മദ്യനിരോധനമായ ഡ്രൈ ഡേ പിൻവലിക്കാൻ സർക്കാർ; ചർച്ചകൾ നടക്കുന്നുവെന്ന് റിപ്പോർട്ട്

On: April 24, 2024

തിരുവനന്തപുരം: എല്ലാ മാസവും ഒന്നിന് തുടർന്നുപോരുന്ന മദ്യനിരോധനമായ ഡ്രൈ ഡേ പിൻവലിക്കാൻ സർക്കാർ ആലോചിക്കുന്നതായി റിപ്പോർട്ട്. സർക്കാരിന്റെ വരുമാനം വർദ്ധിപ്പിക്കുക എന്നതാണ് പുതിയ ആലോചനയ്ക്ക് പിന്നിലുള്ളതെന്നാണ് വിവരം. ബിവറേജ് വിൽപനശാലകൾ ലേലം ചെയ്യുക, മൈക്രോവൈനറികൾ പ്രോത്സാഹിപ്പിക്കുക തുടങ്ങിയ നിർദേശങ്ങളും സർക്കാരിന്റെ പരിഗണനയിലുണ്ട്. ഇക്കാര്യം ചീഫ് സെക്രട്ടറിയുടെ അദ്ധ്യക്ഷതയിൽ ചേർന്ന വകുപ്പ് സെക്രട്ടറിമാരുടെ യോഗത്തിൽ ചർച്ച ചെയ്തിട്ടുണ്ടെന്നാണ് സൂചന.

വർഷത്തിൽ 12 ദിവസം ഡ്രൈ ഡേ ആചരിക്കുന്നത് ടൂറിസം മേഖലയെ ബാധിക്കുമെന്നും ദേശീയ- അന്തർദേശീയ കോൺഫറൻസുകളിൽ നിന്ന് കേരളത്തെ ഒഴിവാക്കുന്നതിന് കാരണമാകുമെന്നും യോഗത്തിൽ വിലയിരുത്തി. ബന്ധപ്പെട്ടവരുമായി ടൂറിസം വകുപ്പ് ഇക്കാര്യം ചർച്ച ചെയ്ത് റിപ്പോർട്ട് സമർപ്പിക്കാനാണ് നിർദേശം.

ഇതിനായി ടൂറിസം സെക്രട്ടറിയെ ചുമതലപ്പെടുത്തുകയും ചെയ്തു. യോഗത്തിൽ ചർച്ചയായ മറ്റ് കാര്യങ്ങൾ മൈക്രോവൈനറികൾ പ്രോത്സാഹിപ്പിക്കുക. മസാല ചേർത്ത വൈനുകൾ ഉത്പാദിപ്പിക്കാനുള്ള സാദ്ധ്യതകൾ പരിശോധിക്കനായി കൃഷിവകുപ്പ് സെക്രട്ടറിയെ ചുമതലപ്പെടുത്തുകയും ചെയ്തു.

