ആടുജീവിതം എന്ന സിനിമയുടെ റിലീസിന് ഇനി ദിവസങ്ങൾ മാത്രമാണ് ബാക്കി. ചിത്രത്തെക്കുറിച്ചുള്ള വിശേഷങ്ങൾ എല്ലാം തന്നെ സോഷ്യൽ മീഡിയയിൽ വൈറൽ ആവുകയാണ്. ആടുജീവിതം എന്ന സിനിമയ്ക്ക് വേണ്ടി പൃഥ്വിരാജ് എന്ന നടന്റെ ഭാഗത്തുനിന്ന് വലിയ രീതിയിലുള്ള കഷ്ടപ്പാടുകൾ ഉണ്ടായിട്ടുണ്ട്. ആടുജീവിതം സിനിമയ്ക്കായി താൻ ഉപേക്ഷിക്കേണ്ടി വന്ന സിനിമകളെക്കുറിച്ച് തുറന്നു പറഞ്ഞിരിക്കുകയാണ് ഇപ്പോൾ പൃഥ്വിരാജ്. ആടുജീവിതത്തിന്റെ ചിത്രീകരണത്തിലായതിനാൽ ചിരഞ്ജീവിയുടെ 2 സിനിമകളാണ് താൻ ഉപേക്ഷിച്ചത് എന്നാണ് താരത്തിന്റെ വെളിപ്പെടുത്തൽ.
താടിവച്ച ലുക്ക് ആയതിനാലാണ് ഒരു സിനിമ വേണ്ടെന്നു വെച്ചത്. സായി റാ നരസിംഹ റെഡിയ്ക്കായാണ് ആദ്യം ക്ഷണം ലഭിച്ചത്. ചിത്രത്തിലെ ഒരു വേഷം ചെയ്യാൻ ക്ഷണിച്ചു. എന്നാൽ ആട് ജീവിതത്തിനായി താടി വളർത്തിയതിനാൽ താൻ ചിരഞ്ജീവിയുടെ ഓഫർ നിരസിച്ചു. പിന്നീട് സായി റാ നരസിംഹ റെഡി സിനിമയുടെ പ്രമോഷനായി ചിരഞ്ജീവിയെത്തിയപ്പോൾ ലൂസിഫറിന്റെ റീമേക്ക് റൈറ്റ്സ് നേടിയിരുന്നു. 2019ലായിരുന്നു ഇത് സംഭവിച്ചത്. ലൂസിഫർ തെലുങ്കിൽ ചിരഞ്ജീവിയെ നായകനാക്കി ചെയ്യാൻ അന്ന് തന്നെ ക്ഷണിച്ചു. ആടുജീവിതത്തിന്റെ തിരക്കിലായിരുന്നതിനാൽ അതും താൻ നിരസിക്കുകയായിരുന്നു എന്നാണ് പൃഥ്വിരാജ് പറയുന്നത്. ഒരു സ്വകാര്യ ചാനലിന് നൽകിയ അഭിമുഖത്തിൽ ആയിരുന്നു താരത്തിന്റെ വെളിപ്പെടുത്തൽ.
അതേസമയം മാർച്ച് 28നാണ് ആടുജീവിതം സിനിമ റിലീസ് ചെയ്യുന്നത്. ബ്ലസിയാണ് ചിത്രം സംവിധാനം ചെയ്തിരിക്കുന്നത്. ബെന്യാമിന്റെ പ്രശസ്ത നോവലിനെ ആധാരമാക്കിയാണ് ആടുജീവിതം ഒരുക്കിയിരിക്കുന്നത്. എ ആർ റഹ്മാനാണ് ചിത്രത്തിന്റെ സംഗീത സംവിധാനം നിർവ്വഹിച്ചിരിക്കുന്നത്. ചിത്രത്തിന്റെ സൗണ്ട് ഡിസൈൻ റസൂൽ പൂക്കുട്ടിയും എഡിറ്റിംഗ് ശ്രീകർ പ്രസാദുമാണ്. സുനിൽ കെ എസ് ആണ് ഛായാഗ്രഹണം. അമല പോളാണ് ചിത്രത്തിൽ പൃഥ്വിരാജിന്റെ നായികയായെത്തുന്നത്.