കോഴിക്കോട്: നിയമസഭാ തിരഞ്ഞെടുപ്പിലെ പരാജയത്തില്‍ ലീഗനുള്ളിലുയരുന്ന വിമര്‍ശനത്തിന് ആക്കം കൂട്ടി കെ.എം.സി.സി നേതാവ് പുത്തര്‍ റഹ്മാന്റെ ഫേസ്ബുക്ക് പോസ്റ്റ്.രാജാജി മന്ത്രിസഭയില്‍ മന്ത്രി പദവി വാഗ്ദാനം ചെയ്യപ്പെട്ടപ്പോള്‍ അതിന് പകരം ഫാറൂഖ് കോളജ് മതിയെന്ന് പറഞ്ഞ സീതി സാഹിബിന്റെയും ഇസ്മായീല്‍ സാഹിബിന്റെയും ലീഗിലേക്ക് പാര്‍ട്ടി നേതൃത്വം മടങ്ങണം. അധികാര ലബ്ദിയേക്കാള്‍ അവകാശ സംരക്ഷണമായിരുന്നു അവരുടെ ലക്ഷ്യം.
പാര്‍ലിമെന്ററി വ്യാമോഹത്തെ പ്രായോഗിക രാഷ്ട്രീയമെന്ന ഓമനപ്പേരില്‍ വിളിക്കുകയാണ്. തോല്‍വിയില്‍ പാര്‍ട്ടി അടിമുടി അഴിച്ചുപണിയണമെന്നും തൊലിപ്പുറമെയുള്ള ചികിത്സ മതിയാവില്ലെന്നും റഹ്മാന്‍ വ്യക്തമാക്കുന്നു.മുസ്ലിം ലീഗ് അധികാരത്തിന് വേണ്ടി തട്ടിക്കൂട്ടിയ പ്രസ്ഥാനമല്ലെന്ന് ഫേസ്ബുക്ക് പോസ്റ്റില്‍ പറയുന്നു. മന്ത്രിമന്തിരങ്ങളിലല്ല ലീഗ് പുഷ്ഠിച്ചതെന്നും കൊടിവെച്ച കാറിലല്ല പഴയകാല ലീഗ് നേതാക്കള്‍ സഞ്ചരിച്ചതെന്നും പുത്തൂര്‍ റഹ്മാന്‍ പറയുന്നു.