Previous Post: ജാതിയുടെ പേരിൽ ജനങ്ങളെ വേർതിരിക്കുകയാണ് മോദി ചെയ്യുന്നത്; മല്ലികാർജുൻ ഖാർഗെ

Next Post: ലോക്സഭാ തെരഞ്ഞെടുപ്പ്; പരസ്യപ്രചാരണം ഇന്ന് അവസാനിക്കും

ഗരുഡാപ്രീമിയം; നവകേരള ബസിന്റെ സമയക്രമം യാത്രക്കാർക്കു സൗകര്യപ്രദമല്ലെന്നു വിലയിരുത്തൽ

കോഴിക്കോട്: ആധുനിക സൗകര്യങ്ങളോട് കൂടി കെഎസ്ആർടിസി സർവ്വീസ് ആരംഭിച്ച ഗരുഡാപ്രീമിയം ബസിന്റെ സമയക്രമം യാത്രക്കാർക്കു സൗകര്യപ്രദമല്ലെന്നു വിലയിരുത്തൽ. കോഴിക്കോട്- ബെംഗളൂരു റൂട്ടിലാണ് നവകേരള ബസ് ഗരുഡാ പ്രീമിയം സർവ്വീസ് നടത്തുന്നത്. രാവിലെ നാലു മണിക്കാണ് കോഴിക്കോട്ടു നിന്നും ബസിന്റെ സർവ്വീസ് ആരംഭിക്കുന്നത്. നഗരത്തിനടുത്തുള്ളവർക്കുപോലും ഇതിനായി മൂന്നുമണിക്ക് തയാറെടുക്കേണ്ടി വരും. കോഴിക്കോട് ജില്ലയുടെ മറ്റു ഭാഗങ്ങൾ, മലപ്പുറം ജില്ല എന്നിവിടങ്ങളിൽ നിന്നു കോഴിക്കോട് എത്തണമെങ്കിൽ വളരെ നേരത്തേതന്നെ പുറപ്പെടണം. ഇത് പലർക്കും ബുദ്ധിമുട്ടാകുന്നുണ്ടെന്നാണ് വിവരം. പതിനൊന്നരയോടെയാണു ബസ് ബെംഗളൂരുവിൽ എത്തേണ്ടത്. എന്നാൽ, ഗതാഗത കുരുക്ക് കാരണം ആ സമയത്ത് ബംഗളൂരുവിൽ എത്താൻ കഴിയുന്നില്ല. ഉച്ചയോടെ മാത്രമാണ് ബസിന് ബംഗളൂരുവിലേക്ക് എത്താൻ കഴിയുന്നത്. ഉച്ചയ്ക്കു രണ്ടരയ്ക്കാണു ബസിന്റെ മടക്കയാത്ര. രാത്രി പത്തിനാണു കോഴിക്കോട് എത്തേണ്ടത്. വൈകിട്ടത്തെ ഗതാഗതക്കുരുക്ക് താണ്ടി എത്തുമ്പോഴേക്കും 12 മണി കഴിയും. ഈ സമയത്തു കോഴിക്കോടെത്തിയാൽ പലർക്കും വീടുകളിലേക്കു പോകാനും വണ്ടി കിട്ടില്ലെന്നാണ് ഉയരുന്ന മറ്റൊരു പരാതി. സമയക്രമത്തിൽ മാറ്റം വരുത്തിയാൽ യാത്ര കൂടുതൽ സൗകര്യപ്രദമാകുമെന്നാണ് യാത്രക്കാർ ആവശ്യപ്പെടുന്നത്. ബെംഗളൂരുവിൽ നിന്നു വൈകിട്ട് എട്ടോടെ യാത്ര ആരംഭിച്ചാൽ പുലർച്ചെ നാലോടെ കോഴിക്കോടെത്താം. ഇവിടെനിന്നും മറ്റു സ്ഥലങ്ങളിലേക്കു പോകേണ്ടവർക്കു രാവിലെ പോകാനും സാധിക്കും. കോഴിക്കോട്ടു നിന്നും കൽപറ്റയിൽ നിന്നും ഒരേ ചാർജ് എന്നതും യാത്രക്കാർ നേരിടുന്ന മറ്റൊരു ബുദ്ധിമുട്ട്. 700 രൂപയ്ക്കു കൽപറ്റയിൽ നിന്നും എസി ബസിൽ ബെംഗളൂരുവിൽ എത്താമെന്നിരിക്കെ 1240 രൂപ മുടക്കുന്നത് നഷ്ടമാണ്. അതിനാൽ ടിക്കറ്റ്, സ്റ്റേജ് അടിസ്ഥാനത്തിൽ ക്രമീകരിക്കണമെന്ന ആവശ്യവും യാത്രക്കാർ മുന്നോട്ടുവെയ്ക്കുന്നു.
