ന്യൂഡൽഹി: ആംആദ്മി നേതാക്കൾക്ക് മറുപടിയുമായി ഡൽഹി ലഫ്റ്റനന്റ് ഗവർണർ വി സക്സേന. അരവിന്ദ് കെജ്രിവാളിനെ ജയിലിനുള്ളിൽ നിന്ന് ഭരിക്കാൻ അനുവദിക്കില്ലെന്ന് അദ്ദേഹം പറഞ്ഞു. അറസ്റ്റിലായ ഡൽഹി മുഖ്യമന്ത്രി അരവിന്ദ് കെജ്രിവാൾ ജയിലിൽ നിന്ന് ഡൽഹിയുടെ ഭരണം തുടരുമെന്ന് ആം ആദ്മി പാർട്ടി നേതാക്കൾ വ്യക്തമാക്കിയിരുന്നു. ഈ പ്രസ്താവനയോടായിരുന്നു അദ്ദേഹത്തിന്റെ പ്രതികരണം.
ജയിലിനുള്ളിൽവെച്ച് സർക്കാർ പ്രവർത്തിക്കില്ലെന്ന് ഡൽഹിയിലെ ജനങ്ങൾക്ക് ഉറപ്പുനൽകുകയാണെന്ന് അദ്ദേഹം വ്യക്തമാക്കി. ഒരു ദേശീയ മാധ്യമം സംഘടിപ്പിച്ച മുഖാമുഖം പരിപാടിയിൽ സംസാരിക്കുകയായിരുന്നു അദ്ദേഹം. മാർച്ച് 21-നാണ് ഡൽഹി മുഖ്യമന്ത്രി അരവിന്ദ് കെജ്രിവാളിനെ ഇ ഡി അറസ്റ്റ് ചെയ്തത്. ഡൽഹി മദ്യനയക്കേസുമായി ബന്ധപ്പെട്ടായിരുന്നു അറസ്റ്റ്. മാർച്ച് 28 വരെ കോടതി കെജ്രിവാളിനെ ഇഡി കസ്റ്റഡിയിൽ വിട്ടിരിക്കുകയാണ്. കള്ളപ്പണം വെളുപ്പിക്കൽ അടക്കമുള്ള ആരോപണങ്ങളിൽ ചോദ്യംചെയ്യലിനായാണ് കസ്റ്റഡിയിൽ വിട്ടിരിക്കുന്നത്.
എൻഫോഴ്സ്മെന്റിന്റെ കസ്റ്റഡിയിൽ തുടരവേ കെജ്രിവാൾ ജലവിഭവവകുപ്പിലെ നടപടിക്കായി ഞായറാഴ്ച നിർദേശം നൽകിയിരുന്നു. ഇത് വലിയ വിമർശനങ്ങൾക്ക് കാരണമായിരുന്നു. അത് കെട്ടടങ്ങുംമുമ്പ് തന്നെ കെജ്രിവാൾ അടുത്ത ഉത്തരവും പുറപ്പെടുവിച്ചു. ഈ സാഹചര്യത്തിലാണ് മുഖ്യമന്ത്രിയെ ജയിലിനുള്ളിൽനിന്ന് ഭരിക്കാൻ അനുവദിക്കില്ലെന്ന് വ്യക്തമാക്കി ലഫ്റ്റനന്റ് ഗവർണർ രംഗത്തെത്തിയിരിക്കുന്നത്.