇതിനകം പരിഗണനയിൽ ഉൾപ്പെടുത്തിയിട്ടുണ്ട്.

സ്ഥലം ഏറ്റെടുപ്പ് പൂർത്തിയായതിന് പിന്നാലെ യൂട്ടിലിറ്റി ഡക്റ്റ് രൂപീകരിച്ച് ഇതെല്ലാം അലൈൻമെന്റിനനുസരിച്ച് മാറ്റി സ്ഥാപിക്കും. അതോടൊപ്പം തന്നെ പാതാ നിർമ്മാണ പ്രവർത്തനങ്ങളും യൂട്ടിലിറ്റി ഷിഫ്റ്റിംഗ് നടപടികളും സമാന്തരമായി പുരോഗമിക്കും.

പദ്ധതിയുടെ ആദ്യഘട്ട 3(എ) നോട്ടിഫിക്കേഷൻ ഇതിനകം പുറപ്പെടുവിച്ചിട്ടുണ്ടെന്നും 24 മീറ്റർ വീതിയിലാണ് ഭൂമി ഏറ്റെടുക്കുന്നതെന്നും അധികൃതർ വ്യക്തമാക്കി. കൊല്ലം, ആലപ്പുഴ ജില്ലകളിലെ വിവിധ ഗ്രാമപഞ്ചായത്തുകൾ വഴിയാണ് ദേശീയപാത 183 കടന്നുപോകുക.

അച്ഛനമ്മമാർ ആശുപത്രി ഐസിയുവിൽ ഉപേക്ഷിച്ച് പോയ 23 ദിവസം പ്രായമായ നവജാത ശിശുവിന് വനിത ശിശു വികസന വകുപ്പ് സംരക്ഷണമൊരുക്കുമെന്ന് ആരോഗ്യ വനിതാ ശിശുവികസന വകുപ്പ് മന്ത്രി വീണാ ജോർജ്. ഇതുസംബന്ധിച്ച് വനിത ശിശുവികസന വകുപ്പ് ഡയറക്ടർക്ക് നിർദേശം നൽകി. വനിത ശിശുവികസന വകുപ്പ് ജില്ലാ ഓഫീസർ ആശുപത്രി സന്ദർശിച്ച് തുടർനടപടികൾ സ്വീകരിക്കും. മാതാപിതാക്കൾ തിരിച്ചു വരുന്നെങ്കിൽ കുഞ്ഞിനെ അവർക്ക് കൈമാറും. കുഞ്ഞിനെ മാതാപിതാക്കൾക്ക് ഇനി വേണ്ട എന്നാണെങ്കിൽ നിയമപരമായ നടപടികളിലൂടെ കുഞ്ഞിനെ ശിശുക്ഷേമ സമിതി ഏറ്റെടുക്കും. കുഞ്ഞിന് ഇനിയുള്ള ചികിത്സ ഉറപ്പാക്കാൻ എറണാകുളം ജനറൽ ആശുപത്രി സൂപ്രണ്ടിന് നിർദേശം നൽകി.

കോട്ടയത്തെ ഫിഷ് ഫാമിൽ ജോലി ചെയ്തിരുന്ന ജാർഖണ്ഡ് സ്വദേശികളായ ദമ്പതികൾ, പ്രസവത്തിനായി നാട്ടിലേക്ക് പോകുന്ന സമയത്താണ് ട്രെയിനിൽ വച്ച് ഭാര്യയ്ക്ക് അസ്വസ്ഥതകളുണ്ടായത്. തുടർന്ന് തൊട്ടടുത്തുള്ള ആശുപത്രിയിലെത്തിക്കുകയും പെൺകുഞ്ഞിന് ജന്മം നൽകുകയും ചെയ്തു. ഒരു കിലോയിൽ താഴെ മാത്രം ഭാരമായതിനാൽ വിദഗ്ധ ചികിത്സയ്ക്കായി കുഞ്ഞിനെ അവർ സ്വകാര്യ ആശുപത്രിയിലെ എൻഐസിയുവിലേയ്ക്ക് മാറ്റി. പിന്നീട് അച്ഛനേയും അമ്മയേയും കാണാതെയായി. അവരുമായി ബന്ധപ്പെടാനും സാധിച്ചിട്ടില്ലാ എന്നാണ് ആശുപത്രി അധികൃതർ പറയുന്നത്.