ജീവിതത്തിന്റെ ഓരോ നിമിഷവും ജനങ്ങളെ സേവിക്കാനായി നീക്കിവെയ്ക്കും; പ്രധാനമന്ത്രി

ലഖ്നൗ: 2019-ൽ താൻ വീണ്ടും പ്രധാനമന്ത്രിയാവുമെന്ന് സമാജ്‌വാദി പാർട്ടി സ്ഥാപകൻ മുലായം സിങ് യാദവ് പ്രവചിച്ചിരുന്നതായി വെളിപ്പെടുത്തി പ്രധാനമന്ത്രി നരേന്ദ്രമോദി. ഇത് തനിക്കുള്ള മുലായത്തിന്റെ ആശീർവാദമായിരുന്നെന്ന് അദ്ദേഹം വ്യക്തമാക്കി. ഉത്തർപ്രദേശിലെ ഇറ്റാവയിൽ ബി.ജെ.പി. തിരഞ്ഞെടുപ്പ് പ്രചാരണറാലിയിൽ സംസാരിക്കവെയായിരുന്നു അദ്ദേഹത്തിന്റെ പരാമർശം. സമാജ്‌വാദി പാർട്ടിയുടേയും കോൺഗ്രസിന്റേയും മുദ്രാവാക്യങ്ങൾ നുണകളാണ്. അവരുടെ ഉദ്ദേശങ്ങൾ നല്ലതല്ല. കോൺഗ്രസും സമാജ്‌വാദി പാർട്ടിയും അവരുടേയും മക്കളുടേയും ഭാവിക്കുവേണ്ടിയാണ് തിരഞ്ഞെടുപ്പുകളിൽ മത്സരിക്കുന്നത്. കുടുംബത്തിന്റേയും വോട്ടുബാങ്കുളുടേയും ക്ഷേമത്തിനായാണ് അവർ പ്രവർത്തിക്കുന്നതെന്നും അദ്ദേഹം കുറ്റപ്പെടുത്തി. മോദിയും യോഗിയും നിങ്ങളുടെ കുട്ടികളുടെ ഭാവിക്കായാണ് പ്രവർത്തിക്കുന്നത്. തങ്ങൾക്ക് കുട്ടികളില്ല. എസ്.പിയുടേയും കോൺഗ്രസിന്റേയും യുവരാജാക്കന്മാരുടെ നിലനിൽപ്പിന് പ്രീണനരാഷ്ട്രീയം അത്യന്താപേക്ഷിതമായി. യാതൊരു വിവേചനവുമില്ലാതെ മുസ്ലിങ്ങൾക്ക് സർക്കാർ പദ്ധതികളുടെ ആനുകൂല്യം ലഭിക്കുന്നുണ്ട്. കോൺഗ്രസും ഇന്ത്യ മുന്നണിയും അവരെ കരുക്കളാക്കുകയാണെന്ന് മുസ്ലിങ്ങൾ തിരിച്ചറിഞ്ഞു. നിങ്ങളെ സേവിക്കാൻ തന്റെ ജീവിതത്തിന്റെ ഓരോ നിമിഷവും താൻ നീക്കിവെക്കും. തനിക്ക് സ്വന്തമായി കുടുംബമില്ല. നിങ്ങളാണ് തന്റെ കുടുംബവും പിന്തുടർച്ചക്കാരുമെന്ന് നരേന്ദ്ര മോദി കൂട്ടിച്ചേർത്തു.
