തിരുവനന്തപുരം: പാർലമെന്റ് തിരഞ്ഞെടുപ്പ് മുന്നൊരുക്കങ്ങൾ ആരംഭിക്കാൻ കോൺഗ്രസ്. ഇതിനായി രാഷ്ട്രീയകാര്യ സമിതി യോഗം ചേരാൻ കോൺഗ്രസ് തീരുമാനിച്ചു. ഒക്ടോബർ നാലിനു കെപിസിസി ആസ്ഥാനത്ത് എംപിമാരെക്കൂടി പങ്കെടുപ്പിച്ച് രാഷ്ട്രീയകാര്യ സമിതി യോഗം ചേരാനാണ് തീരുമാനം.
ഒക്ടോബർ അഞ്ചിനു കെപിസിസി ഭാരവാഹികളുടെയും ഡിസിസി പ്രസിഡന്റുമാരുടെയും പാർലമെന്റിന്റെ ചുമതല നൽകിയ നേതാക്കളുടെയും അടിയന്തര സംയുക്തയോഗവും ചേരും, കെപിസിസി പ്രസിഡന്റ് കെ സുധാകരനാണ് യോഗം വിളിച്ചത്. യോഗങ്ങളിൽ എഐസിസി സംഘടനാ ജനറൽ സെക്രട്ടറി കെ സി വേണുഗോപാൽ പങ്കെടുക്കും. ഒക്ടോബർ നാലിനു രാവിലെ 10നു കെപിസിസി ആസ്ഥാനത്താണു രാഷ്ട്രീയകാര്യ സമിതി യോഗം ചേരുന്നത്.
യോഗത്തിൽ സമകാലിക രാഷ്ട്രീയ വിഷയങ്ങൾ ചർച്ച ചെയ്യും. ഒക്ടോബർ 5 ന് ചേരുന്ന സംയുക്ത യോഗത്തിൽ തിരഞ്ഞെടുപ്പു മുന്നൊരുക്ക പ്രവർത്തനങ്ങളുമായി ബന്ധപ്പെട്ട പദ്ധതികളുടെ രൂപരേഖ സുധാകരൻ വിശദീകരിക്കുമെന്നാണ് കോൺഗ്രസ് വൃത്തങ്ങൾ വ്യക്തമാക്കുന്നത്.