ദില്ലി: കോൺഗ്രസിലെ ആഭ്യന്തര സംഘർഷങ്ങളുടെ പശ്ചാത്തലത്തിൽ ശശി തരൂരുമായി തുടർ ചർച്ചകളില്ലെന്ന സൂചന നൽകി പാർട്ടി നേതൃത്വം. എൽഡിഎഫ് സർക്കാരിന്റെ വികസന നയത്തെ പിന്തുണച്ചതും പ്രധാനമന്ത്രി നരേന്ദ്ര മോദിയെ പ്രകീർത്തിച്ചതും പാർട്ടിക്കുള്ളിൽ ആശയക്കുഴപ്പം സൃഷ്ടിച്ചതിനിടെ, കഴിഞ്ഞ ദിവസം ദില്ലിയിൽ ശശി തരൂരും രാഹുൽ ഗാന്ധിയും കൂടിക്കാഴ്ച നടത്തിയിരുന്നു. എന്നാല്‍ തരൂർ മുന്നോട്ട് വെച്ച ആവശ്യങ്ങൾ ഹൈക്കമാൻഡ് അംഗീകരിക്കില്ലെന്നാണ് റിപ്പോർട്ടുകൾ.

പാർട്ടിയിൽ സ്വന്തം അഭിപ്രായങ്ങൾക്ക് മതിയായ പരിഗണന ലഭിക്കുന്നില്ലെന്നും കൂടിയാലോചന കുറയുന്നതായി തരൂർ രാഹുൽ ഗാന്ധിയോട് പരാതി ഉന്നയിച്ചതായി അറിയുന്നു. എന്നാൽ ദേശീയതലത്തിലും സംസ്ഥാന തലത്തിലും സംഘടന ചുമതലകൾ നൽകാൻ താൽക്കാലികമായി താത്പര്യമില്ലെന്ന നിലപാടിലാണ് ഹൈക്കമാൻഡ്. പാര്‍ലമെന്റിലെ പൊതുവായ ചുമതലകൾ മാത്രമേ തരൂരിന് നൽകൂ എന്നതാണ് തീരുമാനം.

ഈ സാഹചര്യത്തിൽ തരൂരിന്റെ നിലപാടുകൾ നിർണ്ണായകമാകുമെന്ന് വിലയിരുത്തപ്പെടുന്നു. പാർട്ടി നേതൃത്വത്തിന്റെ കടുത്ത അവഗണന നേരിട്ടാൽ താൻ ശക്തമായ തീരുമാനങ്ങൾ എടുക്കേണ്ടിവരുമെന്നും രാഹുൽ ഗാന്ധിയുമായി നടത്തിയ ചർച്ചയിൽ തരൂർ വ്യക്തമാക്കിയതായി റിപ്പോർട്ടുകൾ സൂചിപ്പിക്കുന്നു.

സംസ്ഥാന തലത്തിൽ തന്നെ അടിച്ചമർത്താനുള്ള ശ്രമം നടക്കുന്നുവെന്ന തരൂരിന്റെ ആരോപണങ്ങൾക്ക് മറുപടിയായി, കെപിസിസിയും ദേശീയ നേതൃത്വം കൂടിയുമാണ് കർശന നിലപാട് സ്വീകരിച്ചത്. കെപിസിസി അധ്യക്ഷൻ ഉൾപ്പെടെ സംസ്ഥാന നേതൃത്വം കടുത്ത വിമർശനം ഉന്നയിച്ചതോടെയാണ് ഹൈക്കമാൻഡിന്റെ ഇടപെടൽ ശക്തമായത്