ഉഷ്ണതരംഗം, കര്‍ശന ജാഗ്രത പുലര്‍ത്തണം; മഴക്കാല മുന്നൊരുക്കത്തിന് സജ്ജമാകാനും നിര്‍ദേശം

എറണാകുളം: എറണാകുളം ജില്ലയിൽ അതികഠിന ചൂട് സാഹചര്യത്തിൽ കർശന ജാഗ്രത പുലർത്തണമെന്ന് ജില്ലാ കളക്ടർ എൻ എസ് കെ ഉമേഷ് നിർദേശിച്ചു. പകൽ 11 മുതൽ 3 വരെയുള്ള സമയത്ത് നേരിട്ട് ശരീരത്തിൽ തുടർച്ചയായി സൂര്യപ്രകാശം ഏൽക്കുന്നത് ഒഴിവാക്കണം. സ്‌കൂളുകളിൽ മെയ് 10 വരെ അവധിക്കാല ക്യാംപുകളോ ക്ലാസുകളോ നടത്തരുത്. മുൻകൂട്ടി നിശ്ചയിക്കപ്പെട്ടതായാലും ക്രിക്കറ്റ് ടൂർണമെന്റ് പോലുള്ള ഔട്ട്ഡോർ ഇവന്റുകൾ നടത്തരുതെന്നും കളക്ടർ നിർദേശിച്ചു. ഇതുസംബന്ധിച്ച് ഉറപ്പുവരുത്തണമെന്ന് വിദ്യാഭ്യാസ വകുപ്പിന് കളക്ടർ നിർദേശം നൽകി. തൊഴിലാളികളുടെ തൊഴിൽ സമയം പുനക്രമീകരിച്ചത് പാലിക്കുന്നുണ്ടെന്ന് തൊഴിൽ വകുപ്പ് ഉറപ്പാക്കണം. ആസ്ബെസ്റ്റോസ്, ടിൻ ഷീറ്റുകൾ മേൽക്കൂരയായിട്ടുള്ള തൊഴിലിടങ്ങളിൽ തൊഴിലാളികളുടെ സുരക്ഷിതത്വം ഉറപ്പാക്കണം. സന്നദ്ധ സംഘടനകളുടെ സഹകരണത്തോടെ പൊതുസ്ഥലങ്ങളിൽ തണ്ണീർ പന്തൽ ഒരുക്കണം. തണ്ണീർ പന്തൽ ഒരുക്കാൻ തദ്ദേശ സ്ഥാപനങ്ങളും മുൻകൈയെടുക്കണം. എല്ലാ തദ്ദേശ സ്ഥാപനങ്ങളും തങ്ങളുടെ പരിധിയിൽ മാലിന്യം നിക്ഷേപിക്കുന്ന കേന്ദ്രങ്ങൾ കർശനമായി നിരീക്ഷിക്കണമെന്ന് കളക്ടർ നിർദേശിച്ചു. ആവശ്യമായ ഫയർ ടെൻഡറുകൾ സജ്ജമാക്കണം. ബ്രഹ്മപുരം മാലിന്യപ്ലാന്റ് ഉൾപ്പടെയുള്ള സ്ഥലങ്ങളിൽ തീപിടിത്തം ഒഴിവാക്കാനുള്ള നടപടികൾ സ്വീകരിക്കണം. തദ്ദേശ സ്ഥാപനങ്ങൾ ഫയർ ആന്റ് റസ്‌ക്യൂവുമായി ചേർന്ന സ്ഥിതിഗതികൾ വിലയിരുത്തണം. പ്രധാന മാലിന്യ നിക്ഷേപ കേന്ദ്രങ്ങളുടെ പട്ടിക എല്ലാ തദ്ദേശ സ്ഥാപനങ്ങളും സമർപ്പിക്കാനും കളക്ടർ നിർദേശിച്ചു. പ്രധാന മാർക്കറ്റുകളിലും നിരീക്ഷണം ശക്തമാക്കണം. എല്ലാ തദ്ദേശ സ്ഥാപനങ്ങളും കുടിവെള്ള ലഭ്യത ഉറപ്പാക്കണം. വാട്ടർ അതോറിറ്റിയുടെ വെള്ളം ലഭ്യമല്ലാത്ത സ്ഥലങ്ങളിൽ ടാങ്കറിൽ കുടിവെള്ളമെത്തിക്കണം. സൂര്യാഘാതവുമായി ബന്ധപ്പെട്ട് 162 കേസുകൾ റിപ്പോർട്ട് ചെയ്യപ്പെട്ടതായി ജില്ലാ മെഡിക്കൽ ഓഫീസർ ഡോ.