ജഗതി ശ്രീകുമാറിന് പശ്ചിമബംഗാൾ രാജ്ഭവന്റെ അംഗീകാരം; ഗവർണർ വീട്ടിലെത്തി പുരസ്കാരം സമ്മാനിച്ചു

On: April 28, 2024

തിരുവനന്തപുരം: നടൻ ജഗതി ശ്രീകുമാറിന് പശ്ചിമബംഗാൾ രാജ്ഭവന്റെ അംഗീകാരം. ഗവർണേഴ്‌സ് അവാർഡ് ഓഫ് എക്സലൻസ് ബംഗാൾ ഗവർണർ ഡോ. സി.വി. ആനന്ദബോസ് ജഗതി ശ്രീകുമാറിന് നൽകി. തിരുവനന്തപുരത്ത് ജഗതിയുടെ വീട്ടിലെത്തിയാണ് അദ്ദേഹം പുരസ്‌കാരം സമ്മാനിച്ചത്. കലാ- സാഹിത്യ- സാംസ്‌കാരിക പ്രവർത്തനങ്ങൾ പരിപോഷിക്കുന്നതിന് രാജ്ഭവൻ ആസ്ഥാനമായി രൂപം നൽകിയ കലാക്രാന്തി മിഷന്റെ ഭാഗമായി ഏർപ്പെടുത്തിയ പുരസ്‌കാരമാണിത്. 50,000 രൂപയും കീർത്തിപത്രവും ഫലകവുമാണ് ഈ പുരസ്‌കാരം ഉൾപ്പെട്ടിരിക്കുന്നത്.

യേശുദാസിന്റെ പാട്ടെന്നപോലെ ദൃശ്യമാധ്യമങ്ങളിൽ ജഗതിയെ കാണാത്ത ഒരു ദിവസം പോലുമില്ലെന്ന് ആനന്ദബോസ് പറഞ്ഞു. അദ്ദേഹം സാംസ്‌കാരിക കേരളത്തിന്റെ, വിശേഷിച്ച് ചലച്ചിത്ര മേഖലയുടെ പുരോഗതിക്ക് നൽകിയ സംഭാവനകൾ അളവറ്റതാണെന്നും അദ്ദേഹം കീർത്തിപത്രത്തിൽ പരാമർശിച്ചിട്ടുണ്ട്.

ജഗതിയുടെ ഭാര്യ ശോഭ ശ്രീകുമാർ, മകൻ രാജ്കുമാർ, മരുമകൾ ശ്രീകല, ചെറുമക്കളായ ജഗൻരാജ്, അനുഗ്രഹ, ജൂനിയർ പി.സി. ജോർജ് എന്നിവരുടെ സാന്നിധ്യത്തിലാണ് ഗവർണർ പുരസ്‌കാരം കൈമാറിയത്.

Previous Post: ഇന്ത്യ സഖ്യം അധികാരത്തിൽ എത്തിയാൽ അഞ്ചു വർഷം കൊണ്ട് അഞ്ചു പ്രധാനമന്ത്രിമാരുണ്ടാകും; പ്രധാനമന്ത്രി

Next Post: ലോക്‌സഭാ തെരഞ്ഞെടുപ്പ്; അമേഠിയിൽ രാഹുൽ ഗാന്ധിയും റായ്ബറേലിയിൽ പ്രിയങ്ക ഗാന്ധിയും മത്സരിക്കാൻ സാധ്യത

വീട്ടിൽ സോളാർ വെക്കുമ്പോൾ ON GRID ആക്കല്ലേ; കെഎസ്ഇബി കട്ടോണ്ട് പോകുമെന്ന് ആർ ശ്രീലേഖ

