ന്യൂഡൽഹി: ജി20യുടെ അധ്യക്ഷസ്ഥാനം വഹിച്ച് ഇന്ത്യ നിരവധി നേട്ടങ്ങളാണ് സ്വന്തമാക്കിയിരിക്കുന്നത്. സുസ്ഥിര വികസനത്തിനും സാങ്കേതിക വിദ്യയുടെ സഹായത്തോടെ ജീവിതം കൂടുതൽ എളുപ്പമാക്കുന്നതിനും സമാധാനം ഉറപ്പാക്കുന്നതിനും ഇന്ത്യ മുന്നോട്ടുവെച്ച നയങ്ങൾ തുറന്നുകാണിക്കാനുള്ള വേദിയായി മാറുകയായിരുന്നു ഉച്ചകോടി. 60 നഗരങ്ങളിലായി 220ലധികം യോഗങ്ങളാണ് ജി 20 ഉച്ചകോടിയ്ക്കായി നടത്തിയത്. 115 രാജ്യങ്ങളിൽ നിന്നായുള്ള കാൽലക്ഷത്തിലധികം പ്രതിനിധികളും യോഗത്തിൽ പങ്കാളികളായി.
ആഫ്രിക്കൻ യൂണിയനിൽ നിന്ന് ഏറ്റവും കൂടുതൽ പ്രതിനിധികൾ പങ്കെടുത്തത് ഇത്തവണയാണ്. 43 ലോകനേതാക്കൾ പങ്കെടുത്ത ഏറ്റവും വലിയ ജി20 ഉച്ചകോടിയാണ് ഡൽഹിയിൽ നടന്നത്. അധികമായി 32 രാജ്യങ്ങളിൽ നിന്നുള്ള പ്രതിനിധികളുമെത്തിയിരുന്നു.
ഭക്ഷ്യ സുരക്ഷയും പോഷകാഹാര ലഭ്യതയും ഉറപ്പുവരുത്താൻ ഡെക്കാൻ ഉന്നത തല പ്രമാണം, സമുദ്ര സമ്പത്ത് വ്യവസ്ഥയുടെ വളർച്ചക്കായി ചെന്നൈ ഉന്നത തല പ്രമാണം, ടൂറിസത്തിനായി ഗോവൻ പ്രമാണം, ഭൂമി വീണ്ടെടുക്കുന്നതിനായി ഗാന്ധിനഗർ പ്രമാണം, ഇടത്തരം സംരംഭങ്ങൾക്ക് വിവരസാങ്കേതിക വിദ്യയുടെ സഹായം കൂടുതൽ ഉറപ്പാക്കുന്നതിനായി ജയ്പൂർ പ്രമാണം, ജി20യിലേക്ക് ആഫ്രിക്കൻ യൂനിയനെ സ്ഥിരാംഗമായി ഉൾപ്പെടുത്തികൊണ്ടുള്ള ഡൽഹിയിലെ ഉച്ചകോടി തുടങ്ങിയവയാണ് ജി 20 യുടെ ഭാഗമായി നടന്നത്.