തിരുവനന്തപുരം: യുജിസിയുടെ കരട് നിർദേശങ്ങൾ ഫെഡറലിസത്തെ തകർക്കാനാണെന്നും സംസ്ഥാനങ്ങളെ പൂർണമായും മാറ്റിനിര്‍ത്താനുള്ള ശ്രമമാണെന്നും മുഖ്യമന്ത്രി പിണറായി വിജയൻ പറഞ്ഞു. യുജിസി റെഗുലേഷനുകൾക്കെതിരായ ദേശീയ കൺവെൻഷൻ ഉദ്ഘാടനം ചെയ്യുകയായിരുന്നു മുഖ്യമന്ത്രി. ബിജെപി ഇതര സംസ്ഥാനങ്ങളെ അണിനിരത്തി നിയമസഭാ മന്ദിരത്തിൽ സംസ്ഥാന സർക്കാർ സംഘടിപ്പിച്ച പരിപാടിയിൽ പ്രതിപക്ഷ നേതാവ് വിഡി സതീശനും പങ്കെടുത്തു.

വിസി നിയമനവുമായി ബന്ധപ്പെട്ട നിർദേശങ്ങളിലാണ് പ്രധാന എതിര്‍പ്പെന്ന് മുഖ്യമന്ത്രി പറഞ്ഞു. ചാൻസിലർക്ക് വിസിയെ നിശ്ചയിക്കാനുള്ള അതിപ്രാധാന്യമേറിയ അധികാരങ്ങൾ നൽകുന്നതാണിത്. ഇതിലൂടെ നിയമസഭകളുടെ അധികാരപരിധി വെല്ലുവിളിക്കപ്പെടുന്നു. ഗവർണർമാരും സംസ്ഥാന സർക്കാരുകളെ സമ്മർദ്ദത്തിലാക്കാൻ ശ്രമിക്കുന്നതായി മുഖ്യമന്ത്രി ആരോപിച്ചു.

ബില്ലുകളുമായി ബന്ധപ്പെട്ട് ഗവർണർമാർ തീരുമാനം വൈകിക്കുന്നു. സംസ്ഥാന സർക്കാരുകളുടെ മേൽഭാരമില്ലാതെ സർവകലാശാലകളിൽ ഇടപെടലുകൾ നടത്തുന്നു. ഈ നിർദേശങ്ങളിൽ തിരുത്തലുകൾ അനിവാര്യമാണെന്നും ഉന്നത വിദ്യാഭ്യാസ മേഖലയെ വാണിജ്യവൽക്കരിക്കാനുള്ള നീക്കമാണ് തുടരുന്നതെന്നും അദ്ദേഹം വ്യക്തമാക്കി.

സർക്കാരുകൾ സർവകലാശാലകളെ സഹായിക്കേണ്ടതാണെന്നും നിയന്ത്രിക്കാൻ ശ്രമിക്കുന്നത് പ്രശ്നകരമാണെന്നും പ്രതിപക്ഷ നേതാവ് വിഡി സതീശൻ അഭിപ്രായപ്പെട്ടു. അക്കാദമിക സ്ഥാപനങ്ങളുടെ നിയന്ത്രണം വിദ്യാഭ്യാസ സമൂഹത്തിന് വിട്ടുകൊടുക്കേണ്ടതാണെന്നും യുജിസി ഭരണഘടനയുടെ പരിധിയ്ക്കുള്ളിൽ പ്രവർത്തിക്കണമെന്ന് അദ്ദേഹം ആവശ്യപ്പെട്ടു.