തിരുവനന്തപുരം: വൈദ്യുതി ചെലവ് ലാഭിക്കാനായി വീട്ടിൽ സോളാർ പാനൽ സ്ഥാപിച്ച വരെ വെട്ടിലാക്കുന്ന കെഎസ്ഇബിയുടെ രീതിക്കെതിരെ വിമർശനവുമായി മുൻ ഡിജിപി ആർ ശ്രീലേഖ. വീട്ടിൽ സോളാർ വെക്കുമ്പോൾ ON GRID ആക്കല്ലേ കെഎസ്ഇബി കട്ടോണ്ട് പോകുമെന്ന് ശ്രീലേഖ പറയുന്നു. ഫേസ്ബുക്കിൽ പങ്കുവെച്ച കുറിപ്പിലൂടെയായിരുന്നു ശ്രീലേഖയുടെ പ്രതികരണം. കെഎസ്ഇബി നൽകിയ ബില്ലും ആർ ശ്രീലേഖ പങ്കുവെച്ചിട്ടുണ്ട്. രണ്ടു വർഷം മുമ്പ് കണ്ണ് തള്ളിയപ്പോഴുള്ള കറന്റ് ബില്ല് കണ്ടിട്ടാണ് സോളാർ വെക്കാമെന്ന് തീരുമാനിച്ചത്. വിദഗ്ധ ഉപദേശപ്രകാരം on grid ആയി ചെയ്തു. പിന്നീട് ബില്ല് മാസം തോറുമായെങ്കിലും പഴയ 20,000 ന് പകരം 700, 800 ആയപ്പോൾ സന്തോഷമായി. കഴിഞ്ഞ 5,6 മാസമായി പതിയെ പതിയെ അത് കൂടി കഴിഞ്ഞ മാസത്തെ ബില്ല് 10,030. അതായത് സോളാർ വെക്കുന്നതിനു മുൻപത്തെക്കാൾ കൂടുതൽ. വൈദ്യുതി ഉപയോഗം ഒട്ടും കൂടിയിട്ടില്ല. അവരുടെ ബില്ല് കണ്ടാൽ ഒന്നും മനസ്സിലാവില്ല. എന്തെക്കെയോ മെഷീൻ വെച്ച് എന്തെക്കെയോ കണക്കുകൾ. മുൻപൊരു പരാതി നൽകിയിരുന്നു. അപ്പോൾ കുറെ technical പദങ്ങൾ കൊണ്ടൊരു മറുപടിയല്ലാതെ ഒന്നും സംഭവിച്ചില്ല. പിന്നെ സ്വയം ചിന്തിച്ചു മനസ്സിലാക്കി. മറ്റു സംസ്ഥാനങ്ങളെക്കാൾ ഇരട്ടി യൂണിറ്റിന് ചാർജ് ചെയ്യുന്ന കെഎസ്ഇബി, മീറ്ററിൽ സമയനുസ്സരിച്ചു എന്തെക്കെയോ സെറ്റ് ചെയ്തിട്ടുണ്ട്. കാലത്തെ വൈദ്യുതിക്ക് ഒരു തുക, ഉച്ചക്കുള്ള ഉപയോഗത്തിന് വേറൊരു തുക, രാത്രി ഉപയോഗിക്കുന്നതിനു മറ്റൊരു തുക. എന്നാൽ നമ്മൾ ഉൽപാദിപ്പിക്കുന്ന സോളാറിനു അവർ തരുന്ന വിലയുടെ പകുതിയിൽ താഴെ. തന്റെ 5 KW സോളാർ മാസം 500 മുതൽ 600 യൂണിറ്റ് വരെ KSEB ക്ക് കൊടുക്കുന്നു. എന്നാലത് 200, 300 unit ആയി മാത്രമേ അവർ കണക്കാക്കൂ.. അവർക്കതിന്റെ വില അത്രയല്ലേ ഉള്ളൂ. അനധികൃത പവർ കട്ട് സമയത്തും, ലൈൻ പണി എന്ന് പറഞ്ഞു ദിവസം 3,4 മണിക്കൂർ കറന്റ് ഇല്ലാത്ത സമയവും നമ്മൾ സോളാറിലൂടെ കറന്റ് ഉണ്ടാക്കി അവർക്ക് കൊടുത്തോണ്ടിരിക്കും. നമുക്കൊരു ഗുണവുമില്ല താനും. അത് കൊണ്ട്, സോളാർ വെക്കുമ്പോൾ ബാറ്ററി വാങ്ങി off grid വെക്കുന്നതാണ് നല്ലത്. അതാവുമ്പോൾ നമ്മുടെ കറന്റ് നമുക്ക് തന്നെ കിട്ടുമല്ലോ. ഇതിവിടെ എഴുതിയത് കൊണ്ട് പൊതുജനങ്ങൾക്കെങ്കിലും ഗുണമുണ്ടാവട്ടെ. കാട്ടുകള്ളന്മാരായ കെഎസ്ഇബി എന്തെങ്കിലും ചെയ്യുമെന്ന് യാതൊരു പ്രതീക്ഷയുമില്ലെന്നും ശ്രീലേഖ കൂട്ടിച്ചേർത്തു.
ബ്രസീലിൽ കനത്ത മഴ; പലയിടത്തും വെള്ളം കയറി, ജീവൻ നഷ്ടമായത് 100 ലേറെ പേർക്ക്