കെ. സക്കീന അറിയിച്ചു. ഉഷ്ണതരംഗം പ്രതിരോധിക്കാൻ വാർഡ്തല ജനകീയ സമിതികൾ ഊർജിതമായി ബോധവത്കരണം നടത്തണം. മൃഗശാലകൾ, ഫാമുകൾ എന്നിവയിൽ മൃഗങ്ങൾക്ക് ശരീരം തണുപ്പിക്കാൻ ആവശ്യമായ സജ്ജീകരണം ഒരുക്കണം. ചൂടിനെ തുടർന്ന് നാൽപ്പത് വളർത്തുമൃഗങ്ങൾ ചത്തതായി മൃഗസംരക്ഷണ വകുപ്പ് അറിയിച്ചു. ഇവയുടെ ഉടമകൾക്ക് നഷ്ടപരിഹാരം നൽകുന്നതിനുള്ള നടപടികൾ ആരംഭിച്ചിട്ടുണ്ട്. മഴക്കാല മുന്നൊരുക്കങ്ങളുമായി ബന്ധപ്പെട്ട വിഷയങ്ങളും യോഗത്തിൽ അവലോകനം ചെയ്തു. കേന്ദ്ര കലാവസ്ഥാ വകുപ്പ് ലഭ്യമാക്കിയിട്ടുള്ള ദീർഘകാല പ്രവചനം അനുസരിച്ച് 2024 മൺസൂൺ മഴ രാജ്യത്താകമാനം സാധാരണയിൽ കൂടുതൽ (106% + 5%) ആവാനുള്ള സാധ്യതയാണുള്ളത്. ദക്ഷിണേഷ്യൻ രാജ്യങ്ങളുടെ ഔദ്യോഗിക കാലാവസ്ഥാ ഏജൻസികളുടെ കൂട്ടായ്മയായ സൗത്ത് ഏഷ്യൻ സീസണൽ ക്ലൈമറ്റ് ഔട്ട്ലുക്ക് ഫോറം കേരളത്തിൽ ഇത്തവണ സാധാരണയിൽ കൂടുതൽ (Above Normal) കാലവർഷ മഴ ലഭിക്കാനുള്ള സാധ്യത പ്രവചിക്കുന്നു. ഈ സാഹചര്യത്തിൽ മഴക്കാല മുന്നൊരുക്ക പ്രവർത്തനങ്ങൾ ഊർജിതമാക്കാൻ കളക്ടർ നിർദേശിച്ചു. മഴക്കാലത്ത് കൊതുകുകളുടെ ഉറവിട നശീകരണം ഉറപ്പാക്കണം. തോട്ടം മേഖലയിലുൾപ്പടെ വെള്ളക്കെട്ട് ഒഴിവാക്കാനും പകർച്ചവ്യാധികൾ തടയുന്നതിനും നടപടി സ്വീകരിക്കണം. ഓടകൾ, കനാലുകൾ, തോടുകൾ എന്നിവ സമയബന്ധിതമായി ശുചിയാക്കണമെന്ന് തദ്ദേശ സ്ഥാപന സെക്രട്ടറിമാർക്ക് നിർദേശം നൽകി. ആക്രി കച്ചവടം നടത്തുന്ന സ്ഥലങ്ങളിൽ ആക്രി സാധനങ്ങൾ ഷീറ്റ് ഉപയോഗിച്ച് മൂടാൻ നിർദേശിക്കണം. ഇത്തരം സ്ഥലങ്ങളിൽ വെള്ളം കെട്ടിക്കിടന്ന് കൊതുകുകൾ വളരും. മാലിന്യ നിക്ഷേപ കേന്ദ്രങ്ങളിലും വെള്ളക്കെട്ട് ഒഴിവാക്കണം. നിലവിൽ നടന്നുകൊണ്ടിരിക്കുന്ന പൊതുമരാമത്ത് പണികൾ വേഗത്തിൽ പൂർത്തീകരിക്കണം. മാലിന്യ നിർമാർജനം വേഗത്തിൽ നടത്തുകയും മഴയ്ക്ക് മുൻപായി പൊതു ഇടങ്ങളിൽ മാലിന്യം കെട്ടികിടക്കുന്നില്ല എന്നത് ഉറപ്പ് വരുത്തുകയും ചെയ്യണം. മഴക്കാലത്ത് ദുരിതാശ്വാസ ക്യാപുകളായി പ്രവർത്തിക്കേണ്ട സ്‌കൂളുകളുടെ അറ്റകുറ്റപ്പണികൾ ഉടൻ പൂർത്തിയാക്കണം. തദ്ദേശ തലത്തിൽ ജെ.