ലഖ്‌നൗ: ഉത്തർപ്രദേശിലെ ത്സാൻസി മെഡിക്കൽ കോളേജിൽ 10 നവജാത ശിശുക്കൾ വെന്തുമരിച്ച സംഭവത്തിൽ ആശുപത്രിക്ക് ഗുരുതര വീഴ്ചയെന്ന് കണ്ടെത്തൽ. അമ്പതിലധികം കുട്ടികളെയായിരുന്നു പത്ത് കുട്ടികളെ കിടത്താവുന്ന ഐ സി യുവിൽ കിടത്തിയതെന്നാണ് പുറത്തു വരുന്ന വിവരം.
സംഭവത്തിൽ അന്വേഷണം നടത്താൻ സർക്കാർ നിയോഗിച്ച കമ്മീഷൻ ഏഴു ദിവസത്തിനകം റിപ്പോർട്ട് സമർപ്പിക്കുമെന്നാണ് സൂചന. അതേസമയം, സംഭവത്തിൽ ജുഡീഷ്യൽ അന്വേഷണം വേണമെന്ന ആവശ്യമാണ് പ്രതിപക്ഷം മുന്നോട്ടുവെയ്ക്കുന്നത്. വെള്ളിയാഴ്ച്ച രാത്രിയാണ് മെഡിക്കൽ കോളേജിലെ കുട്ടികളുടെ ഐസിയുവിൽ തീപിടുത്തമുണ്ടായത്. 54 കുഞ്ഞുങ്ങളാണ് ഐസിയുവിൽ ഉണ്ടായിരുന്നത്. പത്തു കുഞ്ഞുങ്ങളാണ് തീപിടുത്തത്തിൽ വെന്തു മരിച്ചത്. 16 കുട്ടികൾക്ക് ഗുരുതരമായി പരിക്കേൽക്കുകയും ചെയ്തിട്ടുണ്ട്.
ഗുരുതരമായി പരിക്കേറ്റ ഈ കുഞ്ഞുങ്ങൾ ആശുപത്രിയിൽ തീവ്ര പരിചരണ വിഭാഗത്തിൽ ചികിത്സയിൽ തുടരുകയാണ്.