ബ്രസീൽ: ബ്രസീലിൽ കനത്ത മഴ. ശക്തമായ മഴയെ തുടർന്ന് പല ഭാഗങ്ങളിലും വെള്ളപ്പൊക്കവും അനുഭവപ്പെടുന്നുണ്ട്. കനത്ത മഴയിലും വെള്ളപ്പൊക്കത്തിലും നൂറിലധികം പേർക്കാണ് ജീവൻ നഷ്ടമായത്. ഒരു ലക്ഷത്തിലധികം ആളുകളെ മാറ്റിപ്പാർപ്പിക്കുകയും ചെയ്തിട്ടുണ്ട്. ബ്രസീലിലെ വീടുകളും പാലങ്ങളും കനത്ത മഴയിൽ തകർന്നടിഞ്ഞു. ജനങ്ങൾ പലയിടങ്ങളിലായി കുടുങ്ങിക്കിടക്കുകയാണ്. ഇവർക്കായുള്ള തെരച്ചിലുകൾ പുരോഗമിക്കുകയാണെന്ന് അധികൃതർ വ്യക്തമാക്കി. മഴയെ തുടർന്നുണ്ടായ പ്രളയത്തിൽ ഏറ്റവും കൂടുതൽ നാശനഷ്ടം റിപ്പോർട്ട് ചെയ്തിരിക്കുന്നത് ബ്രസീലിന്റെ തെക്കൻ മേഖലയായ റിയോ ഗ്രാൻഡെ സുളിലാണ്. ഈ പ്രദേശം സ്ഥിതി ചെയ്യുന്നത് ഉറുഗ്വ- അർജന്റീന അതിർത്തിയിലാണ്. ഏപ്രിൽ 29 മുതൽ അതിശക്തമായ മഴയാണ് ഈ മേഖലയിൽ അനുഭവപ്പെടുന്നത്. ശക്തമായ മഴയിൽ ജലനിരപ്പ് കുതിച്ചുയരുന്നത് അണക്കെട്ടുകൾക്കും ഭീഷണി സൃഷ്ടിക്കുന്നുണ്ട്. പോർട്ടോ അലൈഗ്രെ നഗരം ഇക്കാര്യത്തിൽ വലിയ ആശങ്കയിലാണ്. ചരിത്രത്തിൽ ഏറ്റവും മോശപ്പെട്ട ദുരന്തമാണ് ഇപ്പോൾ ബ്രസീൽ നേരിടുന്നതെന്നാണ് ഗവർണർ എഡ്വാർഡോ ലെയിറ്റ് വ്യക്തമാക്കിയിരിക്കുന്നത്. പ്രദേശത്ത് അദ്ദേഹം അടിയന്തരാവസ്ഥ പ്രഖ്യാപിക്കുകയും ചെയ്തിട്ടുണ്ട്. 497 നഗരങ്ങളിൽ പ്രളയം ബാധിച്ചിട്ടുണ്ട് എന്നാണ് കണക്കുകളിൽ നിന്ന് വ്യക്തമാകുന്നത്. ബ്രസീലിലെ താഴ്ന്ന പ്രദേശങ്ങളെല്ലാം ഇപ്പോൾ വെള്ളത്തിനടിയിലാണ്. പല റോഡുകളും തകർന്നടിഞ്ഞു. പല വിമാനത്താവളങ്ങളും വെള്ളത്തിൽ മുങ്ങിയ അവസ്ഥയും ഉണ്ടായി. പലസ്ഥലങ്ങളിലും ശുദ്ധജലമോ വൈദ്യുതിയോ ഇപ്പോഴും ലഭിക്കുന്നില്ല. പലയിടത്തും ഗതാഗതവും തടസ്സപ്പെട്ടിട്ടുണ്ട്.
മദ്യനയ കേസ്; അരവിന്ദ് കെജ്രിവാളിന് ഇടക്കാല ജാമ്യം