സി.ബി, ഹിറ്റാച്ചി, ചെയ്ൻ ബെൽറ്റ് ഉള്ള ഹിറ്റാച്ചി, ബോട്ടുകൾ, വള്ളങ്ങൾ, ഇലക്ട്രിക് മരം മുറി യന്ത്രങ്ങൾ എന്നിവ സംബന്ധിച്ച വിവരങ്ങൾ, ഉടമയുടെ പേരും, മൊബൈൽ നമ്പരും സഹിതം വിവരശേഖരണം നടത്തണം. ജൂൺ ഒന്നു മുതൽ എല്ലാ തദ്ദേശ സ്ഥാപനങ്ങളിലും കൺട്രോൾ റൂമുകൾ ആരംഭിക്കണമെന്നും കളക്ടർ നിർദേശിച്ചു. മഴക്കാല മുന്നൊരുക്കവുമായി ബന്ധപ്പെട്ട് വിവിധ വകുപ്പുകൾ സ്വീകരിക്കേണ്ട നടപടികൾ ജില്ലാ മെഡിക്കൽ ഓഫീസർ അവതരിപ്പിച്ചു. തൊഴിലുറപ്പ് തൊഴിലാളികളും മണ്ണിൽ പണിയെടുക്കുന്നവരും ഡോക്സിസൈക്ലിൻ ഗുളികകൾ കഴിക്കണം. ഡെങ്കിപ്പനി, എലിപ്പനി തുടങ്ങിയ പകർച്ചവ്യാധികൾ തടയാൻ കർശന നടപടികൾ വേണം. കൊതുക് സാന്ദ്രതയിലെ വർധന, കാലാവസ്ഥയിലെ മാറ്റം, അതിഥി തൊഴിലാളി ക്യാംപുകളിലെ മലിനീകരണം, വളർത്തുമൃഗങ്ങൾ വഴിയുള്ള രോഗപ്പകർച്ച തുടങ്ങിയവയാണ് പകർച്ചവ്യാധിയുടെ മുഖ്യകാരണങ്ങൾ. മഴക്കാല രോഗങ്ങളുമായി ബന്ധപ്പെട്ട മരുന്നുകളുടെ ലഭ്യത ഉറപ്പാക്കിയിട്ടുണ്ടെന്നും അവർ അറിയിച്ചു. സ്പാർക്ക് ഹാളിൽ ചേർന്ന യോഗത്തിൽ ദുരന്ത നിവാരണ വിഭാഗം ഡെപ്യൂട്ടി കളക്ടർ വി.ഇ. അബ്ബാസ്, വിവിധ വകുപ്പ് ഉദ്യോഗസ്ഥർ എന്നിവരും ജില്ലയിലെ തദ്ദേശ സ്ഥാപനങ്ങളിലെ സെക്രട്ടറിമാർ ഓൺലൈനായും പങ്കെടുത്തു.
ഇറാനിയൻ ബോട്ട് പിടികൂടി ഇന്ത്യൻ കോസ്റ്റ് ഗാർഡ്: ആറു പേർ പിടിയിൽ

കോഴിക്കോട്: ഇറാനിയൻ ബോട്ടിനെ പിടികൂടി ഇന്ത്യൻ കോസ്റ്റ് ഗാർഡ്. കൊയിലാണ്ടി പുറംകടലിൽ ആണ് ഇറാനിയൻ ബോട്ടിനെ പിടികൂടിയത്. ബോട്ടിൽ ഉണ്ടായിരുന്ന ആറ് മത്സ്യത്തൊഴിലാളികളും പിടിയിലായിട്ടുണ്ട്. പിടിയിലായവരെല്ലാം കന്യാകുമാരി സ്വദേശികളാണ്. ഇറാനിൽ മത്സ്യബന്ധനത്തിന് പോയ സംഘത്തിലുള്ളവരാണ് മത്സ്യത്തൊഴിലാളികൾ. തീർന്ന ബോട്ട് കോഴിക്കോട് കൊയിലാണ്ടി തീരത്ത് കുടുങ്ങുകയായിരുന്നു. ശമ്പളം കിട്ടാത്തതിനെ തുടർന്നാണ് ഇവർ ഇറാനിൽ നിന്ന് രക്ഷപ്പെട്ടത് എന്നാണ് ലഭ്യമാകുന്ന വിവരം.