കൺവെൻഷനിൽ വൈസ് ചാൻസിലർമാർ പങ്കെടുത്തില്ല. തെലങ്കാന ഉപമുഖ്യമന്ത്രി, കർണാടക, തമിഴ്നാട് ഉന്നത വിദ്യാഭ്യാസ മന്ത്രിമാർ ഉൾപ്പെടെ നിരവധി പ്രമുഖർ ചടങ്ങിൽ പങ്കെടുത്തു.

തിരുവനന്തപുരം: ഹൈസ്കൂളിൽ മാത്രമല്ല ഏഴാം ക്ലാസ് മുതൽ താഴെയുള്ള തലങ്ങളിലേക്കും ഓൾപാസ് സംവിധാനം ഘട്ടംഘട്ടമായി പിൻവലിക്കാൻ വിദ്യാഭ്യാസ വകുപ്പ് തീരുമാനിച്ചു. 3 മുതൽ 9 വരെയുള്ള ക്ലാസുകളിൽ പ്രധാന വിഷയങ്ങളിൽ പഠന നിലവാരം ഉറപ്പാക്കുന്നതിനായി അടുത്ത അധ്യായന വർഷം മുതൽ പ്രത്യേക പരീക്ഷയും നടത്തും.

കുട്ടികളെ കൂട്ടത്തോടെ പാസാക്കുന്ന രീതിയോട് വ്യാപക വിമർശനം ഉയർന്ന സാഹചര്യത്തിലാണ് ഇത് സംബന്ധിച്ച തീരുമാനം. ഈ വർഷം എട്ടാം ക്ലാസിൽ, അടുത്ത വർഷം ഒൻപതിലും പിന്നീട് പത്താം ക്ലാസിലും ഓൾപാസ് സംവിധാനം ഒഴിവാക്കും. തുടർന്നുള്ള ഘട്ടങ്ങളിൽ എട്ടാം ക്ലാസിനും താഴെയുള്ള തലങ്ങളിലും ഈ നീക്കം വ്യാപിപ്പിക്കുമെന്ന് പൊതുവിദ്യാഭ്യാസ വകുപ്പ് അറിയിച്ചു.

പൊതുവിദ്യാഭ്യാസ ഡയറക്ടർ ഗുണമേന്മാ വിദ്യാഭ്യാസ സെമിനാറിൽ ഇക്കാര്യം വ്യക്തമാക്കിയിരുന്നു. ഏഴാം ക്ലാസിലേയ്ക്ക് തുടക്കമാക്കി താഴെതട്ടിലേക്കും എഴുത്തുപരീക്ഷയ്ക്ക് മിനിമം മാർക്ക് നിർബന്ധമാക്കാനാണ് നീക്കം. പാസിനായി ആവശ്യമായത് ആകെ മാർക്കിന്റെ 30% ആയിരിക്കുമെങ്കിലും, അതുവരെ വിദ്യാർത്ഥിയെ തോൽപ്പിക്കില്ല. പകരം, അതേ അധ്യായനവർഷത്തിൽ തന്നെ കൂടുതൽ പരിശീലനം നൽകി പുതിയ പരീക്ഷ എഴുതാനുള്ള അവസരം നൽകും.

3 മുതൽ 9 വരെ ക്ലാസുകളിലെ കണക്ക്, സയൻസ്, ഭാഷ, സാമൂഹ്യശാസ്ത്രം എന്നീ വിഷയങ്ങളിൽ വിദ്യാർത്ഥികളുടെ പഠന നിലവാരം ഉറപ്പാക്കാൻ “സ്റ്റേറ്റ് അച്ചീവ്മെൻറ് ടെസ്റ്റ്” എന്ന പ്രത്യേക പരീക്ഷ ആവിഷ്‌കരിക്കും. വാർഷിക പരീക്ഷക്ക് മുമ്പ് തന്നെ കുറവ് മാർക്ക് ലഭിച്ചവർക്ക് പ്രത്യേക പരിശീലനം നൽകാനും നടപടി സ്വീകരിക്കുമെന്ന് അധികൃതർ വ്യക്തമാക്കി.