ന്യൂഡൽഹി: മദ്യനയ കേസുമായി ബന്ധപ്പെട്ട് ജയിലിൽ കഴിഞ്ഞിരുന്ന ഡൽഹി മുഖ്യമന്ത്രി അരവിന്ദ് കെജ്രിവാളിന് ഇടക്കാല ജാമ്യം. സുപ്രീം കോടതിയാണ് കെജ്രിവാളിന് ജാമ്യം നൽകിയത്. ജൂൺ 1 വരെയാണ് അരവിന്ദ് കെജ്രിവാളിന് സുപ്രീംകോടതി ഇടക്കാല ജാമ്യം അനുവദിച്ചിരിക്കുന്നത്. ജൂൺ 2 ന് തിരികെ കീഴടങ്ങണമെന്നും സുപ്രീം കോടതി ഉത്തരവിട്ടു. സുപ്രീംകോടതി ജസ്റ്റിസ് സഞ്ജീവ് ഖന്ന അധ്യക്ഷനായ ബെഞ്ചാണ് കെജ്രിവാളിന് ഇടക്കാല ജാമ്യം അനുവദിച്ചത്. തെരഞ്ഞെടുപ്പ് ഫലം വരുന്നത് വരെ ജാമ്യം നൽകണമെന്നായിരുന്നു അരവിന്ദ് കെജ്രിവാളിന്റെ അഭിഭാഷകൻ മനു അഭിഷേക് സിംഗ്വി കോടതിയിൽ ഉന്നയിച്ച ആവശ്യം. മദ്യനയ കേസിൽ ഇ ഡിയുടെ അറസ്റ്റ് നിയമവിരുദ്ധമാണെന്ന് ചൂണ്ടിക്കാട്ടി കെജ്രിവാൾ സുപ്രീം കോടതിയിൽ ഹർജി നൽകിയിരുന്നു. ഇ ഡിയുടെ അറസ്റ്റ് ചോദ്യം ചെയ്ത കെജ്രിവാൾ തനിക്ക് ജാമ്യം വേണമെന്നും ഹർജിയിൽ ആവശ്യപ്പെട്ടിരുന്നു. തെരഞ്ഞെടുപ്പ് പ്രചാരണത്തിന് തടസമില്ലെന്നും അരവിന്ദ് കെജ്രിവാൾ ഇന്ന് തന്നെ പുറത്തിറങ്ങുമെന്നാണ് പ്രതീക്ഷയെന്നും അഭിഭാഷകർ വ്യക്തമാക്കി. 50 ദിവസങ്ങൾ ജയിലിൽ കഴിഞ്ഞ ശേഷമാണ് കെജ്രിവാൾ പുറത്തിറങ്ങുന്നത്. അതേസമയം, കെജ്രിവാളിന് തെരഞ്ഞെടുപ്പ് പ്രചാരണത്തിൽ പങ്കെടുക്കാനും കോടതി അനുമതി നൽകിയിട്ടുണ്ട്.
എൽ ഡി ടൈപ്പിസ്റ്റ് തസ്തികയിൽ ഒഴിവ്; അപേക്ഷ നൽകാം