അഞ്ചാം ക്ലാസിൽ പഠിക്കുമ്പോൾ കിട്ടിയ അടിയുടെ വേദന ഇപ്പോഴും മനസിലുണ്ട്; സുപ്രീം കോടതി ചീഫ് ജസ്റ്റിസ്

ന്യൂഡൽഹി: തന്റെ സ്‌കൂൾ കാലഘട്ടത്തിലെ ശിക്ഷാ രീതികളെ കുറിച്ചുള്ള ഓർമ്മകൾ പങ്കുവെച്ച് സുപ്രീം കോടതി ചീഫ് ജസ്റ്റിസ് ഡി.വൈ ചന്ദ്രചൂഡ്. അഞ്ചാം ക്ലാസിൽ പഠിക്കുമ്പോൾ കിട്ടിയ അടിയുടെ വേദന ഇപ്പോഴും മനസിലുണ്ടെന്നെന്ന് അദ്ദേഹം പറഞ്ഞു. ഒരു സെമിനാറിൽ സംസാരിക്കവെയാണ് അദ്ദേഹം ഇക്കാര്യം അറിയിച്ചത്. കുട്ടികളോട് നിങ്ങൾ എങ്ങനെ പെരുമാറുന്നു എന്നുള്ളത് ജീവിതകാലം മുഴുവൻ അവരുടെ മനസിലുണ്ടാവും. സ്‌കൂളിലെ ആ ദിവസം താനും ഒരിക്കലും മറക്കില്ല. കൈയിൽ വടി കൊണ്ട് അടികിട്ടിയ കാലത്ത് താനൊരു കുട്ടിക്കുറ്റവാളിയൊന്നും ആയിരുന്നില്ല. പ്രവൃത്തി പരിചയ ക്ലാസിൽ ശരിയായ അളവിലുള്ള സൂചി കൊണ്ടുവരാത്തതിനാണ് തന്നെ അടിച്ചതെന്ന് അദ്ദേഹം വ്യക്തമാക്കി. കൈയിൽ അടിക്കരുതെന്നും കാലിൽ അടിക്കാമോ എന്നും അധ്യാപകനോട് അപേക്ഷിച്ചത് ഇന്നും തനിക്ക് ഓർമയുണ്ട്. അപമാനഭാരത്താൽ മാതാപിതാക്കളോട് പറയാൻ കഴിഞ്ഞില്ല. അടികൊണ്ട് അടയാളം പതിഞ്ഞ വലതു കൈപ്പത്തി പത്ത് ദിവസം ആരും കാണാതിരിക്കാൻ ഒളിപ്പിച്ചുവെച്ചിരുന്നുവെന്നും അദ്ദേഹം ചൂണ്ടിക്കാട്ടി. ശരീരത്തിലേറ്റ മുറിവ് ഉണങ്ങി. പക്ഷേ അത് മനസിൽ എക്കാലവും നിലനിൽക്കുന്ന ആഘാതമുണ്ടാക്കി. ഇപ്പോഴും തന്റെ ജോലി ചെയ്യുമ്പോൾ അത് കൂടെയുണ്ട്. കുട്ടികളോട് ചെയ്യുന്ന ഇത്തരം പ്രതികാരങ്ങളുടെ ആഘാതം വളരെ വലുതായിരിക്കും. നിയമവ്യവഹാരങ്ങൾക്കിടയിൽ കുട്ടികളോട് അനുകമ്പാപൂർണമായ നിലപാടെടുക്കണം. അവരുടെ പുനരധിവാസവും സമൂഹത്തിന്റെ ഭാഗമാവാനുള്ള അവസരങ്ങളും ഉറപ്പാക്കണമെന്നും അദ്ദേഹം കൂട്ടിച്ചേർത്തു.