തിരുവനന്തപുരം: സംസ്ഥാന നാഷണൽ സർവ്വീസ് സ്‌കീം ഓഫീസിലെ എൽ ഡി ടൈപ്പിസ്റ്റ് തസ്തികയിൽ അന്യത്ര സേവനത്തിന് അപേക്ഷ ക്ഷണിച്ചു. വിവിധ വകുപ്പുകളിലോ സർക്കാർ പൊതുമേഖലാ സ്ഥാപനങ്ങളിലോ സമാന തസ്തികയിൽ ജോലി ചെയ്യുന്നവർക്ക് അപേക്ഷിക്കാം. കെ.എസ്.ആർ റൂൾ 144 പ്രകാരമുള്ള അപേക്ഷയും മാതൃവകുപ്പിൽ നിന്നുള്ള നിരാക്ഷേപ സാക്ഷ്യപത്രവും അടങ്ങിയ അപേക്ഷകൾ സംസ്ഥാന എൻ.എസ്.എസ് ഓഫീസർ, സംസ്ഥാന എൻ.എസ്.എസ് ഓഫീസ്, നാലാം നില, വികാസ് ഭവൻ പി.ഒ., തിരുവനന്തപുരം എന്ന വിലാസത്തിൽ മേയ് 31നു വൈകിട്ട് അഞ്ചിനു മുമ്പായി നൽകണം. വിശദമായ വിവരങ്ങൾക്ക് ഓഫീസ് പ്രവർത്തന സമയത്ത് ഓഫീസ് ഫോണുമായി ബന്ധപ്പെടാവുന്നതാണ് (0471 23088687) അതേസമയം, കേരള സ്റ്റേറ്റ് ലീഗൽ സർവീസസ് അതോറിറ്റി ഹെഡ്‌ക്വോർട്ടേഴ്‌സിൽ എറണാകുളം അസിസ്റ്റന്റ് ഗ്രേഡ് I തസ്തികയിൽ അന്യത്ര സേവന വ്യവസ്ഥയിൽ നിയമനത്തിന് വിവിധ വകുപ്പുകളിൽ നിന്ന് അപേക്ഷ ക്ഷണിച്ചു. വിശദ വിവരങ്ങൾക്ക് കേരള സ്റ്റേറ്റ് ലീഗൽ സർവീസസ് അതോറിറ്റിയുടെ വെബ്‌സൈറ്റ് സന്ദർശിക്കുക. www.kelsa.keralacourts.in.
ജസ്‌ന തിരോധാന കേസ്; തുടരന്വേഷണത്തിന് ഉത്തരവിട്ട് കോടതി

തിരുവനന്തപുരം: ജസ്‌ന തിരോധാന കേസിൽ തുടരന്വേഷണത്തിന് ഉത്തരവിട്ട് കോടതി. ജസ്‌നയുടെ അച്ഛൻ ജയിംസ് ജോസഫ് നൽകിയ ഹർജിയിലാണ് കോടതി ഉത്തരവ്. സിജെഎം കോടതിയുടെ ഉത്തരവിലാണ് ഇക്കാര്യം വ്യക്തമാക്കിയിരിക്കുന്നത്. വിധിയിൽ സന്തോഷമുണ്ടെന്നും അന്വേഷണത്തിൽ പ്രതീക്ഷയുണ്ടെന്നും ജെസ്നയുടെ അച്ഛൻ ജെയിംസ് അറിയിച്ചു. കേസ് ഡയറി കഴിഞ്ഞ ദിവസം സിബിഐ കോടതിയിൽ ഹാജരാക്കിയിരുന്നു. സീൽ ചെയ്ത കവറിൽ കേസുമായി ബന്ധപ്പെട്ട ചില ചിത്രങ്ങളും കഴിഞ്ഞ ദിവസം ജെയിംസ് കോടതിയിൽ ഹാജരാക്കിയിരുന്നു. ഇത് സി ബി ഐ അന്വേഷണ പരിധിയിൽ വന്നിരുന്നോ എന്ന് പരിശോധിച്ച ശേഷം ഇല്ലെന്ന് വ്യക്തമായതോടെയാണ് തുടരന്വേഷണത്തിന് ഉത്തരവിട്ടത്. 2018 മാർച്ച് 22 നാണ് സ്‌നയെ കാണാതായത്. പത്തനംതിട്ട വെച്ചൂച്ചിറ സ്വദേശിനിയാണ് ജസ്‌ന. മകൾ ജീവിച്ചിരിപ്പില്ലെന്നും തന്റെ അന്വേഷണത്തിൽ കൂടുതൽ തെളിവുകൾ ലഭിച്ചുവെന്നുമാണ് അച്ഛൻ ജയിംസ് വ്യക്തമാക്കുന്നത്.